കൊവിഡിന്റെ പശ്ചാത്തലത്തില് തിരിച്ചടി നേരിട്ട ഇന്ത്യന് സമ്പദ് വ്യവസ്ഥയെ ശക്തിപ്പെടുത്തുന്നതിനായി ബാങ്കുകള്ക്ക് മുന്നില് പുതിയ ആവശ്യവുമായി കേന്ദ്രസര്ക്കാര്... ചെറുകിട വ്യാപാരികള്ക്ക് 7.5 ശതമാനം മുതല് എട്ട് ശതമാനം വരെ പലിശയ്ക്ക് വായ്പ ലഭ്യമാക്കാന് ശ്രമം
കൊവിഡിന്റെ പശ്ചാത്തലത്തില് തിരിച്ചടി നേരിട്ട ഇന്ത്യന് സമ്പദ് വ്യവസ്ഥയെ ശക്തിപ്പെടുത്തുന്നതിനായി ബാങ്കുകള്ക്ക് മുന്നില് പുതിയ ആവശ്യവുമായി കേന്ദ്രസര്ക്കാര്. രാജ്യത്തെ ചെറുകിട വ്യാപാരികള്ക്ക് 7.5 ശതമാനം മുതല് എട്ട് ശതമാനം വരെ പലിശയ്ക്ക് വായ്പ ലഭ്യമാക്കാനാണ് ശ്രമം.
സാമ്പത്തിക ഞെരുക്കത്തിലായ വ്യാപാരികള്ക്ക് പരമാവധി വായ്പാ സഹായമാണ് കേന്ദ്രം ലക്ഷ്യമിടുന്നത്. പരമാവധി കുറഞ്ഞ വായ്പാ പലിശ നിരക്കിന് വേണ്ടി ബാങ്കുകളുമായി ചര്ച്ച നടത്തുകയാണ് കേന്ദ്രസര്ക്കാരിന്റെ പ്രതിനിധികള്.
കൊവിഡിന്റെ സാമ്പത്തിക പാക്കേജ് പ്രഖ്യാപിച്ച ഘട്ടത്തില് തന്നെ ചെറുകിട -ഇടത്തരം കച്ചവട സ്ഥാപനങ്ങള്ക്ക് പരമാവധി വായ്പാ സഹായം ലഭ്യമാക്കുമെന്ന് കേന്ദ്രസര്ക്കാര് പറഞ്ഞിരുന്നു. ഇതിന്റെ ഭാഗമായാണ് ചര്ച്ചകള് പുരോഗമിക്കുന്നത്. അതെ സമയം ജിഎസ്ടി കൗണ്സിലിന്റെ സുപ്രധാന യോഗം ജൂണ് 12 ന് ചേരും. മൂന്ന് മാസത്തിലൊരിക്കല് കൗണ്സില് ചേരണമെന്നാണ് വ്യവസ്ഥ. കഴിഞ്ഞ ജിഎസ്ടി കൗണ്സില് യോഗം മാര്ച്ച് 14 നാണ് നടന്നത്. കൊവിഡ് പ്രതിസന്ധി രൂക്ഷമായ ശേഷമുളള ആദ്യ കൗണ്സില് യോഗം എന്ന നിലയില് ഇത് ഏറെ നിര്ണായകമാണ്.
ലോക്ക്ഡൗണിലെ ധനകാര്യ പ്രതിസന്ധികളും കൊവിഡിന് ശേഷമുളള വ്യവസായ രംഗത്തിന്റെ തിരിച്ചുവരവും യോഗത്തില് ചര്ച്ചയായേക്കും. ജിഎസ്ടി നഷ്ടപരിഹാര വിതരണം സംബന്ധിച്ച് സംസ്ഥാനങ്ങളും കേന്ദ്ര സര്ക്കാരും തമ്മിലുളള തര്ക്കങ്ങളും യോഗത്തില് ഉയരുമെന്നുറപ്പാണ്. വിപണിയില് നിന്ന് വായ്പയെടുത്ത് നഷ്ടപരിഹാര വിതരണം നടത്തുന്ന കാര്യം ആലോചിക്കുമെന്ന് കഴിഞ്ഞ യോഗത്തില് ധനമന്ത്രി വ്യക്തമാക്കിയിരുന്നു. ഇതില് തുടര്ച്ച ചര്ച്ചകളുണ്ടായേക്കും.
