കേരളം എന്താ ഇങ്ങനെ! അടുത്തിരിക്കുന്നയാള്‍ ഒന്നുതുമ്മിയാല്‍ ഒപ്പമുള്ള മറ്റുള്ളവര്‍ അയാളെ ഭീതിയോടെ നോക്കുന്ന അവസ്ഥയിലാണ് കേരളം... എല്ലാ തുമ്മലിനെയും പേടിക്കേണ്ടതുണ്ടോ...
അടുത്തിരിക്കുന്നയാള്‍ ഒന്നുതുമ്മിയാല്‍ ഒപ്പമുള്ള മറ്റുള്ളവര്‍ അയാളെ ഭീതിയോടെ നോക്കുന്ന അവസ്ഥയിലാണ് കേരളം. ഭീതിയോടെയാണ് ആളുകള്‍ ഓരോ തുമ്മലിനെയും കാണുന്നത്. സാധാരണ തുമ്മലാണെങ്കില്‍ക്കൂടി കൊറോണയാണെന്ന് തെറ്റിദ്ധരിച്ച് അവരെ അകറ്റിനിര്‍ത്തുകയാണ് സമൂഹം. ഒരു പരിധിവരെ ഇതിനെ പ്രതിരോധമെന്ന് പറയേണ്ടിവരും. കാരണം, ചിലപ്പോള്‍ കൊറോണയാണെങ്കിലോ? എങ്കിലും ഒരാള്‍ക്ക് കൊറോണ ഇല്ലെങ്കില്‍പ്പോലും തുമ്മലോ ദേഹത്ത് ചൂടോ അനുഭവപ്പെടുണ്ടെങ്കില്‍പ്പോലും മുറിയ്ക്കുള്ളില്‍ നിരീക്ഷണത്തിലിരിക്കേണ്ട സാഹചര്യത്തിലേക്കാണ് സംസ്ഥാനം നീങ്ങുന്നത്. കോവിഡ് -19 വൈറസിന്റെ സാമൂഹികവ്യാപനം എപ്പോള്‍ വേണമെങ്കിലുമുണ്ടാകാം. അതിനാല്‍, എല്ലാവര്‍ക്കും പേടിയാണ്.
തുമ്മല്‍ പല രോഗങ്ങളുടെയും പൊതുലക്ഷണമാണ്. അലര്‍ജിയുള്ളവര്‍ക്കും ജലദോഷപ്പനിയുള്ളവര്‍ക്കും തുമ്മലുണ്ടാകാം. റൈനോ, അഡിനോ വൈറസുകളാണ് പ്രധാനമായും തുമ്മലിന് കാരണമാകുന്നത്. പിന്നെയാണ് കൊറോണ വൈറസ് വരുന്നത്. പനിയില്ലാതെ തുമ്മല്‍ മാത്രമാണെങ്കില്‍ ഭയക്കേണ്ടതില്ല. എങ്കിലും കൊറോണ വൈറസുള്ളതിനാല്‍ തുമ്മുമ്പോള്‍ വായും മൂക്കും പൊത്തിപ്പിടിക്കണം. തുമ്മുന്നവരെ ഭയപ്പാടോടെ കാണേണ്ട കാര്യമില്ലെന്ന് ചുരുക്കം.
ആളുകള്‍ക്കിടയില്‍ പരിഭ്രാന്തി പടരുന്നതിനുള്ള ഒരു പ്രധാന കാരണം, കൊറോണ വൈറസിന്റെ ലക്ഷണങ്ങള്‍ നമുക്ക് ഇടയ്ക്കിടെ ഉണ്ടാകാറുള്ള സാധാരണ ഇന്‍ഫ്ലുവന്‍സയുമായി സാമ്യമുള്ളതാണ് എന്നത് തന്നെയാണ്. അതുകൊണ്ടു തന്നെ ഇത് രണ്ടും തമ്മിലുള്ള വ്യത്യാസങ്ങള്‍ തിരിച്ചറിയുന്നത് വളരെയധികം ബുദ്ധിമുട്ടായി മാറുന്നു. കൊറോണ വൈറസിന് 14 ദിവസം വരെ ഇന്‍ക്യുബേഷന്‍ പിരീഡ് ഉണ്ട്. അതിനാല്‍ 7 മുതല്‍ 10 ദിവസങ്ങള്‍ക്കപ്പുറം രോഗലക്ഷണങ്ങള്‍ തുടരുകയോ വഷളാവുകയോ ചെയ്താല്‍ വൈദ്യസഹായം തേടേണ്ടത് അത്യാവശ്യമായി മാറുന്നു. ജലദോഷവും കഠിനമായ മൂക്കൊലിപ്പും, പനി, ചുമ, തലവേദന, തൊണ്ടവേദന, ശാരീരിക അസ്വസ്ഥത, ശ്വസന പ്രശ്നങ്ങള് എന്നിവയൊക്കെ കൊറോണ ബാധയുടെ രോഗലക്ഷണങ്ങളാണ്. അതിനാല്‍ ജലദോഷം, പനി, ചുമ എന്നിവയ്‌ക്കൊപ്പം ശ്വാസതടസ്സത്തിന്റെ പ്രശ്നങ്ങള് അനുഭവപ്പെട്ടാല്‍ ഉടന്‍ തന്നെ വൈദ്യസഹായം തേടുന്നതാണ് ഉത്തമം.
