തിരുവനന്തപുരം സ്വര്‍ണക്കടത്തു കേസ് പ്രതി സ്വപ്ന സുരേഷിന്റെ കുഴല്‍പ്പണ ബന്ധത്തെക്കുറിച്ചുള്ള വിശദമായ തെളിവ് ലഭിച്ചതായി റിപ്പോര്‍ട്ട് വന്നിരിക്കുകയാണ് .സ്വപ്നയുടെ തട്ടിപ്പ് സംഘത്തിലെ പ്രധാനികളായ രണ്ടുപേര്‍ ഹവാല കുഴല്‍പ്പണ ഇടാപാടുകാരാണെന്ന സംശയം ഉദിച്ചതോടെയാണ് എന്‍ ഐ എ ആ വഴിക്ക് വിഷാദമായ അന്വേഷണം നടത്താന്‍ ലക്ഷ്യമിട്ടിരിക്കുന്നത് .കേസ് അന്വേഷണത്തിന്റെ ഒരു ഘട്ടത്തിലും ചുരുളഴിയാത്ത രഹസ്യമാണ് ഇപ്പോള്‍ മാറാ നീക്കി പുറത്ത് വന്നിരിക്കുന്നത് .

കള്ളക്കടത്തു കേസുമായി ബന്ധപ്പെട്ട നിര്‍ണായകമായ വിവരങ്ങളിലൊന്നാണ് ഇപ്പോള്‍ എന്‍ ഐ എ വിശദമായി പരിശോധിച്ചു വരുന്നത് .ഹവാല കുഴല്‍പ്പണ ഇടപാടുകാരുടെ ബന്ധവും ഈ കേസുമായി ബന്ധപ്പെട്ട് സ്വര്‍ണ്ണം വാങ്ങുന്നതുള്‍പ്പടെയുള്ള അത്തരക്കാരുടെ നീക്കവും സംബന്ധിച്ച് സമഗ്രമായ ഒരന്വേഷണം തന്നെയാണ് നടത്തി വരുന്നത് .ഇതിനിടയിലാണ് നിര്‍ണായകമായ ഒരു തെളിവായി സ്വപ്നയുടെ ബാങ്ക് ലോക്കര്‍ ആര്‍ക്കു വേണ്ടിയാണ് എടുത്തത് എന്നതിനെ പറ്റിയുള്ള സൂചനകള്‍ ലഭ്യമാകുന്നത് .

അന്വേഷണ സംഘത്തിന് ലഭിച്ച സൂചന കേസിന്റെ മുന്നോട്ട് പോക്കിനെ സുഗമമാക്കാന്‍ കഴിയും എന്ന് തന്നെയാണ് വ്യക്തമാവുന്നത് .സ്വപ്നയുടെ പേരിലുള്ള 2 ലോക്കറുകള്‍ ബിസിനസ് ഇടപാടുകളില്‍ പങ്കാളികളായ 2 വ്യക്തികള്‍ക്കു വേണ്ടിയുള്ള കള്ളപ്പണം സൂക്ഷിക്കാന്‍ എടുത്തതാണെന്ന് എന്‍ഫോഴ്‌സമെന്റ് ഡയറക്ടറേറ്റിന്റെ നിഗമനം. ഇതില്‍ ഒരു ലോക്കറില്‍ നിന്നു 36.5 ലക്ഷം രൂപയും രണ്ടാമത്തെതില്‍ നിന്നു 64 ലക്ഷം രൂപയുമാണു ദേശീയ അന്വേഷണ ഏജന്‍സി കണ്ടെത്തിയത്.എന്നാല്‍ ഇതില്‍ കൂടുതല്‍ തുക ഉണ്ടായിരുന്നിരിക്കണം എന്ന വിലയിരുത്തലിലാണ് ഇപ്പോള്‍ അന്വേഷണ സംഘം .

