കോവിഡ് പ്രതിസന്ധി മറികടക്കാന്‍ സംസ്ഥാന സര്‍ക്കാരിനു കീഴിലെ വിവിധ ക്ഷേമനിധി അംഗങ്ങള്‍ക്കു സഹായപദ്ധതി പ്രഖ്യാപിച്ചു. ധനസഹായവും പലിശരഹിത വായ്പയും ബോണസും ഉള്‍പ്പെടെ ആനുകൂല്യങ്ങളാണു പ്രഖ്യാപിച്ചത്. ആനുകൂല്യങ്ങള്‍ 40 ലക്ഷത്തിലേറെ വരുന്ന തൊഴിലാളികള്‍ക്ക് പ്രയോജനം ചെയ്യുന്നതാണ്.

കേരള നിര്‍മാണത്തൊഴിലാളി ക്ഷേമനിധി ബോര്‍ഡ്: 200 കോടിയുടെ സഹായ പാക്കേജ്. ബോര്‍ഡില്‍ റജിസ്റ്റര്‍ ചെയ്ത് 2 വര്‍ഷം പൂര്‍ത്തിയാക്കിയവരും 2018 ല്‍ റജിസ്‌ട്രേഷന്‍ പുതുക്കിയതുമായ എല്ലാ തൊഴിലാളി കുടുംബങ്ങള്‍ക്കും 1000 രൂപ സഹായം നല്‍കും.

കേരള ഷോപ്‌സ് ആന്‍ഡ് കൊമേഴ്‌സ്യല്‍ എസ്റ്റാബ്ലിഷ്‌മെന്റ് തൊഴിലാളി ക്ഷേമനിധി ബോര്‍ഡ്: സ്വയം തൊഴില്‍ ചെയ്യുന്നവര്‍ക്കും ആശുപത്രി, പെട്രോള്‍ പമ്പ്, ഗ്യാസ് ഏജന്‍സി എന്നീ മേഖലകളിലെ തൊഴിലാളികള്‍ക്കും 1000 രൂപ വീതം ആശ്വാസ ധനം. കോവിഡ് ബാധിതര്‍ക്ക് 10,000 രൂപ സഹായം. ഐസലേഷനില്‍ കഴിയുന്നവര്‍ക്ക് 5000 രൂപ.

കേരള കര്‍ഷക തൊഴിലാളി ക്ഷേമനിധി ബോര്‍ഡ്: കൊറോണ ബാധിതരായ അംഗങ്ങള്‍ക്ക് 7500 രൂപയുടെ അടിയന്തര സഹായവും ഐസലേഷനില്‍ കഴിയുന്ന അംഗങ്ങള്‍ക്ക് 1000 രൂപ സഹായവും.

കൈത്തറി തൊഴിലാളി ക്ഷേമനിധി ബോര്‍ഡ്: 750 രൂപ വീതം സഹായം.

ബീഡി-ചുരുട്ടു തൊഴിലാളി ക്ഷേമനിധി ബോര്‍ഡ്: ഇന്‍കം സപ്പോര്‍ട്ട് സ്‌കീമില്‍ 2 കോടി രൂപയുടെ സഹായം.

അബ്കാരി തൊഴിലാളി ക്ഷേമനിധി ബോര്‍ഡ്: അടച്ച ബാറുകളിലെ തൊഴിലാളികള്‍ക്ക് 5000 രൂപ ധനസഹായം, 10,000 രൂപ പലിശരഹിത വായ്പ.

മോട്ടര്‍ തൊഴിലാളി ക്ഷേമനിധി ബോര്‍ഡ്: സ്റ്റേജ് ക്യാരേജ്/കോണ്‍ട്രാക്റ്റ് കാര്യേജ്, ബസ് തൊഴിലാളികള്‍ക്ക് 5000 രൂപ, ഗുഡ്‌സ് വെഹിക്കിള്‍ തൊഴിലാളികള്‍ക്ക് 3500 രൂപ, ടാക്‌സി തൊഴിലാളികള്‍ക്ക് 2500 രൂപ. ഓട്ടോറിക്ഷ / ട്രാക്ടര്‍ തൊഴിലാളികള്‍ക്ക് 2000 രൂപ. ഓട്ടമൊബീല്‍ വര്‍ക്ക് ഷോപ്പ് തൊഴിലാളികള്‍ക്ക് 1000 രൂപ.

കേരള കള്ളു വ്യവസായ തൊഴിലാളി ക്ഷേമനിധി ബോര്‍ഡ്: പലിശരഹിത വായ്പയായി 10,000 രൂപ വീതം. ലോക്ഡൗണ്‍ നീണ്ടുപോകുന്ന സാഹചര്യമുണ്ടായാല്‍ 5000 രൂപ കൂടി പ്രത്യേക വായ്പ.

ചുമട്ടുതൊഴിലാളി ക്ഷേമനിധി ബോര്‍ഡ്: വേതനം മുന്‍കൂര്‍ ആയി അനുവദിക്കും. 14 ന് അകം ബോണസ് ഇനത്തില്‍ 30 കോടി രൂപ വിതരണം ചെയ്യും.