ലോക്ക്ഡൗണില് കറങ്ങി നടക്കുന്നവരുടെ ശ്രദ്ധയ്ക്ക് ... റോഡിലൂടെ നടന്നാല് പൊലീസ് പൊക്കുമെന്ന് പേടിച്ച് റെയില്പ്പാളങ്ങളിലൂടെ ട്രെയിനൊന്നും വരില്ലെന്നു കരുതി കയറി നടക്കുന്നവര്ക്ക് മുന്നറിയിപ്പുമായി റെയില്വേ, ചരക്കുവണ്ടികളുടെ എണ്ണം വരും ദിവസങ്ങളില് കൂടാന് സാധ്യത
ലോക്ക് ഡൗണിനെ തുടര്ന്ന് രാജ്യത്തെ റെയില് ഗതാഗതം നിശ്ചലമാണ്. ചരിത്രത്തിലാദ്യമായിരിക്കും തീവണ്ടിപ്പാതകള് ഇത്രയേറെ ദിവസം നിശ്ചലമാകുന്നത്. എന്നാല് ട്രെയിനൊന്നും വരില്ലെന്നു കരുതി റെയില്പ്പാളങ്ങളില്കയറി നടക്കുന്നവര്ക്ക് മുന്നറിയിപ്പുമായി എത്തിയിരിക്കുകയാണ് റെയില്വേ . ലോക്ക് ഡൗണ് കാലത്ത് പാളത്തില് വന്നിരിക്കുന്നവരുടെയും പാളങ്ങളിലൂടെ നടന്നു പോകുന്നവരുടെയും എണ്ണം കൂടിയിട്ടുണ്ടെന്നാണ് റെയില്വേ അധികൃതര് പറയുന്നത്.
റോഡിലൂടെ നടന്നാല് പൊലീസ് പൊക്കുമെന്ന് പേടിച്ച് റെയില്പ്പാളങ്ങളിലൂടെ നടക്കുന്നവരാണത്രെ ഇപ്പോള് കൂടുതലും. പലരും കൂട്ടമായിട്ടാണ് പാളങ്ങളിലൂടെ പോകുന്നത്. എന്നാല് യാത്രാവണ്ടികള്ക്കു മാത്രമാണ് നിരോധനം എന്നും ചരക്കുവണ്ടികളും എന്ജിനിയറിങ് ആവശ്യങ്ങള്ക്കുള്ള ബ്രേക്ക് വാനുകളും എന്ജിനുകളും ഈ പാളങ്ങളിലൂടെ ഇപ്പോഴും ഓടുന്നുണ്ടെന്നും പലര്ക്കും അറിയില്ലെന്നതാണ് സത്യം.
കേരളത്തിലെ റെയില് പാതകളിലൂടെ ദിവസം രണ്ടു ഡിവിഷനുകളിലുമായി 15-നും 20-നും ഇടയില് ചരക്കു തീവണ്ടികള് ഓടുന്നുണ്ട്. സമയക്രമം ഒന്നുമില്ലാതെയാണ് ഈ ചരക്കു ട്രെയിനുകള് ഓടുന്നത്. കോട്ടയംവഴി മാത്രമാണ് ഇപ്പോള് ചരക്കുവണ്ടികള് ഓടിക്കുന്നത്.
മാത്രമല്ല സംസ്ഥാനത്തു നിന്നും ഇതര സംസ്ഥാനങ്ങളിലേക്കു പോയിട്ടുള്ള ദീര്ഘദൂരവണ്ടികള് കാലിയായി മടങ്ങിവരുന്നുമുണ്ട്. ഷൊര്ണൂരില്നിന്നു ദിവസവും രാവിലെ ആറിന് എന്ജിനിയറിങ് ജീവനക്കാരുമായി ഒരു കോച്ചും എന്ജിനും എറണാകുളത്തേക്കുവന്ന് വൈകുന്നേരം 3.30-ന് മടങ്ങുന്നുണ്ട്. തിരുവനന്തപുരം-നാഗര്കോവില് റൂട്ടിലും ഈ സംവിധാനമുണ്ട്.
ചരക്കുവണ്ടികളുടെ എണ്ണം വരുംദിവസങ്ങളില് കൂടാനാണു സാധ്യതയെന്ന് റെയില്വേ അധികൃതര് പറയുന്നു. മുന്നറിയിപ്പില്ലാതെയാണ് ഈ വണ്ടികള് വരിക. അപ്പോള് പാളങ്ങളില് കയറിയാല് അപകടസാധ്യത കൂടുതലാണെന്നും ലംഘനങ്ങള് കണ്ടാല് റെയില്വേ നിയമപ്രകാരമുള്ള ശിക്ഷ നടപ്പാക്കുമെന്നും റെയില്വേ ഉദ്യോഗസ്ഥര് വ്യക്തമാക്കുന്നു.
ലോക്ക് ഡൌണ് കാലത്ത് ഒന്ന് നാടുകണ്ടുകളയാം എന്നും കരുതി പോലീസിന്റെ കണ്ണുവെട്ടിച്ച് റെയില്വേ പാലത്തിലൂടെ നടക്കുന്നവര്ക്കാണ് ഈ മുന്നറിയിപ്പ്. ഇത് അവഗണിക്കേണ്ട ഒന്നല്ല .മുന്നറിയിപ്പില്ലാതെ വരുന്ന ചരക്കു വണ്ടികളും അതുപോലെ കാലിയായ ട്രെയിനുകളും ഒക്കെ ചിലപ്പോള് നിങ്ങളുടെ ജീവന് തന്നെ അത് ഭീഷണിയായി മാറിയേക്കാം..
https://www.facebook.com/Malayalivartha