മേലുദ്യോഗസ്ഥർക്കുണ്ടായ പാളിച്ചകൾ മൂലവും കോഴിക്കോട്ട് പോലീസുകാർക്ക് കോവിഡ് വ്യാപിച്ചെന്ന് ആക്ഷേപം. തുടക്കത്തിൽ സ്വീകരിച്ച മുൻകരുതലിലും രോഗപ്രതിരോധ പ്രവർത്തനങ്ങളിലും പിന്നീട് അയഞ്ഞിരുന്നു. ഇതിനെത്തുടർന്നായിരുന്നു പോലീസുകാർക്കിടയിൽ രോഗ ബാധിതരുടെ എണ്ണം കൂടിയത്.

പോലീസുകാരുടെ ആരോഗ്യരക്ഷ മുൻനിർത്തി ഡി.ജി.പി ലോക്​നാഥ്​ ബെഹ്​റ പുറപ്പെടുവിച്ച ഉത്തരവ്​ കാര്യക്ഷമമായി നടപ്പാക്കാത്തതും വെല്ലുവിളിയായി. പകുതിപേർക്ക്​ ജോലി, -പകുതിപേർക്ക്​ വിശ്രമം, അമ്പതുകഴിഞ്ഞവർക്ക്​ ഫീൽഡ്​ ഡ്യൂട്ടി നൽകരുത്​ എന്നതടക്കമുള്ള നിർദേശമാണ്​ കർശനമായി നടപ്പാക്കാതിരുന്നത്​.

ഡി.ജി.പിയുടെ ഉത്തരവ്​ സിറ്റി, റൂറൽ പൊലീസ്​ മേധാവിമാർ സ്​റ്റേഷൻ ഹൗസ്​ ഓഫിസർമാർക്ക്​ (എസ്​.എച്ച്​.ഒ) കൈമാറിയെങ്കിലും കാര്യക്ഷമമായി നടപ്പാക്കുന്നുണ്ടോ എന്ന്​ പരിശോധിച്ചില്ല. ആവശ്യത്തിന്​ ജീവനക്കാരില്ലാത്തതിനാൽ ഉത്തരവുകൾ നടപ്പാക്കാനുള്ള പ്രായോഗിക ബുദ്ധിമുട്ടുകൾ​ ചില എസ്​.എച്ച്​.ഒമാർ ചൂണ്ടിക്കാട്ടിയെങ്കിലും മേലുദ്യോഗസ്​ഥർ ബദൽ മാർഗങ്ങളൊന്നും നിർദേശിച്ചില്ലെന്നും പരാതിയുണ്ട്.
​
സന്നദ്ധ സംഘടനകളും ഏജൻസികളും നൽകിയ മാസ്​ക്​​, ​ഫേസ്​ ഷീൽഡ്​ എന്നിവ സേനാംഗങ്ങൾക്ക്​ എത്തിക്കുകയല്ലാതെ കണ്ടെയ്​ൻമെൻറ്​ സോണിലടക്കമുള്ള ഡ്യൂട്ടി ഓഫിസർമാർക്ക്​ വേണ്ട സുരക്ഷ ഉറപ്പാക്കാൻ മേലുദ്യോഗസ്​ഥർ ജാഗ്രത പുലർത്തിയില്ല.

ഇടുക്കി സ്പെഷൽബ്രാഞ്ച് എസ്.ഐ വി.പി. അജിതൻ കോവിഡ്​ ബാധിച്ച്​ മരിച്ചത്​ ചർച്ചയായതോടെയാണ്​ നടപടികൾ അൽപമെങ്കിലും കാര്യക്ഷമമാ​ക്കിയതെന്നും ഇവർ ചൂണ്ടിക്കാട്ടുന്നു. വിജിലന്‍സ്, റൂറൽ എസ്​.പി ഓഫിസ്​, തിരുവമ്പാടി, താമരശ്ശേരി, ബേപ്പൂർ പൊലീസ്​ സ്​റ്റേഷനുകൾ എന്നിവിടങ്ങളിലെ ഉദ്യോഗസ്​ഥർക്കാണ്​ ഇതിനകം പോസിറ്റിവായത്​.