സര്‍ക്കാര്‍ മുന്‍ സെക്രട്ടറി ശിവശങ്കറിന്റെ കാര്യം ഓര്‍ക്കുമ്പോള്‍ പഴയൊരു സിനിമാ ഗാനമാണ് ഓര്‍മ്മയില്‍ വരുന്നത്. പണിതിട്ടും പണിതിട്ടും പണിതീരാത്തൊരു പ്രപഞ്ച മന്ദിരമേ... എന്നതു പോലെയാണ് ശിവശങ്കറിന്റെ ചോദ്യം ചെയ്യല്‍ മാമാങ്കം. ഓരോ തവണയും ശിവശങ്കറിനെ ചോദ്യം ചെയ്യുമ്പോഴും ദേ അറസ്റ്റെന്ന് ചാനലുകാര്‍ കൊട്ടി ഘോഷിക്കുമ്പോള്‍ എല്ലാം മാറ്റി വച്ച് മലയാളികള്‍ കാതോര്‍ത്തു. ആദ്യത്തെ ശിവശങ്കറിന്റെ ചോദ്യം ചെയ്യലൊക്കെ ചാനലുകള്‍ക്ക് ചാകരയായിരുന്നു. ചാനലുകാരെ പറ്റിച്ച് ശിവശങ്കറെ ആദ്യമായി ചോദ്യം ചെയ്യാന്‍ വിളിപ്പിച്ചത് കംസ്റ്റംസാണ്. അതോടെ ചാനലുകള്‍ സിഐഡിയായി കസ്റ്റംസ് ഓഫീസ് പരിസരത്ത് ഒരു ടീമും മറ്റൊരു ടീം ശിവശങ്കറിന്റെ വീട്ടിലും തമ്പടിച്ചു. ശിവശങ്കറിനെ തിരുവനന്തപുരത്ത് എന്‍ഐഎ ആദ്യം ചോദ്യം ചെയ്ത് വിട്ടയച്ചപ്പോള്‍ ചാനല്‍ ചര്‍ച്ച മാറ്റി വച്ച് വീട് വരേയും അവര്‍ എസ്‌കോട്ടായി പുറകേ പോയി. ശിവശങ്കര്‍ ഗേറ്റ് കൊട്ടിയടച്ചിട്ട് പോലും അവര്‍ ഗേറ്റിന് മുകളിലൂടെ ഒളിഞ്ഞ് നോക്കി ദൃശ്യങ്ങളെടുത്തു. എന്തിന് ശിവശങ്കറെ എറണാകുളത്ത് ചോദ്യം ചെയ്യാന്‍ വിളിപ്പിച്ചപ്പോള്‍ ശിവശങ്കറിനൊപ്പം നാലര മണിക്കൂര്‍ യാത്ര ചെയ്ത് ചാനലുകാരും എസ്‌കോട്ടായി എറണാകുളം വരേയും പോയി. ശിവശങ്കറിനെ ഒന്നിന് പോകാന്‍ പോലും വണ്ടി നിര്‍ത്താന്‍ സമ്മതിച്ചില്ല. രണ്ട് ദിവസത്തെ ചോദ്യം ചെയ്യലിന് ശേഷം അറസ്റ്റെന്ന് നിലവിളിച്ചപ്പോള്‍ ഒന്നും സംവവിച്ചില്ലെന്നായതോടെ വട്ടുപിടിച്ച റിപ്പോര്‍ട്ടര്‍മാര്‍ എല്ലാം ചുരുട്ടിക്കൂട്ടി. അവസാനം ഇഡി ചോദ്യം ചെയ്തപ്പോള്‍ ആരുമില്ല.

ഇപ്പോഴിതാ നയതന്ത്രചാനല്‍ സ്വര്‍ണക്കടത്തു കേസില്‍ ശിവശങ്കറിനെ വീണ്ടും ചോദ്യം ചെയ്യാന്‍ കസ്റ്റംസ് പ്രിവന്റീവ് സംഘം തീരുമാനിച്ചിരിക്കുകയാണ്. ശിവശങ്കറിന്റെയും പ്രതികളുടെയും മൊഴികള്‍ തമ്മില്‍ നിരവധി വൈരുദ്ധ്യങ്ങളുണ്ട്. ചില വിവരങ്ങള്‍ ശിവശങ്കര്‍ മറച്ചുവച്ചതായും സംശയിക്കുന്നു. ഇതെല്ലാം പൊളിച്ചടുക്കാനാണ് കസ്റ്റംസ് ശിവശങ്കറെ ചോദ്യം ചെയ്യുന്നത്.

