അപകടത്തില്‍പെട്ട് ഒന്നര മണിക്കൂറോളം വഴിയരികില്‍ കിടന്ന യുവാവ് മരണമടഞ്ഞു
ഇന്നലെ ഹരിപ്പാട് നാരകത്തറയ്ക്കു സമീപം അപകടത്തില്‍പ്പെട്ട താമല്ലാക്കല്‍ അമ്പീത്തറയില്‍ അനീഷ് (26) മരണമടഞ്ഞു.
അനീഷിനെ ഇടിച്ചു തെറിപ്പിച്ച ശേഷം 35 കിലോമീറ്ററോളം പിന്നിട്ട കാര്‍ ആലപ്പുഴയില്‍ വച്ചാണ് പൊലീസ് പിടികൂടിയത്. അപ്പോഴേക്കും അര മണിക്കൂറിലധികം നഷ്ടമായി. പൊലീസിനോട് കള്ളം പറഞ്ഞു രക്ഷപ്പെടാനായിരുന്നു ആദ്യം ഡ്രൈവര്‍ ബാബുവിന്റെ ശ്രമമെന്നു പൊലീസ് പറഞ്ഞു. അപകടത്തില്‍പ്പെട്ടത് അനീഷ് ആണെന്ന് ഡ്രൈവറെ പിടികൂടുന്നതിന് മുമ്പ് കണ്ടെത്തിയെങ്കിലും അപകടമുണ്ടായ സ്ഥലം ഏതെന്ന് അറിയാന്‍ പിന്നെയും സമയം വേണ്ടി വന്നു.
സൗത്ത് എസ്‌ഐ ശ്രീകുമാരക്കുറുപ്പ്, സിവില്‍ പൊലീസ് ഓഫിസര്‍മാരായ സി.ജി.പ്രമോദ്, എസ്. സജീഷ് എന്നിവരുടെ നേതൃത്വത്തില്‍ ഹൈവേ പൊലീസും ഹരിപ്പാട് പൊലീസും താമല്ലാക്കല്‍ മുതല്‍ ദേശീയപാതയുടെ ഇരുവശവും പരിശോധന നടത്തിയാണ് ഒന്നര മണിക്കൂറോളം കഴിഞ്ഞ് നാരകത്തറ ജംക്ഷനു സമീപം കുറ്റിക്കാട്ടില്‍ നിന്ന് അനീഷിനെ കണ്ടെത്തിയത്.അപകടം നടന്ന സ്ഥലത്തിനു സമീപം സ്വകാര്യ ആശുപത്രിയുണ്ടായിരുന്നു. പക്ഷേ പരുക്കേറ്റ യുവാവിനെ ആശുപത്രിയിലെത്തിക്കാന്‍ ഡ്രൈവര്‍ ശ്രമിച്ചില്ല.
ഫൊറന്‍സിക് ഉദ്യോഗസ്ഥര്‍ എത്തി തെളിവുകള്‍ ശേഖരിച്ചു. അപകട സ്ഥലത്തു നിന്നു കാറിന്റെ ഭാഗങ്ങളും കാറിന്റെ ഇടതു ഭാഗത്തു നിന്നു മുടിയും രക്തത്തിന്റെ അംശവും ശേഖരിച്ചു. ഇടിയുടെ ആഘാതത്തില്‍ അനീഷ് തെറിച്ച് കാറിന്റെ മുന്നിലെ ചില്ലിലേക്കും തുടര്‍ന്നു റോഡരികിലെ കുറ്റിക്കാട്ടിലേക്കും വീഴുകയായിരുന്നെന്നു കരുതുന്നതായി പൊലീസ് പറഞ്ഞു.
നിയന്ത്രണങ്ങള്‍ ഉള്ളതിനാല്‍ റോഡില്‍ ആളുകളും വാഹനങ്ങളും കുറവായതിനാല്‍ അപകടം ആരും കാണാന്‍ സാധ്യതയില്ലെന്ന വിചാരമാണ് കാര്‍ നിര്‍ത്താതെ പോകാന്‍ ഡ്രൈവറെ പ്രേരിപ്പിച്ചതെന്നാണ് കരുതുന്നത്. അപകടം കഴിഞ്ഞ് ഒന്നര മണിക്കൂറോളം കഴിഞ്ഞ് വഴിയരികില്‍ നിന്നു കണ്ടെത്തി ആശുപത്രിയിലെത്തിക്കുമ്പോഴേക്കും മരണം സംഭവിച്ചു. അപകടം നടന്നയുടന്‍ ആശുപത്രിയിലെത്തിച്ചിരുന്നെങ്കില്‍ ചിലപ്പോള്‍ വിലപ്പെട്ട ഒരു ജീവന്‍ രക്ഷിക്കാനായേനെ.
https://www.facebook.com/Malayalivartha
