ആത്മഹത്യ ചെയ്യാതെ പിടിച്ചു നിന്നത് ദൈവ വിശ്വാസം കൊണ്ടുമാത്രം. പല രാത്രിയിലും മകളെയും കെട്ടിപ്പിടിച്ച്‌ പൂജാമുറിയിലിരുന്ന് പൊട്ടിക്കരഞ്ഞിട്ടുണ്ട്. പഴവങ്ങാടി ഗണപതിയുടെ അനുഗ്രഹം കൊണ്ടാണ് സ്വപ്‌നയുടെയും കൂട്ടരുടെയും കള്ളക്കളികള്‍ പുറത്തായത്', ഇത് സ്വപ്‌ന കാരണം ജീവിതം തകർന്ന എയര്‍ഇന്ത്യ ജീവനക്കാരനായ എല്‍.എസ് സിബുവിന്റെ ഭാര്യ ഗീതാദേവിയുടെ വാക്കുകളാണ്.

സ്വര്‍ണക്കടത്തുകേസില്‍ ആരോപണം ഉയരുന്നതിന് മുമ്പ് സ്വപ്‌ന തകര്‍ത്ത ജീവിതമാണ് എയര്‍ഇന്ത്യ ജീവനക്കാരനായ എല്‍.എസ് സിബുവിന്റെത്. സ്വപ്‌നയുടെയും കൂട്ടരുടെയും ചെയ‌്തികള്‍ക്ക് കൂട്ടു നില്‍ക്കാത്തതാണ് തിരുവനന്തപുരം പട്ടം സ്വദേശിയായ സിബുവിന്റെ ജീവിതം മാറ്റിമറിച്ചത്. 5 വർഷം മുൻപു തിരുവനന്തപുരം വിമാനത്താവളത്തിൽ ഗ്രൗണ്ട് ഓഫിസറായി ജോലി ചെയ്യുമ്പോൾ സംഘടനാ നേതാവെന്ന നിലയിൽ എയർ ഇന്ത്യ സാറ്റ്സുമായി ബന്ധപ്പെട്ട ക്രമക്കേടു സംബന്ധിച്ചു സിബു കേന്ദ്രസർക്കാരിനും വിജിലൻസ് കമ്മിഷനും പരാതി നൽകിയിരുന്നു. ഇതെത്തുടർന്ന് ഇദ്ദേഹത്തിനെതിരെ വനിതാ ജീവനക്കാരുടെ ഒപ്പിട്ട പരാതി ഉയർന്നു വന്നു. സിബുവിനെതിരെ 17 പെണ്‍കുട്ടികളുടെ പേരില്‍ എയര്‍പോര്‍ട്ട് ഡയറക്ടര്‍ക്ക് പരാതി തപാലില്‍ ലഭിക്കുകയായിരുന്നു. പരാതിയിലെ രണ്ടാം പേരുകാരിയായ പാര്‍വതി സാബു മൊഴി നല്‍കിയതിന്റെ അടിസ്ഥാനത്തിലാണ് സിബുവിനെതിരെ ആഭ്യന്തര അന്വേഷണ സമിതി അച്ചടക്ക നടപടി സ്വീകരിച്ചത്. വര്‍ഷങ്ങളായി കൂടെയുള്ള ജീവനക്കാരനെ കുരുക്കില്‍പ്പെടുത്താന്‍ എയര്‍ ഇന്ത്യയിലെ ചില ഉന്നത ഉദ്യോഗസ്ഥര്‍ കൂട്ടുനിന്നപ്പോള്‍ ആ കുടുംബം ഒട്ടാകെ മാനസികമായി തകര്‍ന്നുപോയി.

2015 ജനുവരിയിലാണ് എയര്‍ ഇന്ത്യ സാറ്റ്‌സിലെ 17 വനിത ജീവനക്കാരുടെ പേരില്‍ എല്‍ എസ് സിബുവിന് എതിരെ വ്യാജ പരാതി തിരുവനന്തപുരം വിമാനത്താവള ഡയറക്ടര്‍ക്ക് ലഭിക്കുന്നത്. ആഭ്യന്തര അന്വേഷണ സമിതി കുറ്റക്കാരനാണെന്ന് കണ്ടെത്തിയതിനെത്തുടര്‍ന്ന് സിബു നല്‍കിയ പരാതിയില്‍ ക്രൈംബ്രാഞ്ച് അന്വേഷണം നടത്തി. അന്വേഷണത്തില്‍ സ്വപ്‌നയുടെ ഇടപെടലുകള്‍ വ്യക്തമായി പുറത്തുവന്നു. 2020 ഫെബ്രുവരിയില്‍ കേസുമായി ബന്ധപ്പെട്ട് ആദ്യമായി ചോദ്യം ചെയ‌്തപ്പോള്‍ തന്നെ സ്വപ്‌ന തെറ്റുകള്‍ ഏറ്റു പറഞ്ഞു. സിബുവിനെതിരെ പരാതി തയ്യാറാക്കിയതു പോലും സ്വപ്‌നയാണെന്ന് അന്വേഷണത്തിൽ തെളിഞ്ഞു.

സ്വപ്ന സുരേഷാണ് പാര്‍വതി സാബു എന്നപേരില്‍ നീതു മോഹന്‍ എന്ന പെണ്‍കുട്ടിയെ ആഭ്യന്തര അന്വേഷണ സമിതിക്കു മുന്നില്‍ ഹാജരാക്കി തെറ്റായ മൊഴി കൊടുത്തതെന്ന് ക്രൈംബ്രാഞ്ച് കണ്ടെത്തി. സ്വപ്ന സുരേഷിനെ ചോദ്യം ചെയ്തപ്പോള്‍, രണ്ടു മാസം മുന്‍പാണ് സാറ്റ്സില്‍ ജോലിയില്‍ പ്രവേശിച്ചതെന്നും സാമ്ബത്തിക ബുദ്ധിമുട്ടുകള്‍ നേരിട്ടിരുന്ന തന്നെകൊണ്ട് വൈസ് പ്രസിഡന്റും ചിലരും ചേര്‍ന്ന് തെറ്റായ പല കാര്യങ്ങളും ചെയ്യിച്ചതായും മൊഴി നല്‍കി. 17 പെണ്‍കുട്ടികളുടേതായി തയാറാക്കിയ പരാതി ഡ്രാഫ്റ്റ് ചെയ്തത് സ്വപ്ന സുരേഷാണെന്ന അനുമാനത്തില്‍ ക്രൈംബ്രാഞ്ച് എത്തി നിൽക്കുകയാണ്. ഇതിലുള്ള അന്വേഷണം നടന്നുകൊണ്ടിരിക്കുകയാണ്..