സ്വപ്നയെ പൂട്ടാന്‍ പുപ്പുലികള്‍... സ്വര്‍ണക്കടത്ത് കേസിലെ അതി നിര്‍ണായക ദിവസമായി മാറുന്നു; എറണാകുളം പ്രിന്‍സിപ്പല്‍ സെഷന്‍സ് കോടതിയിയില്‍ സ്വപ്ന സുരേഷ് നല്‍കിയ ജാമ്യാപേക്ഷ പരിഗണിക്കുമ്പോള്‍ കാതോര്‍ത്ത് അന്വേഷണത്തിന് ചുക്കാന്‍ പിടിക്കുന്നവര്‍; സ്വപ്നയ്ക്ക് ജാമ്യം കിട്ടിയാല്‍ എല്ലാം തീര്‍ന്നു
സ്വര്‍ണക്കടത്തുമായി ബന്ധപ്പെട്ട് മുഖ്യ പ്രതിയായ സ്വപ്ന സുരേഷിനെ സംബന്ധിച്ച് നിര്‍ണായകമായ ദിവസമാണിന്ന്. സ്വപ്നയ്ക്ക് ജാമ്യം കിട്ടുമോഎന്നാണ് എല്ലാവരും കാതോര്‍ക്കുന്നത്. എന്‍ഫോഴ്‌സ്‌മെന്റ് ഡയറക്ടറേറ്റ് ചുമത്തിയ കേസില്‍ സ്വപ്ന സുരേഷ് നല്‍കിയ ജാമ്യാപേക്ഷയിലാണ് കോടതി ഇന്ന് വാദം കേള്‍ക്കുന്നത്. എറണാകുളം പ്രിന്‍സിപ്പല്‍ സെഷന്‍സ് കോടതിയിലാണ് കേസ്. കള്ളക്കടത്തിന് പിന്നിലെ ഹവാല, ബിനാമി ഇടപാടുകളും കള്ളപ്പണം വെളുപ്പിക്കലുമാണ് എന്‍ഫോഴ്‌സ്‌മെന്റ് ഡയറക്ടറേറ്റ് അന്വേഷിക്കുന്നത്. എന്നാല്‍ ഇതില്‍ തനിക്ക് ബന്ധമില്ലെന്നാണ് സ്വപ്നയുടെ വാദം.
അതേസമയം സ്വപ്നയ്ക്ക് ഈ അവസരത്തില്‍ ജാമ്യം കിട്ടിയാല്‍ അത് ദേശീയ അന്വേഷണ ഏജന്‍സിക്ക് വലിയ നാണക്കേടാണ്. ഇതുവരെ പടുത്തുയര്‍ത്തിയ അന്വേഷണ മികവ് ചീട്ട് കൊട്ടാരം പോലെ തകര്‍ന്ന് പോകും. ഒരിക്കല്‍ സ്വപ്നയ്ക്ക് ജാമ്യം കിട്ടിയാല്‍ അത് ഉയര്‍ത്തിപ്പിടിച്ച് സ്വപ്ന എല്ലാ കേസിലും ജാമ്യം നേടും. അതിനാല്‍ തന്നെ അന്വേഷണത്തിന് ചുക്കാന്‍ പിടിക്കുന്ന എന്‍ഐഎ വനിത ഓഫീസര്‍ വന്ദന, രാജ്യ സുരക്ഷ ഉപദേഷ്ടാവ് അജിത് ഡോവല്‍ എന്നിവരുടെ കണ്ണും കാതും കൊച്ചിയിലുണ്ട്. അന്വേഷണത്തിനായി എല്ലാ അവസരങ്ങളും ഒരുക്കിയയാളാണ് അജിത് ഡോവല്‍. രാജ്യാന്തര ബന്ധമുള്ള കേസില്‍ എന്‍ഐഎയെ രായ്ക്ക് രാമാനം ദുബായിലെത്തിച്ചത് ഡോവലിന്റെ മികവ് കൊണ്ട് മാത്രമാണ്.
അന്വേഷണത്തിന് നേരിട്ട് ചുക്കാന്‍ പിടിക്കുന്നയാളാണ് എന്‍ഐഎ വനിത ദക്ഷിണമേഖലാ മേധാവി കെ.ബി. വന്ദന. സ്വപ്നയേയും ശിവശങ്കറിനേയും ചോദ്യം ചെയ്ത വന്ദനയും ഒരു മന്ത്രിയുടെ പ്രൈവറ്റ് സെക്രട്ടറി ആയിരുന്നു. അര്‍ജുന്‍ റാം മേഘ്വാല്‍ കേന്ദ്ര ധനകാര്യ സഹമന്ത്രി ആയിരുന്നപ്പോള്‍ അദ്ദേഹത്തിന്റെ പ്രൈവറ്റ് സെക്രട്ടറി ആയിരുന്നു തമിഴ് നാട് സ്വദേശിനി ആയ കെ ബി വന്ദന. അതുകൊണ്ടുതന്നെ ഒരു മുഖ്യമന്ത്രിയുടെ ഓഫീസും ഭീകരവാദ സംഘടനകളും എങ്ങനെ പ്രവര്‍ത്തിക്കുന്നെന്ന് കൃത്യമായി അറിയാന്‍ സാധിക്കുന്നയാളുമാണ്.
