ജില്ലയിലെ പെട്രോള്‍ പമ്ബുകളുടെ പ്രവര്‍ത്തനം രാവിലെ ഏഴ് മുതല്‍ വൈകീട്ട് ഏഴ് വരെ ആയി നിശ്ചയിച്ച്‌ ജില്ലാ കലക്ടര്‍ ഉത്തരവിറക്കി. ഓരോ ബ്ലോക്ക് പഞ്ചായത്ത് പരിധിയില്‍ പരമാവധി രണ്ടെണ്ണം വീതവും മുനിസിപ്പാലിറ്റി പരിധിയില്‍ രണ്ടെണ്ണവും കോര്‍പ്പറേഷന്‍ പരിധിയില്‍ നാലെണ്ണം വീതവും പെട്രോള്‍ പമ്ബുകള്‍ 24 മണിക്കൂറും പ്രവര്‍ത്തിക്കുന്നതിനുള്ള ക്രമീകരണങ്ങള്‍ ഏര്‍പ്പെടുത്തിയതായി ജില്ല സപ്ലൈ ഓഫീസര്‍ അറിയിച്ചു.

രാത്രി ഏഴ് മണിക്ക് അടച്ച പമ്ബുകള്‍ അനിവാര്യമായ സാഹചര്യത്തില്‍ തുറന്ന് ഇന്ധനം നല്‍കുന്നതിന് ഉത്തരവാദപ്പെട്ട ഒരാളുടെ ഫോണ്‍ നമ്ബര്‍ പ്രദര്‍ശിപ്പിക്കണം. കോവിഡ് 19 പടരുന്നതിനെതിരെ സര്‍ക്കാര്‍ സ്വീകരിച്ച ജാഗ്രതാ നിര്‍ദ്ദേങ്ങള്‍ ലംഘിച്ച്‌ വാഹനം ഓടിക്കുന്നവരുടെ ലൈസന്‍സ് റദ്ദ് ചെയ്യാന്‍ ജില്ലാ ഭരണകൂടം ഉത്തരവിറക്കി.

സമൂഹ വ്യാപനം തടയുന്നതിന് സര്‍ക്കാര്‍ സ്വീകരിക്കുന്ന നടപടികള്‍ക്ക് കനത്ത വിഘാതം സൃഷ്ടിച്ച്‌ നിരത്തിലിറങ്ങുന്ന വാഹനങ്ങളുടെ രജിസ്‌ട്രേഷന്‍ റദ്ദ് ചെയ്യാമെന്നാണ് കലക്ടര്‍ എസ് ഷാനവാസ് ഉത്തരവ് പുറപ്പെടുവിച്ചിരിക്കുന്നത്. അടച്ചിടല്‍ നിര്‍ദ്ദേശങ്ങളെ തുടര്‍ന്ന് പൊതുവിപണിയില്‍ ഭക്ഷ്യവസ്തുക്കള്‍ ലഭ്യമാക്കുന്നതിനും കരിഞ്ചന്തയും വിലക്കയറ്റവും തടയുന്നതിന് ഭക്ഷ്യവകുപ്പ് വ്യാപക പരിശോധന നടത്തി. താലൂക്ക് സപ്ലൈ ഓഫീസര്‍മാരുടെ നേതൃത്വത്തില്‍ നടത്തിയ പരിശോധനയില്‍ 38 സ്ഥാപനങ്ങള്‍ ക്രമക്കേട് നടത്തിയതായി കണ്ടെത്തി.

പലചരക്ക്, പച്ചക്കറികടകള്‍ ഉള്‍പ്പെടെ 83 കടകളില്‍ പരിശോധന നടത്തി. പൊതുവിതരണ വകുപ്പിന്റെ സ്‌പെഷ്യല്‍ സ്‌ക്വാഡ് നടത്തിയ പരിശോധനയില്‍ അമിത വില ഈടാക്കിയ ഇനങ്ങള്‍ കണ്ടുകെട്ടുകയും കമ്മ്യൂണിറ്റി കിച്ചണിന്റെ നടത്തിപ്പിനായി അതത് പഞ്ചായത്ത് സെക്രട്ടറിമാര്‍ക്ക് കൈമാറുകയും ചെയ്തു.

തലപ്പിളളി താലൂക്കിലെ മുളളൂര്‍ക്കര ഇബ്രാഹിം സ്‌റ്റോഴ്‌സ്, കൊടുങ്ങല്ലൂര്‍ താലൂക്കിലെ ചന്തപ്പുര റിലീഫ് മെഡിക്കല്‍സ്, ചാലക്കുടി താലൂക്കിലെ കൊടകര നീലഗിരി വെജിറ്റബിള്‍സ്, കാടുകുറ്റി ഹണി ബേക്കറി എന്നിവിടങ്ങളിലാണ് സ്‌പെഷ്യല്‍ സ്‌ക്വാഡ് പരിശോധന നടത്തി സാധനങ്ങള്‍ കണ്ടുകെട്ടിയത്. കമ്മ്യൂണി

കിച്ചന് ആവശ്യമുളള എല്‍പിജി സിലിണ്ടര്‍ ലഭ്യമാക്കുന്നതിന് വിതരണക്കാര്‍ക്ക് നിര്‍ദ്ദേശം നല്‍കിയിട്ടുണ്ട്. സൗജന്യ റേഷന്‍ വിഹിതം നല്‍കുന്നതിന് വൈകീട്ട് അഞ്ച് മണിക്ക് ശേഷവും റേഷന്‍ കടകള്‍ തുറക്കുന്നതിനും കയറ്റിറക്ക് നടത്തുന്നതിനും ജില്ലാ കലക്ടര്‍ അനുമതി നല്‍കി.