ക്വാറന്റീന്‍ നിര്‍ദേശം ലംഘിച്ച് കോട്ടയം നഗരത്തില്‍ ബൈക്കില്‍ കറങ്ങിയ യുവാവ് പൊലീസ് പിടിയിലായി. ബെംഗളൂരുവില്‍ ജോലി ചെയ്യുന്ന യുവാവ് 22-നാണ് നാട്ടിലെത്തിയത്. 14 ദിവസം വീട്ടില്‍ തുടരാനായിരുന്നു നിര്‍ദേശം.

കഞ്ഞിക്കുഴിയില്‍ വാഹന പരിശോധന നടത്തിയ പൊലീസ് സംഘത്തിനു മുന്നിലൂടെ 2 തവണ ബൈക്കില്‍ കറങ്ങിയതോടെയാണു പിടി വീണത്. അച്ഛനെ കടയിലെത്തിക്കാനായിരുന്നു ആദ്യത്തെ യാത്ര. ഇതിനുശേഷം വീട്ടിലേക്കു മടങ്ങിയ യുവാവ് വീണ്ടുമെത്തിയതോടെ പൊലീസ് ചോദ്യം ചെയ്തു. ആശുപത്രിയിലെത്തിച്ചു പരിശോധന നടത്തിയതിനുശേഷം ഇയാളെ വീണ്ടും വീട്ടില്‍ നിരീക്ഷണത്തിലാക്കി.

ചോദ്യം ചെയ്യലില്‍ 22-ന് ബെംഗളൂരുവില്‍ നിന്നെത്തിയതാണെന്ന് യുവാവ് സമ്മതിച്ചതിനു ശേഷം പൊലീസ് വിവരമറിയിച്ചതിനെത്തുടര്‍ന്ന് ആംബുലന്‍സ് എത്തി യുവാവിനെ കോട്ടയം ജനറല്‍ ആശുപത്രിയിലേക്കു കൊണ്ടുപോയി. പരിശോധനയില്‍ രോഗലക്ഷണങ്ങളൊന്നും കണ്ടെത്താത്തതിനാലാണു വീട്ടിലേക്കുതന്നെ മാറ്റിയത്.

വീടുകളിലുള്ളവരെ നിരീക്ഷിക്കാന്‍ പൊലീസ് ജിയോ ഫെന്‍സിങ് സംവിധാനം ഉള്‍പ്പെടെ സജ്ജമാക്കിയിരുന്നു. ഇതും വെട്ടിച്ച് യുവാവ് പുറത്തെത്തിയതെങ്ങനെയെന്നും പൊലീസ് പരിശോധിക്കുന്നുണ്ട്.