കോഴിക്കോട് കോവിഡ്-19 സ്ഥിരീകരിച്ചതിനെ തുടര്‍ന്ന് ജാഗ്രത ശക്തമാക്കുന്നതിന്റെ ഭാഗമായി നിരോധനാജ്ഞ പുറപ്പെടുവിച്ചതായി കലക്ടര്‍ അറിയിച്ചു. രണ്ടുപേര്‍ക്കാണ് ജില്ലയില്‍ രോഗം സ്ഥിരീകരിച്ചത്. ഇതിലൊരാള്‍ കൊടുവള്ളി കിഴക്കോത്ത് സ്വദേശിനിയാണ്. ഇവര്‍ അബൂദബിയില്‍നിന്ന് മാര്‍ച്ച് 12ന് ആണ് നാട്ടിലെത്തിയത്. 19നാണ് ഇവരെ ബീച്ച് ആശുപത്രിയില്‍ പ്രവേശിപ്പിച്ചത്. ജില്ലയില്‍ കോവിഡ് സ്ഥിരീകരിച്ച രണ്ടാമത്തെ ആള്‍ കുറ്റ്യാടി വേളം സ്വദേശിയാണ്. കോഴിക്കോട് മെഡി. കോളജ് ഐസോലേഷന്‍ വാര്‍ഡിലായിരുന്നു. ദുബൈയില്‍നിന്ന് 20ന് രാത്രി കരിപ്പൂരില്‍ വിമാനമിറങ്ങിയയാളാണ്. വിമാനത്താവളത്തില്‍നിന്ന് നേരിട്ട് മെഡി. കോളജിലേക്ക് ആംബുലന്‍സില്‍ വന്ന രോഗിയാണിയാള്‍.
ജില്ലയില്‍ പുതുതായി 501 പേര്‍ നിരീക്ഷണത്തിലുണ്ട്. 8150 പേരാണ് ആകെ നിരീക്ഷണത്തിലുള്ളത്. ഞായറാഴ്ച ലഭിച്ച ഫലത്തിലാണ് കോഴിക്കോട്ട് രണ്ടുപേര്‍ക്ക് പോസിറ്റിവ് സ്ഥിരീകരിച്ചത്. ഇതോടെ ജില്ലയില്‍ ജാഗ്രത നടപടികള്‍ കര്‍ശനമാക്കി. കോവിഡ് ഭീഷണി ശക്തമായ സാഹചര്യത്തിലും ജില്ലയില്‍ ഇതുവരെ രോഗം സ്ഥിരീകരിക്കപ്പെട്ടിരുന്നില്ല. മെഡിക്കല്‍ കോളജില്‍ 10 പേരും ബീച്ച് ആശുപത്രിയില്‍ 22 പേരും ഉള്‍പ്പെടെ ആകെ 32 പേര്‍ നിരീക്ഷണത്തിലുണ്ട്. മെഡിക്കല്‍ കോളജില്‍നിന്ന് അഞ്ചു പേരെയും ബീച്ച് ആശുപത്രിയില്‍നിന്ന് നാലു പേരെയും ഉള്‍പ്പെടെ ഒമ്പതു പേരെ ഞായറാഴ്ച ഡിസ്ചാര്‍ജ് ചെയ്തു. 20 സ്രവ സാമ്പ്ള്‍ പരിശോധനക്ക് അയച്ചിട്ടുണ്ട്. ആകെ 176 സാമ്പിളുകള്‍ പരിശോധനക്ക് അയച്ചതില്‍ 142 എണ്ണത്തിന്റെ പരിശോധനഫലം ലഭിച്ചു. രണ്ടെണ്ണമൊഴികെ ബാക്കിയെല്ലാം നെഗറ്റിവ്.

ജില്ലയില്‍ താഴെ പറയുന്ന കാര്യങ്ങള്‍ നിരോധിച്ച് ജില്ല കലക്ടര്‍ സാംബശിവ റാവു ഉത്തരവ് പുറപ്പെടുവിച്ചു. ഈ ഉത്തരവിന് 22 മുതല്‍ മറ്റൊരുത്തരവുണ്ടാവുന്നത് വരെ പ്രാബല്യമുണ്ടാകും.