ജിഎസ്ടി നികുതി ഘടന പരിഹരിക്കുന്നത് സംബന്ധിച്ച് വ്യവസായ ഫെഡറേഷനുകളും സംഘടനകളും ഉയര്ത്തുന്ന ആവശ്യം പരിഗണിക്കാന് ഇടയില്ല. കഴിഞ്ഞ മൂന്ന് മാസത്തിനിടയ്ക്ക് വലിയ തോതില് നികുതി വരുമാനത്തില് ഇടിവ് രേഖപ്പെടുത്തിയ സാഹചര്യത്തില് ഒരു നികുതി പരിഷ്കരണം സര്ക്കാരിന്റെ പരിഗണനയില് ഇല്ല. കഴിഞ്ഞ വര്ഷത്തെ നഷ്ടപരിഹാരമായി ഇതുവരെ മൊത്തം 1,51,496 കോടി രൂപയാണ് കേന്ദ്ര സര്ക്കാര് സംസ്ഥാനങ്ങള്ക്ക് വിതരണം ചെയ്തിട്ടുളളത്. കഴിഞ്ഞ ദിവസം വിതരണം ചെയ്ത 36,400 കോടി ഉള്പ്പെടയുളള കണക്കാണിത്.
ജിഎസ്ടി വരുമാനത്തിന്റെ കാര്യത്തില് സംസ്ഥാനങ്ങളും കേന്ദ്ര സര്ക്കാരും തുല്യ ദു:ഖിതരാണ്. കഴിഞ്ഞ മൂന്ന് മാസമായി ജിഎസ്ടി വരുമാന വരവില് വന് ഇടിവാണ് സംസ്ഥാനങ്ങള്ക്കും കേന്ദ്ര സര്ക്കാരിനും ഉണ്ടായിട്ടുളളത്. ജിഎസ്ടി സെസിലൂടെ ലഭിക്കുന്ന തുക മാത്രമേ സംസ്ഥാനങ്ങള്ക്ക് നഷ്ടപരിഹാരമായി നല്കുകയൊള്ളു എന്ന ധനമന്ത്രിയുടെ ബജറ്റിലെ പ്രഖ്യാപനം സംസ്ഥാനങ്ങള് അംഗീകരിച്ചിട്ടില്ല. കൊവിഡ് ധന -ആരോഗ്യ പ്രതിസന്ധി നിലനില്ക്കുന്നതിനാല് ഇക്കാര്യത്തില് കൂടുതല് തര്ക്കങ്ങളിലേക്ക് തല്ക്കാലം നീങ്ങാന് സാധ്യത കുറവാണ്.
ജിഎസ്ടി നഷ്ടപരിഹാര വിതരണ കാലവധി 2022 ഓടെ അവസാനിക്കും. ഈ കാലാവധി നീട്ടണമെന്നാണ് ഏറെ നാളായി സംസ്ഥാനങ്ങള് ആവശ്യപ്പെടുന്നത്. എന്നാല്, ഈ ആവശ്യം ധനകാര്യ കമ്മീഷന് അംഗീകരിക്കാന് തയ്യാറല്ല. നഷ്ടപരിഹാരം നല്കുന്നത് സംബന്ധിച്ച മന്ത്രിമാരുടെ സമിതി നല്കുന്ന ശുപാര്ശ യോഗം ചര്ച്ച ചെയ്തേക്കും. 2017 ഓഗസ്റ്റ് മുതല് 2019 ജനുവരി വരെയുളള നികുതി തിരിച്ചടവില് വിവിധ വിഭാഗങ്ങള് വരുത്തിയ പിഴ തിരിച്ചു നല്കുന്നതില് കൗണ്സില് അന്തിമ തീരുമാനം എടുക്കുമെന്നാണ് ലഭിക്കുന്ന സൂചന.
https://www.facebook.com/Malayalivartha