ഒറ്റ ചോദ്യം ചെയ്യലില്‍ എല്ലാം മണിമണിയായി പറഞ്ഞ് പുറത്തിറങ്ങി ചാനലുകാരെ കാണാനിരുന്ന ബിനീഷ് കോടിയേരിയെ വരിഞ്ഞ് മുക്കിയത് എന്‍ഫോഴ്‌സ്‌മെന്റ് ഡയറക്ടറേറ്റിന്റെ 11 മണിക്കൂറിനുള്ളില്‍ ചോദിച്ച 19 ചോദ്യങ്ങളാണ്. ഉത്തരമില്ലാതെ ആ 19 ചോദ്യങ്ങളില്‍ തട്ടി ബിനീഷ് കോടിയേരി വീഴുകയായിരുന്നു. പണമിടപാടുകളുമായി ബന്ധപ്പെട്ട എന്‍ഫോഴ്‌സ്‌മെന്റ് ഡയറക്ടറേറ്റിന്റെ ആ 19 ചോദ്യങ്ങള്‍ക്ക് ബിനീഷ് വ്യക്തമായ ഉത്തരം നല്‍കാനായില്ല. ബിനീഷിന്റെ സാമ്പത്തിക ഇടപാടുകളെക്കുറിച്ചും ബിസിനസ് സംരംഭങ്ങളെക്കുറിച്ചും ഒരുമാസമായി ഇ.ഡി അന്വേഷിക്കുകയായിരുന്നു. ബിസിനസ് പങ്കാളികളില്‍ നിന്നും വിവരങ്ങള്‍ ശേഖരിച്ചിരുന്നു. ഇവരുടെ മൊഴികള്‍ക്ക് വിരുദ്ധമായ വിവരങ്ങളാണ് ഈ 19 ചോദ്യങ്ങള്‍ക്കും ബിനീഷ് നല്‍കിയത്. ഇതോടെ ബിനീഷ് വെട്ടിലാകുകയായിരുന്നു. ബിനീഷിനെ ചോദ്യം ചെയ്യാനൊരുങ്ങിയിരിക്കുകയാണ് എന്‍ഐഎയും നാര്‍ക്കോട്ടിക് കണ്‍ട്രോള്‍ ബൂറോയും. അവരുടെ ചോദ്യം ചെയ്യലില്‍ കുടുങ്ങിയാല്‍ കുടുങ്ങിയത് തന്നെ.

അതിനാലാണ് ബിനാമി, കള്ളപ്പണ ഇടപാടുകളില്‍ ബിനീഷ് കോടിയേരിക്ക് ക്ലീന്‍ചിറ്റ് നല്‍കാത്തത്. തെളിവുകളും മൊഴികളും കൂട്ടിയിണക്കി കുരുക്ക് മുറുക്കാന്‍ വിശദ അന്വേഷണത്തിന് എന്‍ഫോഴ്‌സ്‌മെന്റ് ഡയറക്ടറേറ്റ് ഒരുങ്ങുകയാണ്. ബിനീഷുമായി സാമ്പത്തിക ഇടപാടുകളുള്ള ഒരു ഡസനിലേറെ പേരുടെ വിവരങ്ങള്‍ ശേഖരിച്ച ഇ.ഡി, ഇത്തരം ഇടപാടുകളുടെ വിശദാംശങ്ങളാണ് തേടുന്നത്. യു.എ.ഇ കോണ്‍സുലേറ്റുമായി സാമ്പത്തിക ഇടപാടുള്ള കമ്പനികളുമായി ബിനീഷിനുള്ള ബിനാമി ബന്ധവും അന്വേഷിക്കും. കോണ്‍സുലേറ്റില്‍ വിസ സ്റ്റാമ്പിംഗ് കരാര്‍ ലഭിച്ച യു.എ.എഫ്.എക്‌സ് സൊല്യൂഷന്‍സ്, സ്വര്‍ണക്കടത്ത് പ്രതി സ്വപ്നയ്ക്ക് ലക്ഷങ്ങള്‍ കോഴ നല്‍കിയതിനെക്കുറിച്ചും അന്വേഷണമുണ്ട്.

ബി കാപ്പിറ്റല്‍ ഫിനാന്‍സ് സര്‍വീസസ്, ബി.ഇ കാപ്പിറ്റല്‍ ഫോറെക്‌സ് ട്രേഡിംഗ്, ടോറസ് റെമഡീസ്, ബുള്‍സ് ഐ കോണ്‍സെപ്ട്‌സ് എന്നീ കമ്പനികളുമായി ബിനീഷിന് ദുരൂഹ ബന്ധങ്ങളുണ്ടെന്നാണ് ഇ.ഡി നിഗമനം. അനധികൃത പണമിടപാടിനായി തുടങ്ങിയതാണ് കമ്പനികളെന്നാണ് കണ്ടെത്തല്‍.

