തിരുവനന്തപുരത്ത് മൊബൈൽ ഫോണിൽ നിന്ന് വാട്സാപ്പ് ആപ്ലിക്കേഷൻ ഡിലീറ്റ് ചെയ്തതിന് ആറുവയസുകാരിയായ മകളെ അമ്മ ക്രൂരമായി മർദിച്ചു. സംഭവവുമായി ബന്ധപ്പെട്ട് കുട്ടിയുടെ അമ്മയെ പോലീസ് കസ്റ്റഡിയിലെടുത്തു. തിരുവനന്തപുരം  ഉദിയൻകുളങ്ങരയിലാണ് നാടിനെ നടുക്കിയ ഈ സംഭവം ഉണ്ടായത്. ഉദിയൻകുളങ്ങര സ്വദേശികളായ വിഷ്ണു - ശോഭ ദമ്പതികളുടെ ഇളയ മകൾ ആറുവയസുകാരി വിഷ്ണുനന്ദയ്ക്കാണ് അമ്മയുടെ ക്രൂരമായ മർദനമേറ്റത്. വെള്ളിയാഴ്ച ഉച്ചയോടെയായിരുന്നു സംഭവം. അമ്മ ശോഭയുടെ ഫോണിൽ നിന്നും കുട്ടി വാട്സാപ്പ് ഡിലീറ്റ് ചെയ്തതാണ് പെട്ടെന്നുള്ള പ്രകോപനത്തിന് കാരണമായത്.

മർദനത്തിൽ മുഖത്ത് മാരകമായി പരിക്കേറ്റ കുട്ടിയെ അമ്മയും അമ്മൂമ്മയും ചേർന്നാണ് നെയ്യാറ്റിൻകര ജനറൽ ആശുപത്രിയിൽ എത്തിച്ചത്. കട്ടിലിൽ നിന്ന് വീണാണ് മുഖത്ത് പരിക്കേറ്റതെന്നായിരുന്നു ഇവർ ഡോക്ടർമാരോട് പറഞ്ഞത്. എന്നാൽ കുട്ടിയുടെ മുഖത്തെ മാരകമായ മുറിവുകളിൽ സംശയം തോന്നിയ ഡ്യൂട്ടി ഡോക്ടർ കുട്ടിയോട് കാര്യങ്ങൾ ചോദിച്ചറിഞ്ഞതോടെയാണ് അമ്മയുടെ ക്രൂരത പുറത്തറിയുന്നത്.
തുടർന്ന് ആശുപത്രി അധികൃതർ വിവരമറിയിച്ചതിനെ തുടർന്ന് സ്ഥലത്തെത്തിയ പോലീസ് കുട്ടിയുടെ അമ്മയെ കസ്റ്റഡിയിൽ എടുക്കുകയായിരുന്നു. പരിക്കേറ്റ കുട്ടി നിലവിൽ നെയ്യാറ്റിൻകര ജനറൽ ആശുപത്രിയിൽ ചികിത്സയിലാണ്. സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്.