കൊറോണയുടെ പശ്ചാത്തലത്തില്‍ നിരീക്ഷണത്തില്‍ പാര്‍പ്പിച്ചിരുന്ന മത്സ്യത്തൊഴിലാളികള്‍ മതില്‍ചാടി രക്ഷപ്പെട്ടു. പാറശാല പെ‍ാഴിയൂര്‍ സെന്റ് മാത്യൂസ് ഹൈസ്കൂളില്‍ പ്രവര്‍ത്തിക്കുന്ന ക്യാംപില്‍ കഴിഞ്ഞിരുന്ന 30 പേര്‍ കഴിഞ്ഞദിവസം രാത്രിയാണ് ഒളിച്ചോടിയത്. വിവിധ സ്ഥലങ്ങളില്‍ നിന്നായി എത്തിച്ച്‌ 194 പേരെയാണ് ക്യാമ്ബില്‍ പാര്‍പ്പിച്ചിരിക്കുന്നത്. ഇന്നലെ രാവിലെ നടന്ന പരിശോധനയില്‍ എണ്ണം കുറവ് ശ്രദ്ധയില്‍പ്പെടുകയായിരുന്നു.

തുടര്‍ന്ന് നടത്തിയ അന്വേഷണത്തില്‍ ചിലര്‍ വീടുകളിലെത്തിയതായി വിവരം ലഭിച്ചു. ചാടിപ്പോയവരെ തിരികെ എത്തിക്കാന്‍ ഇടവകകമ്മിറ്റികളുടെ സഹായം അഭ്യര്‍ഥിച്ചിട്ടുണ്ട്. 24 മണിക്കൂറും കാവല്‍ നില്‍ക്കുന്ന പൊലീസുകാരുടെ കണ്ണുവെട്ടിച്ചാണ് ഇവര്‍ കടന്നു കളഞ്ഞത്. മൂന്ന് ദിവസം മുന്‍പാണ് കണ്ണൂര്‍, നീലേശ്വരം, ബേപ്പൂര്‍, കോഴിക്കോട്, മുനമ്ബം തുടങ്ങിയ ഭാഗങ്ങളില്‍ നിന്നെത്തിയ 194 പേരെ പെ‍ാഴിയൂര്‍ ഗവ യുപി സ്കൂള്‍, സെന്‍റ് മാത്യുസ് ഹൈസ്കൂള്‍ എന്നിവിടങ്ങളിലുള്ള ക്യാംപില്‍ പാര്‍പ്പിച്ചത്.

ഇവര്‍ക്ക് രോഗലക്ഷണങ്ങളില്ലെങ്കിലും പുറം ജില്ലകളില്‍ നിന്നെത്തുന്നവരെ 14ദിവസം നിരീക്ഷിക്കണമെന്ന നിര്‍ദേശത്തെ തുടര്‍ന്നാണ് ക്യാംപുകളിലെത്തിച്ചത്. നിരീക്ഷണത്തിലിരുന്നവര്‍ ചാടിയ സംഭവം വിവാദമായതോടെ പഞ്ചായത്ത്, പെ‍ാലീസ്, ആരോഗ്യവകുപ്പ്, ഇടവകകമ്മിറ്റികള്‍ എന്നിവയുടെ നേതൃത്വത്തില്‍ തിരികെ എത്തിക്കാനുള്ള ശ്രമങ്ങള്‍ നടക്കുകയാണ്.

ഇവരില്‍ ചിലര്‍ കടലി‍ല്‍ പോയതായും സൂചനകളുണ്ട്. കോവിഡ്19 പടര്‍ന്ന കാസര്‍കോഡ് കോഴിക്കോട്, കണ്ണൂര്‍ ജില്ലകളില്‍ നിന്നുള്ളവര്‍ ചാടിയവരുടെ കൂട്ടത്തിലുള്ളത് ആശങ്ക പരത്തുന്നു.