2004 ബാച്ച് രാജസ്ഥാന്‍ കേഡര്‍ ഐ പി എസ് ഉദ്യോഗസ്ഥയാണ് കെ ബി വന്ദന. നോര്‍ത്ത് കരോലിനയിലെ അമേരിക്കന്‍ ഇന്റലിജന്‍സ് ട്രെയിനിംഗ് അക്കാദമിയില്‍ ഭീകര വിരുദ്ധ ട്രെയിനിംഗ് വിജയകരമായി പൂര്‍ത്തിയാക്കിയ ചുരുക്കം ചില വനിത ഐ പി എസ് ഉദ്യോഗസ്ഥരില്‍ ഒരാള്‍.
ഇത്തരത്തില്‍ വന്‍ പുലികള്‍ നേതൃത്വം നല്‍കുന്ന കേസില്‍ സ്വപ്നയ്ക്ക് ജാമ്യം കിട്ടിയാല്‍ അതില്‍പ്പരം നാണക്കേടില്ല. അതിനാല്‍ തന്നെ ശക്തമായ പ്രോസിക്യൂഷനെയാണ് രംഗത്തിറക്കിയിരിക്കുന്നത്.
നയതന്ത്രചാനല്‍ വഴി സ്വപ്ന, സരിത്ത്, സന്ദീപ് എന്നിവര്‍ നേരിട്ട് സ്വര്‍ണം കടത്തിയെന്ന് സംശയിക്കുന്നതായാണ് എന്‍ഫോഴ്‌സ്‌മെന്റ് ഡയറക്ടറേറ്റ് വെളിപ്പെടുത്തിയത്. 2019 ആഗസ്റ്റില്‍ മൂവരും യു.എ.ഇയില്‍ വച്ച് കേസിലെ മറ്റൊരു പ്രതിയായ ഫൈസല്‍ ഫരീദമായി കൂടിക്കാഴ്ച നടത്തി. ഈ സമയം നയതന്ത്രചാനല്‍ വഴി അയയ്‌ക്കേണ്ട സ്വര്‍ണം നിറച്ച ബാഗുകള്‍ ഫൈസലിന് കൈമാറി. എന്നാല്‍ അക്കൂട്ടത്തില്‍ ഒരു ബാഗ് മാത്രം ഫൈസലിന് നല്‍കിയില്ല. ഈ ബാഗ് പ്രതികള്‍ നേരിട്ട് നയതന്ത്രചാനല്‍ വഴി കടത്തിയെന്നാണ് സംശയിക്കുന്നത്. ഇതിനെക്കുറിച്ചാണ് ഇപ്പോള്‍ എന്‍ഫോഴ്‌സ്‌മെന്റിന്റെ അന്വേഷണം. മാത്രമല്ല എം. ശിവശങ്കറും സ്വര്‍ണക്കടത്തു കേസിലെ പ്രതി സ്വപ്ന സുരേഷും ഒന്നിച്ചു നടത്തിയ വിദേശ യാത്രയുടെ വിശദവിവരങ്ങളും എന്‍ഫോഴ്‌സ്‌മെന്റ് ഡയറക്ടറേറ്റിന് ലഭിച്ചു.
ഇതെല്ലാം തന്നെ സ്വപ്നയേയും കൂട്ടരേയും പൂട്ടാനായി മതിയാകുമെന്നാണ് എന്‍ഫോഴ്‌സ്‌മെന്റ് കരുതുന്നത്. മാത്രമല്ല കംസ്റ്റംസിനേയും എന്‍ഐഎയും മറികടന്ന് സ്വപ്നയുടെ കൂടുതല്‍ സാമ്പത്തിക തരികിടകള്‍ വെളിച്ചത്ത് കൊണ്ടു വരാനും എന്‍ഫോഴ്‌സ്‌മെന്റിനായി. കോടതിയിലെ ഇന്നത്തെ സ്വപ്നയുടെ ജാമ്യമായിരിക്കും എല്ലാ അന്വേഷണങ്ങളുടേയും വഴിത്തിരിവ്. അതിനാല്‍ തന്നെ സകല കണ്ണുകളും കൊച്ചിയിലേക്കാണ്, കൊച്ചിയിലേക്ക് മാത്രം.
https://www.facebook.com/Malayalivartha
