കാസര്‍കോട് മലയാളികള്‍ ചികിത്സ കിട്ടാതെ മരിക്കാന്‍ കാരണം കേരളം തന്നെയെന്ന് പഴിച്ച് കാസര്‍കോട് ജില്ല; മംഗലാപുരത്തെ ആശ്രയിച്ച് കഴിയുന്ന കാസര്‍കോട്ട് വികസനം എത്തിക്കുന്നതില്‍ കേരളത്തിന് വീഴ്ചപറ്റിയെന്നും ആരോപണം
കര്‍ണാടകം അതിര്‍ത്തി അടച്ചപ്പോള്‍ മലയാളികള്‍ ചികിത്സ കിട്ടാതെ മരിക്കാന്‍ കാരണം കേരളം തന്നെയെന്ന് പഴിച്ച് കാസര്‍കോട് ജില്ല. ഏഴ് ജീവനുകളാണ് കാസര്‍കോട് നഷ്ടമായത്. തലപ്പാടി ടോള്‍ബൂത്തിന് സമീപം കേരളത്തിന്റെ വാഹനങ്ങള്‍ കര്‍ണാടക പോലീസ് തടയാന്‍ തുടങ്ങിയത് ലോക്കൗട്ട് പ്രഖ്യാപിച്ച ദിവസമാണ്. കര്‍ണാടകത്തിലെക്കുള്ള എല്ലാ വഴികളും കര്‍ണാടകം മണ്ണിട്ട് അടച്ചു. അതിര്‍ത്തി രോഗികള്‍ക്ക് വേണ്ടിയെങ്കിലും തുറന്നു കൊടുക്കണമെന്ന് ഹൈക്കോടതിയും സര്‍ക്കാരും ആവശ്യപ്പെട്ടിട്ടും തുറന്നില്ല.
കേരളം സംസ്ഥാനമാനം രൂപീകരിക്കുന്നതിന് മുമ്പ് മഞ്ചേശ്വരം, കാസര്‍കോട്, ഹോസ്ദുര്‍ഗ് പ്രദേശങ്ങള്‍ ദക്ഷിണ കന്നഡയിലായിരുന്നു.സംസ്ഥാനം രൂപീകരിച്ച ശേഷവും കേരളത്തെക്കാളെറെ കാസര്‍കോട്ടുകാര്‍ ആശ്രയിച്ചിരുന്നത് മംഗലാപുരത്തെയാണ്. മംഗലാപുരത്തെ ആശ്രയിച്ച് കഴിയുന്ന കാസര്‍കോട്ട് വികസനം എത്തിക്കുന്ന കാര്യത്തില്‍ കേരളം മറനു പോയി. അതിന്റെ ഫലമാണ് കാസര്‍കോടുകാര്‍ ഇപ്പോള്‍ അനുഭവിക്കുന്നത്.
ഒരു നല്ല ആശുപത്രിയോ മികച്ച വിദ്യാഭ്യാസ സ്ഥാപനങ്ങളോ കാസര്‍ക്കോടിന് അനുവദിക്കാന്‍ കേരളം ശ്രമിച്ചില്ല. പകരം എന്‍ഡോസള്‍ഫാന്‍ തളിച്ച് കാസര്‍കോടിനെ ഒരു ദുരന്ത ഭൂമിയാക്കാനാണ് കേരളം ശ്രമിച്ചത്. എന്നിട്ട് എന്‍ഡോസള്‍ഫാന്‍ ഇരകള്‍ക്ക് നീതി നല്‍കിയതുമില്ല.
കേരളത്തിന്റെ അനാസ്ഥ ശരിക്കും മുതലെടുത്തത് കര്‍ണാടകവും മംഗലാപുരവുമാണ്. മംഗലാപുരത്ത് കാസര്‍കോടിനെ ആശ്രയിച്ച് നിരവധി സ്വകാര്യ ആശുപത്രികള്‍ ഉയര്‍ന്നുപൊങ്ങി. അവര്‍ ലക്ഷ്യമിട്ടത് മുഴുവന്‍ മലയാളികളെയാണ്. ഇതു വഴി കോടികളാണ് ഇവര്‍ സമ്പാദിച്ചത്. അവരാണ് ഇപ്പോള്‍ കേരളത്തില്‍ നേരേ മുഖം തിരിച്ചു നില്‍ക്കുന്നത്.
ഏതാനും വര്‍ഷങ്ങള്‍ക്ക് മുമ്പ് മാത്രം അനുവദിച്ച കാസര്‍കോട് സര്‍ക്കാര്‍ മെഡിക്കല്‍ കോളേജ് ളക്കിനടുക്കയാലാണ് പ്രവര്‍ത്തനം ആരംഭിക്കുന്നത്. ഇത് കര്‍ണാടകത്തോട് ചേര്‍ന്ന അതിര്‍ത്തി പ്രദേശമാണ്. ഇവിടെ നിന്നും 15 കിലോമീറ്റര്‍ മാത്രം സഞ്ചരിച്ചാല്‍ കര്‍ണാടകമായി. മെഡിക്കല്‍ കോളേജ് വന്നാലും ജനങ്ങള്‍ തങ്ങളെ തന്നെ ആശ്രയിക്കുമെന്നാണ് മംഗലാപുരത്തെ ആശുപത്രി അധിക്യതര്‍ അറിയുന്നത്. കേന്ദ്ര സര്‍വകലാശാലയോട് ചേര്‍ന്ന് ഒരു മെഡിക്കല്‍ കോളേജ് സ്ഥാപിക്കണമെന്ന ആവശ്യം അംഗീകരിക്കപ്പെട്ടില്ല. അതിന് കാരണം സംസ്ഥാനത്തെ രാഷ്ട്രീയ നേതൃത്വത്തിന്റെ അനാസ്ഥ തന്നെയാണ്.
കേരളം എക്കാലവും അവഗണിച്ച ജില്ലയാണ് തങ്ങളുടേതെന്ന് കാസര്‍കോടുകാര്‍ പറയുന്നത് വെറുതെയല്ല. സര്‍ക്കാര്‍ ജീവനകാര്‍ക്ക് കാസര്‍കോട്ടേക്ക് സ്ഥലം മാറ്റം കിട്ടിയാല്‍ അത് ശിക്ഷാനടപടിയുടെ ഭാഗമാണെന്ന് കരുതുന്നവരാണ് ഭൂരിപക്ഷവും. കാസര്‍കോടുള്ള ജനപ്രതിനിധികള്‍ പോലും വിവിധ ആവശ്യങ്ങള്‍ക്ക് ആശ്രയിക്കുനത് കര്‍ണാടകത്തെയാണ്. ഒരു ജില്ലയെ തീര്‍ത്തും അവഗണിച്ച ശേഷം മറ്റ് സംസ്ഥാനങ്ങളെ ആശ്രയിക്കുന്നതിലെ നിരര്‍ത്ഥകതയാണ് കാസര്‍കോടുകാര്‍ ചൂണ്ടികാണിക്കുന്നത്.
"
https://www.facebook.com/Malayalivartha
