ടാങ്കര്‍ ലോറിയില്‍നിന്ന് പെട്രോള്‍ ചോര്‍ച്ച... കോട്ടയത്ത് ടാങ്കര്‍ ലോറിയില്‍ നിന്ന് പെട്രോള്‍ ചോര്‍ന്നു, ഡ്രൈവറുടെ സമയോചിത ഇടപെടല്‍ വന്‍ ദുരന്തം ഒഴിവായി
കോട്ടയം നഗരത്തില്‍ ആശങ്ക വിതച്ച് ടാങ്കര്‍ ലോറിയില്‍നിന്ന് പെട്രോള്‍ ചോര്‍ച്ച. ഡ്രൈവറുടെ സമയോചിത ഇടപെടലില്‍ ദുരന്തം ഒഴിവായി. ഇരുമ്പനത്തുനിന്ന് ഇന്ധനവുമായി നെയ്യാറ്റിന്‍കരയിലേക്ക് പോകുകയായിരുന്നു ലോറി ഇന്നലെ രാവിലെ 11ഓടെ കോട്ടയം നഗരത്തിലെത്തിയപ്പോഴായിരുന്നു സംഭവം നടന്നത്. ചോര്‍ച്ച സമീപത്തുകൂടി പോകുകയായിരുന്ന ബൈക്ക് യാത്രക്കാരന്റെ ശ്രദ്ധയില്‍പ്പെടുകയും ഇയാള്‍ വിവരം ഡ്രൈവറെ അറിയിക്കുകയായിരുന്നു. ഉടന്‍ തന്നെ വിജനമായ നാഗമ്പടം ക്ഷേത്രമൈതാനത്തേക്ക് ലോറി എത്തിച്ച് വിവരം കോട്ടയം ഫയര്‍ഫോഴ്‌സില്‍ അറിയിച്ചു. ലോറിയുടെ അടുത്തേക്ക് ആരും എത്തരുതെന്നും ലോറി ഓടിച്ചിരുന്ന അങ്കമാലി സ്വദേശിയായ എല്‍ദോ മുന്നറിയിപ്പ് നല്‍കി.
മൂന്ന് അറകളുള്ള ടാങ്കര്‍ ലോറിയുടെ ആദ്യ അറയില്‍ പെട്രോളും മറ്റ് രണ്ട് അറകളില്‍ ഡീസലുമായിരുന്നു. മൊത്തം 12,000 ലീറ്റര്‍ ഇന്ധനമായിരുന്നു ലോറിയിലുണ്ടായിരുന്നത്. ഇതില്‍ പെട്രോള്‍ സൂക്ഷിച്ച ആദ്യ അറയുടെ വാല്‍വില്‍ നിന്നുമാണ് പെട്രോള്‍ ചോര്‍ന്നത്. ഫയര്‍ഫോഴ്‌സ് അധികൃതരെത്തി എം സീല്‍ ഉപയോഗിച്ച് ചോര്‍ച്ച തടയാന്‍ ശ്രമിച്ചെങ്കിലും അതിനു കഴിഞ്ഞില്ല. ഇതോടെ പെട്രോള്‍ മറ്റൊരു ടാങ്കര്‍ ലോറിയിലേക്ക് മാറ്റാന്‍ ഹിന്ദുസ്ഥാന്‍ പെട്രോളിയം ഏരിയ മാനേജര്‍ ഇ.ഡി. ദീപക്കും ജില്ല ഫയര്‍ ഓഫിസര്‍ ഷിനോയിയും ചേര്‍ന്ന് തീരുമാനിച്ചു. ഇതിനായി ചിങ്ങവനത്തുനിന്ന് ടാങ്കര്‍ ലോറിയും ഇരുമ്പനത്തുനിന്ന് ഇന്ധനം മാറ്റാനാവശ്യമായ സാധനസാമ്രഗികളും എത്തിക്കാന്‍ തീരുമാനിച്ചു. ഉച്ചക്കുശേഷം ഇരുമ്പനത്തു നിന്നെത്തിയ ഉപകരണങ്ങളുടെ സഹായത്തോടെ പെട്രോള്‍ പൂര്‍ണമായും മറ്റൊരു ടാങ്കറിലേക്ക് മാറ്റി.
വൈകുന്നേരം അഞ്ചരയോടെയാണ് ഇത് പൂര്‍ത്തിയായത്. ഇതുവരെ ടാങ്കര്‍ ലോറിയിലേക്ക് നിശ്ചിത ഇടവേളകളില്‍ വെള്ളവും ഫോം കോമ്പൗണ്ടും (സോപ്പ് കലര്‍ന്ന വെള്ളം) ഫയര്‍ഫോഴ്‌സ് സ്‌പ്രേ ചെയ്തുവരുകയായിരുന്നു.ആരെയും മൈതാനത്തേക്ക് പ്രവേശിപ്പിച്ചുമില്ല. പിന്നീട് രണ്ടുടാങ്കറുകളും നെയ്യാറ്റിന്‍കരയിലേക്ക് പോയി. എക്‌സ്‌കവേറ്ററും ഫയര്‍ഫോഴ്‌സ് സംഘവും സ്ഥലത്തെത്തിയിരുന്നു.
"
https://www.facebook.com/Malayalivartha
