ഓടിക്കൊണ്ടിരുന്ന ബസിനു മുന്നില്‍ ചാടി ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരിച്ചു
കോഴിക്കോട് പുതിയറ പുതിയ ബസ് സ്റ്റാന്‍ഡിനു സമീപം ഓടിക്കൊണ്ടിരുന്ന സ്വകാര്യ ബസിനു മുന്നില്‍ ചാടിയ യുവാവ് മരിച്ചു. കോഴിക്കോട് പുതിയറ തിരുത്തിയാട് തെക്കേപാലാട്ട് വിഷ്ണുകൃപ ഹൗസില്‍ നിത്യാനന്ദന്റെ മകന്‍ ടി.പി.അജയ് (41) ആണ് ഗുരുതര പരുക്കേറ്റ് മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ വ്യാഴാഴ്ച രാത്രി പത്തു മണിയോടെ മരിച്ചത്. മൃതദേഹം പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുകൊടുക്കും. സംസ്‌കാരം വെള്ളിയാഴ്ച വൈകിട്ട് നാലിന് മാവൂര്‍ റോഡ് ശ്മശാനത്തില്‍.
വ്യാഴാഴ്ച രാവിലെ 10.20 ന് ആണ് കോഴിക്കോട് മാവൂര്‍ റോഡില്‍ മെഡിക്കല്‍ കോളജ് ഭാഗത്തേക്ക് പോകുകയായിരുന്ന ബസിന്റെ അടിയിലേക്ക് അജയ് ചാടിയത്. ബസ് ഉടനെ നിര്‍ത്തിയെങ്കിലും കാലില്‍ ചക്രം കയറി ഗുരുതരമായി പരുക്കേറ്റു. ബാഗുമായി റോഡിനു സമീപത്തെ നടപ്പാതയില്‍ നിന്ന യുവാവ് ബസ് അടുത്തെത്തിയപ്പോള്‍ ബാഗ് നടപ്പാതയില്‍ വച്ചശേഷം ഓടി വന്നു ബസിനു മുന്നിലേക്ക് ചാടുന്ന ദൃശ്യം ബസിലെ ഡാഷ് ബോര്‍ഡ് ക്യാമറയില്‍ പതിഞ്ഞിരുന്നു. സംഭവത്തില്‍ നടക്കാവ് പൊലീസ് കേസെടുത്തു. കോഴിക്കോട് സിവില്‍ സ്‌റ്റേഷനില്‍ കൃഷി വകുപ്പിലെ ജീവനക്കാരനായിരുന്നു.
https://www.facebook.com/Malayalivartha
