രണ്ടു വർഷമായി ജോലിയിൽ തുടരുന്ന മലയാളി നഴ്സിനെ ആശുപത്രിയിലെ കോവിഡ് കെയർ ഐസിയുവിന്റെ ശുചിമുറിയിൽ മരിച്ച നിലയിൽ നിലയിൽ കണ്ടെത്തി. കൊല്ലം എഴുകോൺ എടക്കോട് ഐശ്വര്യയിൽ ശശിധരന്റെ മകൻ അതുൽ ശശിധരന്റെ (26) മൃതദേഹം മാറത്തഹള്ളി സക്ര വേൾഡ് ആശുപത്രിയിലാണ് കണ്ടെത്തിയത്.

മരണത്തിൽ ദുരൂഹത ആരോപിച്ച് പിതാവ് മാറത്തഹള്ളി പൊലീസിൽ പരാതി നൽകിയിട്ടുണ്ട്. അതുലിനെ ശുചിമുറിയിൽ വീണുകിടക്കുന്ന നിലയിലാണ് കണ്ടെത്തിയെന്നും ഹൃദയാഘാതം സംഭവിച്ചു എന്നുമാണ് ആശുപത്രി അധികൃതർ അറിയിച്ചിരുന്നത്. എന്നാൽ ഇയാളുടെ പോസ്റ്റ്മോർട്ടം നടത്താൻ തയാറായില്ലെന്നും ശീതീകരണ സംവിധാനമുള്ള ആംബുലൻസ് വിട്ടുനൽകിയില്ലെന്നും പിതാവ് ആരോപിക്കുന്നു. സംസ്കാരം നാട്ടിൽ നടത്തി. മാതാവ്: വത്സല കുമാരി. സഹോദരൻ: എസ്.ആരോമൽ.

അതേസമയം മരണത്തിൽ ദുരൂഹത ഉണ്ടെന്നും അന്വേഷണം വേണമെന്നും ഇന്ത്യൻ നഴ്സസ് അസോസിയേഷൻ കർണാടക സംസ്ഥാന പ്രസിഡന്റ് രഞ്ജിത് സ്കറിയ, ജന.സെക്രട്ടറി ജിജോ മൈക്കിൾ എന്നിവർ ആവശ്യപ്പെട്ടുണ്ട്.