കോട്ടയം ജില്ലയിലെ ചേലക്കൊമ്പ് സഞ്ജീവനി പുനരധിവാസ കേന്ദ്രത്തില്‍ ഇന്നലെ ഒരു മരണം കൂടി ഉണ്ടായി. കുറിച്ചി ജീവന്‍ജ്യോതി പുനരധിവാസ കേന്ദ്രത്തിലെ അന്തേവാസികളായ മറ്റു 2 പേര്‍ കൂടി മരിച്ചു. ഇവിടത്തെ 9 അന്തേവാസികള്‍ കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സംഭവങ്ങളില്‍ അസ്വാഭാവിക മരണത്തിനു പൊലീസ് കേസെടുത്തു. 

ചങ്ങനാശേരി പുതുജീവനിലെ 3 അന്തേവാസികള്‍ നേരത്തേ മരിച്ചിരുന്നു. കഴിഞ്ഞ 2 ആഴ്ചയ്ക്കിടെ 3 മാനസികാരോഗ്യ കേന്ദ്രങ്ങളില്‍ നിന്നായി 9 രോഗികള്‍ മരിച്ച സാഹചര്യത്തില്‍ ആരോഗ്യവകുപ്പും ആശങ്കയിലാണ്.

സഞ്ജീവനിയിലെ അന്തേവാസി ആലപ്പുഴ എടത്വാ ഇറയില്‍ വീട്ടില്‍ ഉഷാ ജോസഫാണ് (61) ഇന്നലെ മരിച്ചത്. കടുത്ത ശ്വാസംമുട്ടല്‍ ഉണ്ടായതിനെ തുടര്‍ന്ന് പുലര്‍ച്ചെ 1.30-ന് കറുകച്ചാലിലെ സ്വകാര്യ ആശുപത്രിയില്‍ പ്രവേശിപ്പിക്കുകയായിരുന്നു. ചികിത്സയിലിരിക്കെ 2.30-ന് മരിച്ചു.

ശാരീരിക അസ്വാസ്ഥ്യം പ്രകടിപ്പിച്ച മറ്റ് 9 പേര്‍ കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. ഇതില്‍ 2 പേരുടെ നില ഗുരുതരമാണെന്നാണ് അധികൃതര്‍ നല്‍കുന്ന വിവരം.

ബുധനാഴ്ച രാവിലെ 6-ന് അതിരമ്പുഴ മാണാട്ട് ജോര്‍ജിന്റെ മകള്‍ ജോയിമോള്‍ (50), വൈകിട്ട് 6.30ന് ചീരഞ്ചിറ സ്വദേശിനി ശോഭന (55) എന്നിവരാണ് മരിച്ചത്. ശോഭന ചങ്ങനാശേരിയിലെ സ്വകാര്യ ആശുപത്രിയില്‍ ചികിത്സയിലായിരുന്നു.

തിങ്കളാഴ്ച മരിച്ചത് 15-ാംമൈല്‍ ഇളങ്ങുളം ഈരൂരിക്കല്‍ ബാബു ജോസഫ് (57) ആണ്. ഉച്ചയ്ക്ക് ഭക്ഷണം കഴിച്ച ശേഷം മുറിയില്‍ അവശനിലയില്‍ കണ്ടെത്തിയ ഇയാളെ കറുകച്ചാലിലെ സ്വകാര്യ ആശുപത്രിയിലേക്കു കൊണ്ടുപോകുമ്പോഴാണ് മരിച്ചത്.10-ന് രാത്രി ദേഹാസ്വാസ്ഥ്യത്തെ തുടര്‍ന്ന് കുഴഞ്ഞുവീണതിനെത്തുടര്‍ന്ന് ആശുപത്രിയിലേക്കുള്ള യാത്രാമധ്യേയാണ് ജീവന്‍ജ്യോതി അന്തേവാസിയായ പാലാ സ്വദേശി ലീലാമ്മ ഫ്രാന്‍സിസ് (69) മരിച്ചത്.

11-ന് ഉച്ചയ്ക്ക് രക്തസമ്മര്‍ദം കുറഞ്ഞതിനെത്തുടര്‍ന്ന് ആശുപത്രിയിലേക്കു പോകും വഴി എടത്വ സ്വദേശി ലില്ലിയും (45) മരിച്ചു. വൈറോളജി പരിശോധനയ്ക്കായി സാംപിളുകള്‍ ശേഖരിച്ചിട്ടുണ്ട്.

ചേലക്കൊമ്പ് സഞ്ജീവനി പുനരധിവാസ കേന്ദ്രത്തില്‍ പരിശോധന നടത്തുന്ന ആരോഗ്യ വകുപ്പ് ഉദ്യോഗസ്ഥര്‍

3 അന്തേവാസികളെ ദേഹാസ്വാസ്ഥ്യവും തലകറക്കവും തളര്‍ച്ചയും അനുഭവപ്പെട്ടതിനെ തുടര്‍ന്ന് എടത്വായിലെ സ്വകാര്യ ആശുപത്രിയില്‍ ചികിത്സയ്ക്കായി പ്രവേശിപ്പിച്ചിട്ടുണ്ട്. ആരോഗ്യവകുപ്പ് അധികൃതര്‍ രണ്ടു മാനസികാരോഗ്യ കേന്ദ്രങ്ങളിലും പരിശോധന നടത്തി. പോസ്റ്റ്‌മോര്‍ട്ടം റിപ്പോര്‍ട്ട് ലഭിച്ചാല്‍ മാത്രമേ മരണകാരണം വ്യക്തമാക്കാന്‍ കഴിയൂ എന്നാണ് പൊലീസ് പറയുന്നത്.