അതേസമയം ശിവശങ്കറിനെ മുള്‍മുനയില്‍ നിര്‍ത്തുന്ന പല വിവരങ്ങളാണ് പുറത്ത് വരുന്നത്. സ്വപ്ന സുരേഷുമായി മുഖ്യമന്ത്രിയുടെ ശിവശങ്കര്‍ മൂന്നുതവണ വിദേശയാത്ര നടത്തിയതായി എന്‍ഫോഴ്‌സ്‌മെന്റ് ഡയറക്ടറേറ്റ് കണ്ടെത്തിയിരുന്നു. 2017 ഏപ്രിലില്‍ ഇരുവരും ഒരുമിച്ച് യു എ ഇയിലേക്ക് യാത്ര ചെയ്തു. 2018 ഏപ്രിലില്‍ സ്വപ്ന ഒമാനിലേക്ക് പോയി. അവിടെ വച്ച് ശിവശങ്കറെ കണ്ടു. ഒരുമിച്ച് മടങ്ങുകയും ചെയ്തു. 2018 ഒക്ടോബറില്‍ പ്രളയ ദുരിതാശ്വാസ ഫണ്ട് രൂപീകരിക്കാനുള്ള മുഖ്യമന്ത്രിയുടെ യു എ ഇ സന്ദര്‍ശന വേളയില്‍ ഇരുവരും ഒരുമിച്ച് യു എ ഇ യിലേക്ക് പോയി. സ്വര്‍ണം സൂക്ഷിക്കാന്‍ ചാര്‍ട്ടേഡ് അക്കൗണ്ടന്റുമൊന്നിച്ച് ബാങ്ക് ലോക്കര്‍ തുറന്നത് ശിവശങ്കറിന്റെ നിര്‍ദേശപ്രകാരമാണെന്ന് സ്വപ്ന സമ്മതിച്ചെന്നും എന്‍ഫോഴ്‌സ്‌മെന്റ് കോടതിയെ അറിയിച്ചു.

എം.ശിവശങ്കറിനെ എന്‍ഫോഴ്‌സ്‌മെന്റ് ഡയറക്ടറേറ്റ് ശനിയാഴ്ച അഞ്ചര മണിക്കൂറാണ് ചോദ്യം ചെയ്ത് . കൊച്ചിയിലെ ഓഫീസിലേക്ക് വിളിച്ചു വരുത്തിയായിരുന്നു ചോദ്യം ചെയ്യല്‍. സ്വപ്‌ന സുരേഷിന്റെ ഹവാല ഇടപാടുകള്‍, വിദേശനാണയ വിനിമയചട്ട ലംഘനം എന്നിവയെക്കുറിച്ച് അറിവുണ്ടോ എന്നറിയാനായിരുന്നു ചോദ്യം ചെയ്യല്‍.

സ്വപ്‌നയെ പരിചയമുണ്ടെങ്കിലും അവരുടെ വഴിവിട്ട ഇടപാടുകളെക്കുറിച്ച് ഒന്നുമറിയില്ലെന്ന് നേരത്തെ വിവിധ അന്വേഷണ ഏജന്‍സികള്‍ക്ക് നല്‍കിയ മൊഴിയില്‍ ശിവശങ്കര്‍ ഉറച്ചു നിന്നു. തിരുവനന്തപുരത്തെ ബാങ്കില്‍ സ്വപ്‌നയ്ക്ക് ജോയിന്റ് അക്കൗണ്ട് തുറക്കാന്‍ ചാര്‍ട്ടേഡ് അക്കൗണ്ടന്റിനെ ഏര്‍പ്പാടാക്കി നല്‍കുക മാത്രമാണ് ചെയ്തത്. അക്കൗണ്ട് വിവരങ്ങള്‍ അറിയില്ലെന്നും ശിവശങ്കര്‍ പറഞ്ഞു. പ്രാഥമിക ചോദ്യം ചെയ്യല്‍ മാത്രമാണ് പൂര്‍ത്തിയായതെന്ന് എന്‍ഫോഴ്‌സ്‌മെന്റ് ഡയറക്ടറേറ്റ് വ്യക്തമാക്കി. പ്രതികളുടെ മൊഴികളുമായി വിശകലനം ചെയ്തശേഷം പൊരുത്തക്കേടുണ്ടെങ്കില്‍ ശിവശങ്കറിനെ വീണ്ടും വിളിച്ചു വരുത്തും. അങ്ങനെ പണിതീരാത്ത വീടു പോലെ പഴയ സിനിമാ പാട്ടും പാടി ഇപ്പോഴെങ്കിലും വല്ലതും നടക്കുമോന്ന ചോദ്യം ചോദിച്ചാണ് ചാനലുകാര്‍ കറങ്ങുന്നത്. എങ്ങിലും അവര്‍ പിന്മാറാന്‍ തയ്യാറല്ല. കാരണം അന്നേരമാണ് പണി പൂര്‍ത്തിയയാക്കി പാല് കാച്ച് നടന്നാല്‍ റേറ്റിങ്ങെല്ലാം മറ്റവന്‍മാര്‍ കൊണ്ടുപോകും. അതിനാല്‍ വെളുക്കുവോളം വെളളം കോരിയിട്ട് കലമുടയ്ക്കാന്‍ വയ്യേ വയ്യ.