ദുരൂഹമായ ആ അവധി... എന്‍ഐഎ ആവശ്യപ്പെട്ട ദൃശ്യങ്ങള്‍ നല്‍കണമെന്ന് അഭിപ്രായപ്പെട്ട പൊതു ഭരണ പ്രിന്‍സിപ്പല്‍ സെക്രട്ടറി കെ. ആര്‍. ജ്യോതിലാല്‍ ദീര്‍ഘകാല അവധിയില്‍; ആരോഗ്യ കാരണങ്ങളാല്‍ അവധിയെടുത്തു എന്ന് പറയുമ്പോഴും
സ്വര്‍ണ്ണക്കടത്ത് കേസില്‍ എന്‍ഐഎ ആവശ്യപ്പെട്ട ദൃശ്യങ്ങള്‍ നല്‍കണമെന്ന് അഭിപ്രായപ്പെട്ട പൊതു ഭരണ പ്രിന്‍സിപ്പല്‍ സെക്രട്ടറി കെ. ആര്‍. ജ്യോതിലാല്‍ ദീര്‍ഘകാല അവധിയില്‍ പ്രവേശിച്ചതില്‍ ദുരുഹതയെന്ന് ആരോപണം.
ജ്യോതിലാലിനോട് സര്‍ക്കാര്‍ നീരസം പ്രകടിപ്പിച്ചതോടെ അദ്ദേഹം സ്ഥാനം സ്വയം ഒഴിയുകയായിരുന്നു എന്നാണ് കേള്‍ക്കുന്നത്. ആരോഗ്യ കാരണങ്ങളാല്‍ അദ്ദേഹം അവധിയെടുത്തു എന്നാണ് സര്‍ക്കാര്‍ വിശദീകരണം.
സര്‍ക്കാരിനോട് ഉടക്കിയാല്‍ ഇതാണ് ഫലമെന്ന വ്യക്തമായ സൂചനയാണ് സര്‍ക്കാര്‍ നല്‍കിയിരിക്കുന്നത്. പൊതുഭരണ വകുപ്പിന്റെ അഡീഷണല്‍ സെക്രട്ടറിയാണ് ദൃശ്യങ്ങള്‍ നല്‍കേണ്ടത്. പ്രസ്തുത വകുപ്പിന്റെ പ്രിന്‍സിപ്പല്‍ സെക്രട്ടറിയാണ് ജ്യോതിലാല്‍.
എന്‍ ഐ എ പോലൊരു ഏജന്‍സി ചോദിച്ചാല്‍ ദൃശ്യങ്ങള്‍ നല്‍കണമെന്നായിരുന്നു പ്രിന്‍സിപ്പല്‍ സെക്രട്ടറിയുടെ നിലപാടെന്ന് നേരത്തെ കേട്ടിരുന്നു . വകുപ്പിന്റെ അഡീഷണല്‍ സെക്രട്ടറിയും സി പി എം സംഘടനാ നേതാവുമായ ഹണിയോടാണ് ദൃശ്യങ്ങള്‍ എന്‍ ഐ എ ആവശ്യപ്പെട്ടത്. അതിന്റെ അനുമതി നല്‍കേണ്ടത് ജ്യോതിലാലാണ്. എന്നാല്‍ ഹണിയുടെ നിലപാട് ദൃശ്യങ്ങള്‍ നല്‍കേണ്ട എന്നായിരുന്നുവെന്നാണ് വിവരം . ഇതിന് സര്‍ക്കാരിന്റെ പിന്തുണ കിട്ടിയെന്ന് കേള്‍ക്കുന്നു.
സ്വര്‍ണക്കടത്ത് കേസിലെ അന്വേഷണത്തിന്റെ ഭാഗമായി അന്വേഷണ സംഘം ആവശ്യപ്പെട്ട സെക്രട്ടേറിയറ്റിലെ സിസിടിവി ദൃശ്യങ്ങള്‍ നല്‍കുന്നത് താമസിപ്പിക്കും എന്ന വിവരം ഇതിനിടെ പുറത്തുവന്നു .
മുഖ്യമന്ത്രിയുടെയും മന്ത്രിമാരുടെയും ഓഫീസിലെ ചില ദൃശ്യങ്ങള്‍ സര്‍ക്കാരിന് വെല്ലുവിളിയാകുമോ എന്ന് ഭയന്നിട്ടാണ് പൊതു ഭരണ വകുപ്പില്‍ നിന്നും ദൃശ്യങ്ങള്‍ നല്‍കാത്തതെന്ന് അറിയുന്നു.
