വനഭൂമിയായ കരിങ്ങാട് കൊരണമലയില്‍ മുന്നറിയിപ്പ് അവഗണിച്ച് കയറിയ യുവാക്കള്‍ കുടുങ്ങി
കോഴിക്കോട് ജില്ലയിലെ വനഭൂമിയായ കരിങ്ങാട് കൊരണമലയില്‍ മല കയറാന്‍ എത്തിയ യുവാക്കളെ കോവിഡ് നിയന്ത്രണമുള്ളതിനാല്‍ നാട്ടുകാര്‍ തിരിച്ചയച്ചെങ്കിലും ഊടു വഴിയിലൂടെ ഇവര്‍ മലകയറി. രാത്രി കോടമഞ്ഞു കാരണം തിരിച്ചിറങ്ങാന്‍ കഴിയാതെ മലമടക്കില്‍ കുടുങ്ങി. ഞായറാഴ്ച ഉച്ചകഴിഞ്ഞാണു സ്‌കൂട്ടറില്‍ കക്കട്ടില്‍ സ്വദേശികള്‍ കൊരണമല കയറാന്‍ എത്തിയത്. നാട്ടുകാരുടെ മുന്നറിയിപ്പ് അവഗണിച്ചു കയറിയ ആ 3 യുവാക്കള്‍ രാത്രി ചെങ്കുത്തായ പാറയിടുക്കില്‍ കുടുങ്ങി.
മലമുകളില്‍ നിന്നും ടോര്‍ച്ച് തെളിയിക്കുകയും ബഹളം വയ്ക്കുകയും ചെയ്തതോടെ നാട്ടുകാര്‍ വനം ഓഫിസിലും നാദാപുരം ഫയര്‍ സ്റ്റേഷനിലും അറിയിച്ചു. നാട്ടുകാരുടെ സഹായത്തോടെ വനംവകുപ്പ്, അഗ്‌നിരക്ഷാസേന സംഘം മൂവരുടെയും ബന്ധുക്കളുടെ സാന്നിധ്യത്തില്‍ തിരച്ചില്‍ തുടങ്ങിയെങ്കിലും പ്രതികൂല കാലാവസ്ഥ കാരണം പുലര്‍ച്ചെ 3-ന് തിരച്ചില്‍ നിര്‍ത്തേണ്ടി വന്നു.
ഇന്നലെ രാവിലെ 6-ന് വീണ്ടും തിരച്ചില്‍ തുടങ്ങി ഒരു മണിക്കൂറിനകം മൂവരെയും കണ്ടെത്തി. ഫോറസ്റ്റര്‍ എന്‍.കെ.ഇബ്രാഹീമിന്റെ നേതൃത്വത്തിലുള്ള വനം വകുപ്പിന്റെ കസ്റ്റഡിയില്‍ വിട്ടു. മൂവര്‍ക്കുമെതിരെ കേസെടുത്ത വനം വകുപ്പ് ജാമ്യം നല്‍കി.
നാദാപുരം അഗ്‌നിരക്ഷാ നിലയം അസി.സ്റ്റേഷന്‍ ഓഫിസര്‍ കെ.സി.സുജേഷ് കുമാര്‍, റസ്‌ക്യു ഓഫിസര്‍മാരായ കെ.അനില്‍, ഒ.അനീഷ്, കെ.ഷാഗില്‍, കെ. ശ്രീനേഷ് നാട്ടുകാരനായ മജീഷ് കരിങ്ങാട് എന്നിവരുടെ നേതൃത്വത്തിലായിരുന്നു തിരച്ചില്‍.
https://www.facebook.com/Malayalivartha
