സംസ്ഥാന ഭാഗ്യക്കുറി വകുപ്പിന്റെ 30 കോടി രൂപയുടെ ഓണം ബംബർ ഒന്നാം സമ്മാനം ലഭിച്ചത് തനിക്കാണെന്ന അവകാശവാദവുമായി പാലക്കാട് ജില്ലാ പോലീസ് മേധാവിയുടെ (എസ്.പി) ഓഫീസിലെത്തി തമിഴ്‌നാട് സ്വദേശി. തമിഴ്‌നാട് ഈറോഡ് സത്യമംഗലം സ്വദേശിയും ഡ്രൈവറുമായ സാദിഖ് ആണ് ബന്ധുക്കൾക്കും സുഹൃത്തുക്കൾക്കുമൊപ്പം പരാതിയുമായി എത്തിയത്. എന്നാൽ സമ്മാനം ലഭിച്ച ടിക്കറ്റ് കയ്യിലില്ലെന്നും അത് നഷ്ടപ്പെട്ടുപോയെന്നുമാണ് ഇയാൾ പറയുന്നത്.

പാലക്കാട് എത്തിയപ്പോൾ റെയിൽവേ സ്റ്റേഷന് സമീപമുള്ള ഏജൻസിയിൽ നിന്നാണ് താൻ ലോട്ടറി ടിക്കറ്റ് എടുത്തതെന്നാണ് സാദിഖിന്റെ വാദം. അടുത്ത ദിവസമാണ് ഇതേ ടിക്കറ്റിനാണ് ഒന്നാം സമ്മാനമെന്ന വിവരമറിയുന്നത്. തുടർന്ന് മകൾ ടിക്കറ്റിന്റെ ഫോട്ടോ എടുത്ത് വാട്‌സ്ആപ്പ് വഴി വലിയച്ഛന് അയച്ചു കൊടുത്തു. എന്നാൽ അതിനുശേഷം ടിക്കറ്റ് കാണാതാവുകയായിരുന്നു. മകളുടെ കയ്യിൽ നിന്ന് നഷ്ടപ്പെട്ടതാണോ അതോ തന്റെ കയ്യിൽ നിന്ന് പോയതാണോ എന്ന് വ്യക്തമല്ലെന്നും, ഒറിജിനൽ ടിക്കറ്റ് കയ്യിലില്ലാത്തതിനാലാണ് ബാങ്കിലോ ട്രഷറിയിലോ പോകാതെ പോലീസ് സ്റ്റേഷനിലെത്തിയതെന്നും സാദിഖ് വിശദീകരിക്കുന്നു.

തമിഴ്‌നാട്ടിൽ വെച്ച് നഷ്ടപ്പെട്ട തന്റെ ടിക്കറ്റ് ഉപയോഗിച്ച് മറ്റാരെങ്കിലും കേരളത്തിൽ തുക കൈപ്പറ്റിയിട്ടുണ്ടെങ്കിൽ അത് അന്വേഷിക്കണമെന്ന് സാദിഖ് ആവശ്യപ്പെട്ടു. അന്യസംസ്ഥാനത്ത് നിന്ന് വന്ന് ടിക്കറ്റെടുത്ത് പോകുന്ന തങ്ങൾ എങ്ങനെയാണ് ഒരു ടിക്കറ്റ് വ്യാജമാണോ അല്ലയോ എന്ന് തിരിച്ചറിയുന്നതെന്നും, അങ്ങനെയെങ്കിൽ വ്യാജ ടിക്കറ്റുകൾക്കെതിരെ കേരള സർക്കാർ നടപടിയെടുക്കുകയല്ലേ വേണ്ടതെന്നും ഇയാൾ ചോദിക്കുന്നു. ജീവിതത്തിൽ അപൂർവ്വമായി ലഭിക്കുന്ന ഭാഗ്യം ഇതുപോലെ വ്യാജമാണെന്ന് പറഞ്ഞ് തള്ളിയാൽ എന്ത് ചെയ്യുമെന്നും സാദിഖ് കൂട്ടിച്ചേർത്തു.

എന്നാൽ സാദിഖിന്റെ അവകാശവാദങ്ങൾ പാലക്കാട് പോലീസ് പൂർണ്ണമായും തള്ളി. ഇയാൾ നൽകിയ വിവരങ്ങളും ഫോട്ടോയും പരിശോധിച്ചതിൽ നിന്ന് ലോട്ടറി ടിക്കറ്റ് വ്യാജമാണെന്നാണ് പോലീസിന്റെ നിഗമനം. സ്വന്തം നാട്ടിൽ വെച്ച് ടിക്കറ്റ് നഷ്ടപ്പെട്ട സംഭവത്തിൽ തമിഴ്‌നാട് പോലീസിൽ പരാതി നൽകാൻ ശ്രമിച്ചിരുന്നെങ്കിലും, അവിടെ ലോട്ടറി നിരോധനമുള്ളതിനാൽ കേസ് രജിസ്റ്റർ ചെയ്യാൻ സാധിച്ചിരുന്നില്ല. തുടർന്നാണ് ബന്ധുക്കളോടൊപ്പം പാലക്കാട് എസ്.പി ഓഫീസിലെത്തി പരാതി നൽകിയത്.