ഗ്യാനേഷ് കുമാറിന്റെ രാജിയാവശ്യപ്പെട്ട് നടന്ന പ്രതിഷേധത്തിൽ രാഹുൽഗാന്ധിക്കും, പ്രിയങ്കഗാന്ധിക്കും നേരെ നടന്ന പൊലീസ് കൈയേറ്റത്തിൽ പ്രതിഷേധിച്ച് പ്രതിഷേധിക്കാൻ കോൺ​ഗ്രസ്. കോൺഗ്രസ് ഇന്ന് കരിദിനമായി ആചരിക്കും. സംസ്ഥാന- ജില്ല- ബ്ലോക്ക് തലങ്ങളിൽ കരിദിനാചരണത്തിന് കോൺ​ഗ്രസ് ആഹ്വാനം ചെയ്യുകയും ചെയ്തു.

അതേസമയം, ജന്തർമന്തറിലെ കോൺഗ്രസ് പ്രതിഷേധത്തിനിടെ പൊലീസുകാർക്ക് നേരെ ആക്രമണം നടന്നതായി ദില്ലി പൊലീസ് ആരോപിക്കുകയും ചെയ്തു. വിഷയത്തിൽ പൊലീസ് അന്വേഷണം ആരംഭിച്ചു. വനിതാ പൊലീസ് ഉദ്യോഗസ്ഥർ ഉൾപ്പെടെയുള്ള പൊലീസുകാരെ ആക്രമിച്ചെന്നാണ് ആരോപണമുള്ളത്. ദൃശ്യങ്ങളുടെ അടിസ്ഥാനത്തിൽ ആക്രമണത്തിൽ ഉൾപ്പെട്ടവരെ തിരിച്ചറിയാനാണ് പൊലീസിൻ്റെ ശ്രമമുള്ളത്.

അതേസമയം രണ്ടാം ദിവസവും പ്രതിപക്ഷ പ്രതിഷേധത്തിൽ സ്തംഭിച്ചിരിക്കുകയാണ് രാജ്യതലസ്ഥാനം. കോൺ​ഗ്രസ് അധ്യക്ഷൻ മല്ലികാർജുൻ ഖർ​ഗെയാണ് ഇന്ത്യ സഖ്യം എംപിമാരെ ഉച്ചഭക്ഷണത്തിനായി ജൻപഥ് റോഡിലെ ഹോട്ടലിലേക്ക് ക്ഷണിച്ചത്. സമാജ്വാദി പാർട്ടി ഒഴികെ എല്ലാ സഖ്യകക്ഷി എംപിമാരും ഹോട്ടലിലേക്കെത്തി. അപകടം മണത്ത പൊലീസ് വൻ സുരക്ഷ ഹോട്ടലിന് സമീപം ഒരുക്കി.

എന്നാൽ ഭക്ഷണം കഴിച്ച എംപിമാർ അപ്രതീക്ഷിത നീക്കത്തിലൂടെ ബസുകളിൽ മുന്നോട്ട് നീങ്ങി. ജന്തർ മന്ദറിലേക്കാണ് യാത്രയെന്നും, ഇന്നും സമരമാണെന്നും രാഹുൽ പ്രഖ്യാപിക്കുകയും ചെയ്തു. ബസുകളിൽ മുന്നോട്ട് നീങ്ങിയ എംപിമാരെ അശോക റോഡിലെത്തും വരെ പൊലീസ് തടഞ്ഞില്ല. ദില്ലിയിലെ തന്ത്രപ്രധാന മേഖലയിലൂടെ എംപിമാരുമായി നീങ്ങിയ ബസുകൾ ന​ഗരത്തെ സ്തംഭിപ്പിച്ചു. അശോക റോഡിൽ കേന്ദ്രസേനയടക്കം വൻ സുരക്ഷാ വിന്യാസം. രാഹുൽ ബസിൽ നിന്നിറങ്ങി ജന്തർ മന്തറിലേക്ക് പോകാനൊരുങ്ങി. പൊലീസ് തടഞ്ഞപ്പോൾ വൻ സംഘർഷമാകുകയായിരുന്നു.