കേസിലെ നിര്‍ണായക തെളിവുകളില്‍ ഒന്ന് ഈ ലോക്കറുകള്‍ തന്നെയായിരുന്നു .ഇപ്പോഴും അന്വേഷണ സംഘത്തെ വഴി തെറ്റിക്കാനുള്ള ശ്രമം നടത്തി വരുന്ന സ്വപ്ന സംരക്ഷിക്കാന്‍ ശ്രമിക്കുന്ന വ്യക്തികളില്‍ രണ്ടുപേര്‍ തന്നെയാണിവര്‍ എന്നാണ് മനസ്സിലാക്കാന്‍ കഴിയുന്നത് .കേസുമായി ബന്ധപ്പെട്ട് ഇതുവരെ അന്വേഷണ ഏജന്‍സികളുടെ മുന്നില്‍ വെളിപ്പെടാത്ത 2 വ്യക്തികള്‍ക്കു വേണ്ടിയാണു സ്വപ്ന ഈ തുക സൂക്ഷിച്ചതെന്നാണു പ്രാഥമിക നിഗമനം. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിന്റെ നിര്‍ദേശപ്രകാരം സ്വപ്നയ്‌ക്കൊപ്പം ലോക്കര്‍ തുറന്ന ചാര്‍ട്ടേഡ് അക്കൗണ്ടന്റിന്റെ മൊഴികളിലും ഇക്കാര്യം വ്യക്തമായിട്ടില്ല.

അതിനാല്‍ ഇപ്പോഴും പല തരത്തിലുള്ള ഒത്തുകളികള്‍ നടക്കുന്നതായി വ്യക്തമായിരിക്കുകയാണ് .സ്വപ്നയുടെ രണ്ട് ലോക്കറില്‍ നിന്നുമായി കണ്ടെത്തിയഈ തുക ലൈഫ് മിഷന്‍ പദ്ധതിക്കു വേണ്ടി റെഡ് ക്രസന്റ് നിര്‍മിച്ചു കൈമാറുന്ന വീടുകളുടെ കരാര്‍ ലഭിച്ച യൂണിടാക് കമ്പനി നല്‍കിയതാണെന്നാണു മൊഴി നല്‍കിയത് . എന്നാല്‍ ഈ തുക സ്വപ്നയ്ക്കു ലഭിച്ച കമ്മിഷനോ യുഎഇ കോണ്‍സുല്‍ ജനറല്‍ നല്‍കിയ സമ്മാനമോ അല്ലെന്നാണ് ഇഡിയുടെ നിഗമനം. കേസിലെ പ്രതികളായ സ്വപ്ന, സരിത്ത്, സന്ദീപ് എന്നിവര്‍ക്കു കമ്മിഷന്‍ കൈമാറിയതു ബാങ്ക് അക്കൗണ്ടിലൂടെയാണെന്നാണു യൂണിടാക് ഉടമ നല്‍കിയ മൊഴി.

ഈ ബാങ്ക് ഇടപാടിന്റെ രേഖകളും അവര്‍ അന്വേഷണ ഏജന്‍സിക്കു കൈമാറി.എന്നാല്‍ 20 കോടി രൂപയുടെ കരാറിനു 4.25 കോടി രൂപ കമ്മിഷന്‍ നല്‍കിയെന്ന യൂണിടാക്കിന്റെ മൊഴി അന്വേഷണ സംഘം ഒരുതരത്തിലും വിശ്വസിച്ചിട്ടില്ല. സ്വര്‍ണക്കടത്ത് ഇടപാടില്‍ യൂണിടാക്കും പണം മുടക്കിയിട്ടുണ്ടോയെന്നാണ് ഇഡിയും കസ്റ്റംസും പരിശോധിക്കുന്നത്. ബാങ്കിലൂടെ കൈമാറിയ തുകയ്ക്കു പുറമേ 3.50 കോടി യൂണിടാക് ഡോളറും രൂപയുമായി കൈമാറിയെന്നാണു മൊഴി. ഇത് ആര്‍ക്കു വേണ്ടിയെന്നും അന്വേഷിക്കും.ഇതിലൂടെ ലൈഫ് മിഷനുമായി ബന്ധപ്പെട്ട തട്ടിപ്പില്‍ കൂടുതല്‍ വ്യക്തത വരും എന്ന് തന്നെയാണ് അന്വേഷണ സംഘത്തിന്റെ നിഗമനം .