കുറഞ്ഞ പ്രതിരോധശേഷി ഈ വൈറസ് ബാധിക്കുന്നതിനുള്ള ഏറ്റവും വലിയ കാരണമായതിനാല്‍, പ്രതിരോധശേഷി വര്‍ദ്ധിപ്പിക്കുന്നത് തന്നെയാണ് ഇതിനെ തടയാനുള്ള വ്യക്തമായ മാര്‍ഗ്ഗം. ശക്തമായ രോഗപ്രതിരോധ ശേഷി വളര്‍ത്തുന്നതിനായി ആരോഗ്യകരവും പോഷകസമൃദ്ധവുമായ ഭക്ഷണങ്ങള്‍ കഴിക്കുക. തുമ്മലും ചുമയും ഉണ്ടാകുമ്പോള്‍ മൂക്കും വായയും പൊത്തി വയ്ക്കാന്‍ ശ്രദ്ധിക്കണം. സോപ്പും വെള്ളവും ഉപയോഗിച്ച് പതിവായി കൈ കഴുകുക. ആല്‍ക്കഹോള്‍ അടിസ്ഥാനമാക്കിയുള്ള സാനിറ്റൈസര്‍ ഉപയോഗിക്കുക. ചുറ്റുപാടുകള്‍ വൃത്തിയായി സൂക്ഷിക്കുക. ഒരിക്കല്‍ ഉപയോഗിച്ച ടിഷ്യു ഉപേക്ഷിക്കുക. തിരക്കേറിയ സ്ഥലങ്ങളിലേക്കുള്ള യാത്ര ഒഴിവാക്കുക. ജലദോഷവും ചുമയും ഉള്ള ഒരാളുമായുള്ള അടുത്ത സമ്പര്‍ക്കം ഒഴിവാക്കുക. വളര്‍ത്തു മൃഗങ്ങളുമായുള്ള സമ്പര്‍ക്കവും കുറച്ചുനാളത്തേക്ക് ഒഴിവാക്കുക.
ഒരുകൂട്ടം ആളുകള്‍ ആരോഗ്യവകുപ്പിന്റെ നിര്‍ദേശം അവഗണിക്കുമ്പോള്‍ അതിജാഗ്രതയോടെ കാര്യങ്ങളെ കാണുന്നവരും ഏറെയാണെന്ന് ആരോഗ്യപ്രവര്‍ത്തകര്‍. പൊതുഗതാഗതസംവിധാനം ഉപയോഗിക്കുന്നവരിലേറെപ്പേരും ഇപ്പോള്‍ മുഖാവരണം ധിരിക്കുന്നുണ്ട്. എന്നാല്‍, മുഖാവരണമില്ലാതെ സഞ്ചരിക്കുന്നവരും ഏറെ. ഇവരിലാരെങ്കിലും ഒന്നുതുമ്മിയാല്‍, ഒപ്പം സഞ്ചരിക്കുന്നവരുടെ വിധംമാറും. പനിയോ തുമ്മലോ ഉണ്ടെങ്കില്‍ വീട്ടിലിരിക്കണം എന്നു പരസ്യമായി പറയുന്നത് ഇപ്പോള്‍ പൊതുവിടങ്ങളിലെ പതിവുകാഴ്ച.
"
https://www.facebook.com/Malayalivartha