ജില്ലയിലെ എല്ലാ പൊതുസ്ഥലങ്ങളും ഉള്‍പ്പെടെ എല്ലാ സ്ഥലങ്ങളിലും അഞ്ചില്‍ കൂടുതല്‍ ആളുകള്‍ കൂടിച്ചേരുന്നത് ഒഴിവാക്കണം. ഉത്സവങ്ങള്‍, മതാചാരങ്ങള്‍, മറ്റ് ചടങ്ങുകള്‍, വിരുന്നുകള്‍ എന്നിവയില്‍ പത്തില്‍ അധികം പേര്‍ പങ്കെടുക്കരുത്. സ്‌കൂളുകള്‍, കോളജുകള്‍, മറ്റെല്ലാ വിദ്യാഭ്യാസ സ്ഥാപനങ്ങളിലും മതപഠന കേന്ദ്രങ്ങളിലും ക്ലാസുകള്‍, ക്യാമ്പുകള്‍, പരീക്ഷകള്‍, ഇന്റര്‍വ്യൂകള്‍, ഒഴിവുകാല വിനോദങ്ങള്‍, ടൂറുകള്‍ ഒഴിവാക്കണം.
ആശുപത്രികളില്‍ സന്ദര്‍ശകര്‍, ബൈസ്റ്റാന്‍ഡര്‍മാരായി ഒന്നിലധികം പേര്‍ വരരുത്. ക്ഷേത്രങ്ങളിലും പള്ളികളിലും പത്തിലധികം പേര്‍ ഒരുമിച്ച് കൂടരുത്. ഹെല്‍ത്ത് ക്ലബുകള്‍, ജിമ്മുകള്‍, ടര്‍ഫ് കളി സ്ഥലങ്ങള്‍ എന്നിവ താത്ക്കാലികമായി പ്രവര്‍ത്തനം നിര്‍ത്തിവയ്ക്കുക. എല്ലാ ടൂറിസം കേന്ദ്രങ്ങളിലേക്കും ബീച്ചുകളിലേക്കും സഞ്ചാരികളുടെ പ്രവേശനം നിരോധിച്ചു. എല്ലാതരം പ്രതിഷേധ പ്രകടനങ്ങള്‍, ധര്‍ണകള്‍, മാര്‍ച്ചുകള്‍, ഘോഷയാത്രകള്‍ ഒഴിവാക്കണം. ഇവക്ക് പുറമെ ജില്ല ദുരന്ത നിവാരണ നിയമ പ്രകാരം താഴെ പറയുന്ന നിയന്ത്രണങ്ങള്‍ കൂടി ശ്രദ്ധിക്കണം:

അവശ്യസാധനങ്ങള്‍ വീടുകളില്‍നിന്ന് ഫോണ്‍ (വാട്‌സ് അപ്പ് നമ്പര്‍) ചെയ്ത് ഓര്‍ഡര്‍ സ്വീകരിച്ചശേഷം എടുത്തുെവച്ച് ഉടമകളെ അറിയിക്കുന്നത് കടകളിലെ തിരക്ക് കുറക്കുന്നതിന് സഹായിക്കും.
റസ്റ്റോറന്റുകളിലും ഹോട്ടലുകളിലും ഫിസിക്കല്‍ ഡിസ്റ്റന്‍സിങ് ഉറപ്പുവരുത്തുന്നതിായി എല്ലാ സീറ്റുകളും ചുരുങ്ങിയത് ഒരു മീറ്റര്‍ അകലത്തില്‍ ക്രമീകരിക്കേണ്ടതാണ്.
റസ്റ്റോറന്റുകളിലെയും ഹോട്ടലുകളിലെയും കിച്ചണുകളും ഡൈനിങ് ഏരിയയും അണുനാശിനി ഉപയോഗിച്ച് എല്ലാ ദിവസവും വൃത്തിയാക്കേണ്ടതാണ്.
 വിവാഹങ്ങളില്‍ ഒരേ സമയം പത്തില്‍ കൂടുതല്‍ പേര്‍ ചടങ്ങ് നടക്കുന്ന സമയത്ത് ഉണ്ടാവാന്‍ പാടില്ല. ആകെ പങ്കെടുക്കുന്നവര്‍ അമ്പതില്‍ കൂടുതലാവാനും പാടില്ല.
 വിവാഹ തീയതിയും ക്ഷണിക്കുന്നവരുടെ ലിസ്റ്റും അതത് പൊലീസ് സ്റ്റേഷനിലും വില്ലേജ് ഓഫിസുകളിലും അറിയിക്കേണ്ടതാണ്.
ഹാര്‍ബറുകളിലെ മത്സ്യലേല നടപടികള്‍ നിരോധിച്ചു. ഗവണ്‍മന്റെ് നിര്‍ദേശിച്ച മാനദണ്ഡങ്ങള്‍ പ്രകാരം ഡെ. ഡയറക്ടര്‍ ഓഫ് ഫിഷറീസ് നിശ്ചയിക്കുന്ന നിരക്കില്‍ വില്‍പന നടത്തേണ്ടതാണ്.