തിരുവനന്തപുരം കേശവദാസപുരത്തെ ഹോട്ടല്‍ ഉടമയുടെ പേരിലാണ് യു.എ.ഇ വിസ സ്റ്റാമ്പിംഗിനുള്ള കമ്പനി. ഹോട്ടലുടമ ബിനീഷിന്റെ ബിനാമിയാണെന്നാണ് കരുതപ്പെടുന്നത്. ഇയാളെ ചോദ്യം ചെയ്തപ്പോള്‍ ബിനീഷിന്റെ ഇടപാടുകളെക്കുറിച്ച് നിര്‍ണായക വിവരങ്ങള്‍ ലഭിച്ചിരുന്നു. ബംഗളൂരുവിലെ രണ്ട് പണമിടപാട് സ്ഥാപനങ്ങള്‍ വഴി കള്ളപ്പണം വെളുപ്പിച്ചെന്നും വിവരം കിട്ടിയിട്ടുണ്ട്.

ബംഗളൂരു ലഹരിമരുന്ന് കേസിലെ പ്രധാനപ്രതിയായ കൊച്ചി സ്വദേശി മുഹമ്മദ് അനൂപിന് ബംഗളൂരുവില്‍ ഹോട്ടല്‍ തുടങ്ങാന്‍ ലക്ഷങ്ങള്‍ നല്‍കിയതായി ബിനീഷ് വെളിപ്പെടുത്തിയിരുന്നു. ഇത്തരം വന്‍ സഹായങ്ങള്‍ നല്‍കാന്‍ ബിനീഷിനുള്ള സാമ്പത്തിക ഉറവിടം എന്താണെന്നും ഇ.ഡി അന്വേഷിക്കുകയാണ്.

ഇതോടെയാണ് ഒരാഴ്ചയ്ക്കു ശേഷം ബിനീഷിനെ ചോദ്യം ചെയ്യാന്‍ വീണ്ടും വിളിപ്പിക്കാന്‍ തീരുമാനിച്ചത്. കഴിഞ്ഞ ദിവസം കൊച്ചിയില്‍ 11 മണിക്കൂര്‍ നീണ്ട ചോദ്യം ചെയ്യലില്‍ ബിനീഷിന്റെ മൊഴികളില്‍ വൈരുദ്ധ്യം കണ്ടെത്തി. മൊഴികളില്‍ പലതിനും വിശ്വാസ്യതയില്ല. കേരളത്തിലേക്കുള്ള ലഹരിക്കടത്ത്, നയതന്ത്ര ചാനലിലൂടെയുള്ള സ്വര്‍ണക്കടത്ത്, മലയാള സിനിമയിലെ ലഹരി ഉപയോഗം എന്നിവയെക്കുറിച്ചുള്ള ചോദ്യങ്ങള്‍ക്കു ലഭിച്ച മറുപടികള്‍ തൃപ്തികരമായിരുന്നില്ലെന്നും ഇ.ഡി ഉദ്യോഗസ്ഥര്‍ പറയുന്നു.

സാമ്പത്തിക റൂട്ട്മാപ്പ് പരിശോധന നടത്തി ബിനാമി, കള്ളപ്പണ ഇടപാടുകള്‍ കണ്ടെത്തി ശക്തമായ നടപടികളെടുക്കാന്‍ ഇ.ഡിക്ക് കഴിയും. സംശയിക്കുന്നവരുടെയും കുടുംബാംഗങ്ങളുടെയും ബിസിനസ് പങ്കാളികളുടെയും സ്വത്ത് വരവ് കണക്കെടുപ്പും കള്ളപ്പണം തേടിയുള്ള റെയ്ഡുകളും ഉണ്ടാവും. സംശയമുള്ള ആരുടെയും 'സാമ്പത്തിക റൂട്ട്മാപ്പ്' പരിശോധിക്കുന്നതാണ് ഇ.ഡിയുടെ രീതി. വരവിനേക്കാള്‍ 20 ശതമാനത്തിലേറെ സ്വത്തുണ്ടെങ്കില്‍ ഇ.ഡിക്ക് വിശദമായ സ്വത്തു പരിശോധന നടത്താം. കള്ളപ്പണക്കേസില്‍ മൂന്നുമുതല്‍ ഏഴുവരെ വര്‍ഷം ശിക്ഷ കിട്ടാം. ഇതിന് പിന്നാലെയാണ് എന്‍ഐഎയുടേയും നാര്‍ക്കോട്ടിക് കണ്‍ട്രോള്‍ ബ്യൂറോയുടേയും വരവ്.