നഗരസഭാ ജീവനക്കാര്‍ പൊലീസ് കന്റീന്‍ പൂട്ടിക്കാന്‍ എത്തി; അവര്‍ക്കെതിരെ ജാമ്യമില്ലാ വകുപ്പ് പ്രകാരം കേസ്
കായംകുളം സ്റ്റേഷനിലെ പൊലീസുദ്യോഗസ്ഥരും നഗരസഭാ ആരോഗ്യ വിഭാഗം ഉദ്യോഗസ്ഥരും തമ്മില്‍ കഴിഞ്ഞ ദിവസം ഗൗരവകരമായ സംഘര്‍ഷം ഉണ്ടായി.
പോലീസ് കന്റീന്‍ നഗരസഭാ ആരോഗ്യ വിഭാഗം ഉദ്യോഗസ്ഥര്‍ പൂട്ടിക്കാന്‍ എത്തിയതിനെ തുടര്‍ന്നായിരുന്നു് സംഘര്‍ഷം. പൊലീസിന്റെ കൃത്യനിര്‍വഹണം തടസ്സപ്പെടുത്തിയതിന് 4 നഗരസഭാ ജീവനക്കാര്‍ക്കെതിരെ ജാമ്യമില്ലാ വകുപ്പ് പ്രകാരം കേസ് എടുത്തു. ഒടുവില്‍ നഗരസഭാ സെക്രട്ടറി ഡിവൈസ്പിയുമായി നടത്തിയ ചര്‍ച്ചയെ തുടര്‍ന്ന് ജീവനക്കാരെ വൈദ്യപരിശോധനയ്ക്കു ശേഷം വിട്ടയച്ചു.
ഇന്നലെ പന്ത്രണ്ടരയോടെയാണ് നഗരസഭാ ചെയര്‍മാന്‍ എന്‍.ശിവദാസന്റെ നിര്‍ദേശപ്രകാരം കന്റീന്‍ പൂട്ടിക്കാന്‍ നഗരസഭാ ആരോഗ്യ വിഭാഗം ഉദ്യോഗസ്ഥര്‍ എത്തിയത്. കഴിഞ്ഞ ദിവസം ഹെല്‍മറ്റും മാസ്‌കും വയ്ക്കാതെ ബൈക്കില്‍ സഞ്ചരിച്ച നഗരസഭാ അധ്യക്ഷന്‍ എന്‍.ശിവദാസനെ സിഐയുടെ നേതൃത്വത്തിലുള്ള പൊലീസ് പിടികൂടി 500 രൂപ പിഴ ഈടാക്കിയിരുന്നു. ഇതിന്റെ വിരോധത്തിലാണ് നഗരസഭയുടെ പരിശോധനയെന്ന് ആരോപണമുയര്‍ന്നു.
ഇവര്‍ കന്റീന്‍ ജീവനക്കാരുമായി തര്‍ക്കത്തിലായി. വിവരമറിഞ്ഞ് സ്റ്റേഷനിലുണ്ടായിരുന്ന പൊലീസുകാര്‍ എത്തിയതോടെ ഉന്തും തള്ളുമായി. ഒടുവില്‍ പൊലീസിന്റെ ജോലി തടസ്സപ്പെടുത്താന്‍ ശ്രമിച്ചതിന് ആരോഗ്യ വിഭാഗം ഉദ്യോഗസ്ഥരെ പൊലീസ് കസ്റ്റഡിയിലെടുത്തു. തുടര്‍ന്ന് നഗരസഭാ സെക്രട്ടറി ആര്‍.രാജേഷ് ഡിവൈസ്പിയുമായി ചര്‍ച്ച ചെയ്ത് പ്രശ്‌നം പരിഹരിക്കുകയായിരുന്നു.
നേരത്തെ കുടുംബശ്രീ നടത്തിയിരുന്ന കന്റീന്‍ പൊലീസുകാര്‍ ചേര്‍ന്നാണ് ഇപ്പോള്‍ നടത്തുന്നത്. അനുവാദമില്ലാതെയാണ് കന്റീന്‍ പ്രവര്‍ത്തിക്കുന്നതെന്ന് നഗരസഭയ്ക്ക് പരാതി ലഭിച്ചതിനെ തുടര്‍ന്നാണ് പരിശോധന നടത്തിയതെന്ന് ചെയര്‍മാന്‍ എന്‍.ശിവദാസന്‍ പറഞ്ഞു. ആരോഗ്യ വിഭാഗം ഉദ്യോഗസ്ഥരായ ഗീത, കൃഷ്ണകുമാര്‍, സലിം എന്നിവരാണ് പരിശോധനയ്ക്ക് എത്തിയത്. ഇവര്‍ക്കും വാഹനത്തിന്റെ ഡ്രൈവര്‍ക്കും എതിരെ കേസെടുത്തു.
https://www.facebook.com/Malayalivartha
