ആലുവയിലെ മൂന്നുവയസ്സുകാരന്‍ മരിച്ചത് നാണയം വിഴുങ്ങിയതല്ല മരണകാരണമെന്ന് ശാസ്ത്രീയ പരിശോധനാഫലം.
ന്യൂമോണിയ ഹൃദയ അറകള്‍ക്കും ശ്വാസകോശത്തിനും തകരാറുണ്ടാക്കി. കൂട്ടിക്ക് ആവശ്യമായ ഓക്‌സിജന്‍ രക്തത്തില്‍നിന്ന് ലഭിച്ചിരുന്നില്ലെന്നും പരിശോധനാഫലത്തില്‍ വ്യക്തമായി. മൂന്നുവയസുകാരന്റെ മരണത്തില്‍ ചികില്‍സാപിഴവുണ്ടെന്ന് കുടുംബം ആരോപിച്ചിരുന്നു.

നാണയം വിഴുങ്ങിയതല്ല മരണകാരണമെന്ന് പോസ്റ്റുമോര്‍ട്ടത്തില്‍ വ്യക്തമായിരുന്നു.എന്നാല്‍, കളമശേരി മെഡിക്കല്‍ കോളജില്‍ നടന്ന പോസ്റ്റ്മോര്‍ട്ടം റിപ്പോര്‍ട്ട് ദുരുഹതയുയര്‍ത്തുന്നതായിരുന്നു. തുടര്‍ന്ന് മരണ കാരണം സ്ഥിരീകരിക്കാന്‍ അന്വേഷണ സംഘം ശാസ്ത്രീയ തെളിവുകള്‍ തേടുകയായിരുന്നു. പോസ്റ്റ്മോര്‍ട്ടത്തില്‍ കുട്ടിയുടെ വയറ്റില്‍ ഒന്നിനു പകരം രണ്ട് നാണയത്തുട്ടുകളാണ് കണ്ടെത്തിയത്. ഒന്ന് ഒരു രൂപയുടെയും മറ്റേത് 50 പൈസയുടേതുമായിരുന്നു. ഈ നാണയങ്ങള്‍ വിഴുങ്ങിയതല്ല മരണകാരണമെന്നാണ് പോസ്റ്റ്മോര്‍ട്ടത്തിലെ പ്രാഥമിക നിഗമനം. കുട്ടിയുടെ ബന്ധുക്കളുടെ മൊഴിയും ഒരു രൂപ നാണയം വിഴുങ്ങിയെന്നായിരുന്നു.

എന്നാല്‍, നാണയം വയറ്റില്‍ എത്തുമ്പോള്‍ ചെറു കുടലിനോ വന്‍ കുടലിനോ യാതൊരു ക്ഷതവുമേറ്റിരിന്നില്ലായെന്ന് ഡോക്ടര്‍മാര്‍ പറയുന്നു. മാത്രമല്ല ഒരു നാണയം പുറത്തേക്ക് വരാന്‍ മലാശയം വരെ എത്തിയ നിലയിലായിരുന്നു.കുട്ടിയെ ചികിത്സക്കായി ആദ്യമെത്തിച്ച ആലുവ ജില്ലാ ആശുപത്രിയിലേയും ആലപ്പുഴ മെഡിക്കല്‍ കോളജിലേയും എക്സ്റേകളില്‍ വയറ്റില്‍ ഒരു നാണയമാണ് തെളിഞ്ഞു കണ്ടിരുന്നത്. പോസ്റ്റ്മോമോര്‍ട്ടത്തില്‍ രണ്ട് നാണയം കണ്ടെത്തിയതാണ് സംശയത്തിനിടയാക്കിയത്.

ആലുവ പടിഞ്ഞാറേ കടുങ്ങല്ലൂര്‍ വളഞ്ഞമ്പലത്ത് വാടകയ്ക്ക് താമസിക്കുന്ന രാജിന്റെയും നന്ദിനിയുടെയും ഏകമകന്‍ പൃഥിരാജ് ആണ് നാളുകള്‍ക്ക് മുന്‍പ് മരണമടഞ്ഞത്.