എന്‍ഐഎ ആവശ്യപ്പെട്ട് ഒരു മാസം പിന്നിട്ടിട്ടും ദൃശ്യങ്ങള്‍ കൈമാറാനുള്ള നടപടി പൊതുഭരണവകുപ്പ് സ്വീകരിക്കുന്നില്ല. സെക്രട്ടേറിയറ്റിലെ ഭരണാനുകൂല സംഘടനാ നേതാവാണ് ദൃശ്യങ്ങള്‍ കൈമാറാതെ ഒത്തുകളി നടത്തുന്നതെന്ന് ആരോപണമുണ്ട്.
സ്വര്‍ണക്കടത്ത് കേസിലെ പ്രതികള്‍ക്ക് സെക്രട്ടേറിയറ്റിലുള്ള സ്വാധീനത്തിന്റെ തെളിവുതേടിയാണ് സിസിസിടിവി ദൃശ്യങ്ങള്‍ എന്‍ഐഎ ആവശ്യപ്പെട്ടത്. സ്വപ്നയും സരിത്തും സെക്രട്ടറിയേറ്റില്‍ സ്ഥിരമായി വന്നിരുന്നോ, ഏത് ഓഫീസിലായിരുന്നു പോയിരുന്നത്. സെക്രട്ടേറിയറ്റില്‍ പ്രവേശിക്കാന്‍ ആരെങ്കിലും സഹായം നല്‍കിയിരുന്നോ തുടങ്ങിയ കാര്യങ്ങളുടെ തെളിവ് തേടിയാണ് ദൃശ്യങ്ങള്‍ ചോദിച്ചത്. ഇതില്‍ മുഖ്യമന്ത്രിയുടെ ഓഫീസിലെ ദൃശ്യങ്ങളാണ് വിവാദത്തിലായത് .
കഴിഞ്ഞ മാസം 17നാണ് പൊതുഭരണ അഡീഷണല്‍ സെക്രട്ടറിയും സെക്രട്ടേറിയറ്റ് എംപ്ലോയിസ് അസോസിയേഷന്‍ പ്രസിഡന്റുമായ പി ഹണിക്ക് എന്‍ഐഎ നോട്ടീസ് നല്‍കിയത്. കഴിഞ്ഞ ഒരു വര്‍ഷത്തെ ദൃശ്യങ്ങള്‍ നല്‍കാനായിരുന്നു നോട്ടീസ്. നോട്ടീസില്‍ തുടര്‍നടപടി സ്വീകരിക്കാന്‍ അഡീഷണല്‍ സെക്രട്ടറിക്ക് ചീഫ് സെക്രട്ടറി നിര്‍ദ്ദേശവും നല്‍കി. പക്ഷെ ദൃശ്യങ്ങള്‍ പകര്‍ത്താനായുള്ള ഒരു നടപടിയും ഉണ്ടായില്ല.
വിദേശത്തു നിന്ന് പ്രത്യേക ഹാര്‍ഡ് ഡിസക്ക് വരുത്തണമെന്നും ഇതിനുവേണ്ടി സമയം നീട്ടിചോദിക്കുമെന്നാണ് പൊതുഭരണവകുപ്പ് ഇതിനു മുമ്പ് പറഞ്ഞ വിശദീകരണം. എന്‍ഐഎക്ക് സെക്രട്ടേറിയറ്റിലെ ഹാര്‍ഡ് ഡിസ്‌ക്ക് നേരിട്ടെത്തി പരിശോധിക്കാമെന്ന് രേഖാമൂലം അറിയിക്കുമെന്നും ഉദ്യോഗസ്ഥര്‍ പറഞ്ഞിരുന്നു.
പക്ഷെ ഒരു വിശദീകരണവും ഇതുവരെ പൊതുഭരണവകുപ്പ് എന്‍ഐഎക്ക് നല്‍കിയിട്ടില്ലെന്നാണ് വിവരം. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറിക്കെതിരായ തെളിവുകള്‍ അട്ടിമറിക്കാന്‍ ഭരണാനുകൂല സംഘടനാ നേതാവു വഴി നീക്കം നടക്കുന്നുണ്ടെന്നാണ് ആക്ഷേപം ഉയര്‍ന്നിരിക്കുന്നത്.
ശിവശങ്കറിനെ രക്ഷിക്കണമെന്നു തന്നെയാണ് സര്‍ക്കാരിന്റെ താത്പര്യം. അദ്ദേഹം പാര വച്ചാല്‍ സര്‍ക്കാര്‍ തന്നെ അവതാളത്തിലാകും. ഇതുവരെയും ശിവശങ്കര്‍ സര്‍ക്കാരിനെ ദ്രോഹിക്കാതെയാണ് നീങ്ങിയിട്ടുള്ളത്.
https://www.facebook.com/Malayalivartha
