മണ്ണൂര്‍ പാറക്കടവ് പാലം 3 ആഴ്ചത്തെ അടച്ചിടലിനു ശേഷം 8-ാം തീയതി വൈകിട്ടു ഗതാഗതത്തിനു തുറന്നതിനു ശേഷം ശനിയാഴ്ച വൈകിട്ട് പൊലീസ് ഇടപെട്ടു വീണ്ടും അടച്ചിരുന്നു. ഇതുവഴിയുള്ള വാഹനത്തിരക്ക് മുന്നില്‍ കണ്ടായിരുന്നു നടപടി. കാല്‍നട യാത്രക്കാര്‍ക്ക് പോകാന്‍ സൗകര്യം ഒരുക്കി ബാരിക്കേഡ് ആയി ബോര്‍ഡും വീപ്പയുമായിരുന്നു സ്ഥാപിച്ചത്.

എന്നാല്‍ പുലര്‍ച്ചെ എത്തിയ അജ്ഞാത സംഘം ഇവയെല്ലാം നീക്കി പുഴയിലേക്ക് വലിച്ചെറിഞ്ഞതായി കണ്ടു. പാലത്തില്‍ സ്ഥാപിച്ച തടസ്സങ്ങള്‍ പൊളിച്ചു നീക്കിയത് പുല്ലിപ്പറമ്പ് ഭാഗത്തുള്ളവരാണ് എന്നാണ് പൊലീസ് നിഗമനം. മൊബൈല്‍ ടവര്‍ കേന്ദ്രീകരിച്ചു അന്വേഷണം നടത്തുമെന്നു ഫറോക്ക് ഇന്‍സ്‌പെക്ടര്‍ കെ.കൃഷ്ണന്‍ പറഞ്ഞു. പാലത്തിനു സമീപം പൊലീസ് പിക്കറ്റ് പോസ്റ്റ് പുനഃസ്ഥാപിച്ചു പരിശോധന കര്‍ശനമാക്കാനാണ് നീക്കം. ഇക്കഴിഞ്ഞ 17-മുതലാണ ലോക്ഡൗണ്‍ നിര്‍ദേശങ്ങളുടെ ഭാഗമായി വാഹന ഗതാഗതം പരിമിതപ്പെടുത്താന്‍ കോഴിക്കോട് ജില്ലാ അതിര്‍ത്തിയിലെ 4 പാലങ്ങളും 7 റോഡുകളും അടച്ചത്.

പാറക്കടവ് പാലത്തിനു പുറമേ കോഴിക്കോട്-മലപ്പുറം ജില്ലകള്‍ അതിരിടുന്ന രാമനാട്ടുകര സില്‍ക് പാലം, പെരുമുഖം പുല്ലിക്കടവ്, മണ്ണൂര്‍ മുക്കത്ത്കടവ് പാലങ്ങളും അടച്ചിരുന്നു. ഇതില്‍ സില്‍ക് പാലം കഴിഞ്ഞ ദിവസം ഗതാഗതത്തിനു തുറന്നു കൊടുത്തിട്ടുണ്ട്.