വന്‍തോതില്‍ വിദേശ കറന്‍സി രാജ്യത്തിനു പുറത്തേക്കു കടത്താന്‍ സ്വപ്ന ശിവശങ്കറിന്റെ സഹായം തേടി, സ്വപ്നയെ സഹായിക്കണമെന്ന് വിമാനക്കമ്പനിയെ ശിവശങ്കര്‍ നേരിട്ട് അറിയിച്ചു
വന്‍തോതില്‍ വിദേശ കറന്‍സി രാജ്യത്തിനു പുറത്തേക്കു കടത്താന്‍ സ്വര്‍ണക്കടത്തു കേസിനു മുന്‍പ് എം.ശിവശങ്കറിന്റെ സഹായം പ്രതി സ്വപ്ന സുരേഷ് തേടിയതായി അന്വേഷണ ഏജന്‍സികള്‍ കണ്ടെത്തി.
ജൂണില്‍ വന്ദേഭാരത് മിഷന്റെ ഭാഗമായി ദുബായിലേക്ക് പോയ വിമാനങ്ങളില്‍ 5 വിദേശികള്‍ക്ക് ടിക്കറ്റ് ഉറപ്പാക്കാനാണ് സ്വപ്ന ശിവശങ്കറിന്റെ സഹായം തേടിയത്. യുഎഇ കോണ്‍സുലേറ്റില്‍ നിന്നു സ്വപ്ന സുരേഷ് ബന്ധപ്പെടുമ്പോള്‍ സഹായിക്കണമെന്ന് വിമാനക്കമ്പനിയെ നേരിട്ട് അറിയിച്ചതും ശിവശങ്കറാണ്.
ഇക്കാലത്ത് സ്വപ്ന കോണ്‍സുലേറ്റിലെ ജോലി രാജിവച്ചു ശിവശങ്കറിന്റെ കീഴിലുള്ള സ്‌പേസ് പാര്‍ക്ക് പദ്ധതിയില്‍ ചേര്‍ന്നിരുന്നു. ഇത് അറിയാമായിരുന്നിട്ടും കോണ്‍സുലേറ്റിലെ ഉദ്യോഗസ്ഥയായി സ്വപ്നയെ പരിചയപ്പെടുത്തിയതിന്റെ കാരണം വ്യക്തമാക്കാന്‍ ശിവശങ്കറിനു കഴിഞ്ഞില്ല.
ഇന്ത്യയില്‍ നിന്നു ശേഖരിച്ച വിദേശ കറന്‍സി വന്ദേഭാരത് സര്‍വീസുകള്‍ ഉപയോഗപ്പെടുത്തി ലോക്ഡൗണ്‍ കാലത്ത് സ്വപ്ന വിദേശത്തേക്കു കടത്തി യെന്ന മൊഴി അന്വേഷണ സംഘങ്ങള്‍ക്കു ലഭിച്ചതോടെയാണ് ഇതില്‍ ശിവശങ്കറിന്റെ പങ്കും പുറത്തുവരുന്നത്. കേരളത്തില്‍ കുടുങ്ങിയ യുഎഇ പൗരന്മാരെ നാട്ടിലെത്തിക്കാനാണ് സ്വപ്ന സഹായം തേടിയതെന്നാണ് ശിവശങ്കറിന്റെ നിലപാട്.
എന്നാല്‍, മലയാളികളെ തിരികെയെത്തിക്കാന്‍ പോയ വിമാനങ്ങളില്‍ 8 ബാഗേജുകള്‍ അടക്കം സ്വപ്ന കയറ്റിവിട്ട 5 പേരും യുഎഇ പൗരന്മാരായിരുന്നില്ലെന്നും അന്വേഷണത്തില്‍ വ്യക്തമായി. വിദേശകറന്‍സി കടത്തിയതായി സംശയിക്കുന്ന ബാഗേജുകളുടെ പരിശോധനയിലും ദുരൂഹതയുണ്ട്.
കള്ളപ്പണ ഇടപാടുകളില്‍ അന്വേഷണം തുടങ്ങിയ എന്‍ഫോഴ്‌സ്‌മെന്റ് ഡയറക്ടറേറ്റിന്റെ (ഇഡി) ചോദ്യം ചെയ്യലില്‍ കൂടുതല്‍ വിവരങ്ങള്‍ പുറത്തുവരുമെന്നാണു പ്രതീക്ഷ. സ്വപ്ന വിദേശകറന്‍സി ശേഖരിച്ചതു സ്വര്‍ണക്കടത്തിനു മാത്രമാണെന്ന് ഇഡി കരുതുന്നില്ല. വിദേശ കറന്‍സി ശേഖരിക്കാന്‍ സഹായിച്ചവരെ ചോദ്യം ചെയ്യുന്നതു പൂര്‍ത്തിയായാല്‍ ഇതില്‍ കൂടുതല്‍ വ്യക്തത വരും.
https://www.facebook.com/Malayalivartha