എല്ലാ വ്യാപാര സ്ഥാപനങ്ങളിലും ഹോട്ടലുകളിലും ഉപഭോക്താക്കള്‍ക്കായി 'ബ്രേയ്ക് ദി ചെയ്ന്‍' ഉറപ്പുവരുത്താനായി സോപ്പും സാനിറ്റൈസറും പ്രവേശന കവാടത്തില്‍ സജ്ജീകരിക്കേണ്ടതാണ്.
വന്‍കിട ഷോപ്പിങ് മാളുകള്‍, സൂപ്പര്‍ മാര്‍ക്കറ്റുകള്‍ എന്നിവ സന്റെറര്‍ലൈസ്ഡ് എയര്‍ കണ്ടീഷന്‍ സംവിധാനം നിര്‍ത്തിവെക്കേണ്ടതും പകരം ഫാനുകള്‍ ഉപയോഗിക്കേണ്ടതുമാണ്. ഷോപ്പ് മുറികളുടെ വിസ്തീര്‍ണത്തിനാനുപാതികമായി 10 ചതുരശ്രമീറ്ററിന് ഒരാള്‍ എന്ന നിലയില്‍ മാത്രമേ ഷോപ്പിനകത്ത് അകത്ത് പ്രവേശിക്കാന്‍ പാടുള്ളൂ. ഷോപ്പിന്റെ വിസ്തീര്‍ണം പുറത്ത് നോട്ടീസ് ബോര്‍ഡില്‍ പ്രദര്‍ശിപ്പിക്കേണ്ടതാണ്.
ഒരേ സമയം അഞ്ചില്‍ കൂടുതല്‍ പേര്‍ കടകളില്‍/മത്സ്യ-മാംസ മാര്‍ക്കറ്റ് കൗണ്ടറുകളിലും എത്തുന്നില്ലെന്ന് ഉറപ്പ് വരുത്തേണ്ടതാണ്. മത്സ്യമാര്‍ക്കറ്റുകളില്‍ ഓരോ കൗണ്ടറുകളും തമ്മില്‍ അഞ്ച് മീറ്റര്‍ അകലവും ഉപഭോക്താക്കള്‍ക്കിടയില്‍ ഒരു മീറ്റര്‍ അകലവും പാലിക്കേണ്ടതാണ്. നിയന്ത്രണങ്ങള്‍ സംബന്ധിച്ച ബോര്‍ഡ് പൊതുജനങ്ങള്‍ക്ക് കാണത്തക്കവിധം പ്രദര്‍ശിപ്പിക്കേണ്ടതാണ്.

മറ്റ് എല്ലാതരം സ്വകാര്യ സ്ഥാപനങ്ങളിലും ഫിസിക്കല്‍ ഡിസ്റ്റന്‍സിങ് ഉറപ്പുവരുത്തേണ്ടതും വീട്ടിലിരുന്ന് ജോലി ചെയ്യുന്ന സംവിധാനം പ്രോത്സാഹിപ്പിക്കേണ്ടതാണ്. ജീവനക്കാരുടെ സുരക്ഷിതത്വം അതത് സ്ഥാപന മേധാവികള്‍ ഉറപ്പുവരുത്തേണ്ടതാണ്. 

വീടുകളില്‍ സാധനം എത്തിക്കുന്നതിന് സൗകര്യമുള്ള വ്യാപാര സ്ഥാപനങ്ങള്‍ ഇത് പ്രോത്സാഹിപ്പിക്കേണ്ടതാണ്.