കേരളത്തില്‍ ഗവര്‍ണറുടെ പവര്‍ എന്തെന്ന് കാണിച്ചു തന്ന അപൂര്‍വം ഗവര്‍ണര്‍മാരില്‍ ഒരാളാണ് ആരിഫ് മുഹമ്മദ് ഖാന്‍. കൊടിവച്ച സംസ്ഥാന സര്‍ക്കാരിനെ നിരന്തരം വെള്ളം കുടിപ്പിച്ച മറ്റൊരു ഗവര്‍ണര്‍ വേറെയില്ല. മാത്രമല്ല രാജ്ഭവനില്‍ പത്രക്കാരെ വിളിച്ച് ഇന്റര്‍വ്യൂവും നല്‍കി. അന്ന് ഗവര്‍ണറെ മാറ്റണമെന്ന് ഭരണപക്ഷവും പ്രതിപക്ഷവും ഒരുപോലെ പറഞ്ഞു. പക്ഷെ ഗവര്‍ണറെ ആര് മാറ്റാന്‍. കേന്ദ്ര സര്‍ക്കാര്‍ ആരിഫ് മുഹമ്മദ് ഖാന് ശക്തമായ പിന്തുണയാണ് നല്‍കിയത്.

ചട്ടങ്ങള്‍ ലംഘിച്ച് ഒരു വിദേശ രാജ്യവുമായി ഇടപാടുകള്‍ നടത്തിയതിന്റെ പേരില്‍ എന്‍ഫോഴ്‌സ്‌മെന്റ് ഡയറക്ടറെറ്റ് ഒരു മന്ത്രിയെ ചോദ്യം ചെയ്യുന്നത് കേരളത്തിന്റെ ചരിത്രത്തില്‍ ഇതാദ്യമാണ്. കെടി ജലീലിനെ എന്‍ഫോഴ്‌സ്‌മെന്റ് ചോദ്യം ചെയ്തതോടെ എല്ലാ കണ്ണുകളും ഗവര്‍ണറില്‍ കേന്ദ്രീകരിക്കുകയാണ്. ഗവര്‍ണര്‍ ഈ വിഷയത്തില്‍ കടുത്ത നിലപാട് സ്വീകരിക്കുമോ എന്ന ആശങ്ക സര്‍ക്കാരിനെയും അലട്ടുന്നുണ്ട്.

പൗരത്വ നിയമത്തില്‍ ഗവര്‍ണര്‍ കടുത്ത നിലപാട് സ്വീകരിച്ചതിനെ തുടര്‍ന്ന് സര്‍ക്കാരിന് മുട്ട് മടക്കേണ്ടി വന്നിരുന്നു. സ്വര്‍ണക്കടത്തും പ്രോട്ടോക്കോള്‍ ലംഘനവുമായി ബന്ധപ്പെട്ട് കേന്ദ്ര ഏജന്‍സിയായ ഇഡി ചോദ്യം ചെയ്തതോടെ ഗവര്‍ണര്‍ എന്തു നിലപാട് സ്വീകരിക്കും എന്ന ആശങ്ക സര്‍ക്കാരില്‍ ശക്തമാണ്. പ്രതിപക്ഷ പാര്‍ട്ടികള്‍ മന്ത്രിയുടെ രാജി ആവശ്യപ്പെടുകയും ബിജെപി രാജി ആവശ്യപ്പെട്ടു ഇന്നു മുതല്‍ സമരം തുടങ്ങുകയും ചെയ്തതോടെയാണ് ഗവര്‍ണറുടെ നിലപാട് എന്താണ് എന്നറിയാന്‍ ഭരണവൃത്തങ്ങളില്‍ ആകാംക്ഷ കനക്കുന്നത്.

വിദേശകാര്യ മന്ത്രാലയത്തിന്റെ അനുമതിയില്ലാതെ വിദേശത്തുനിന്നും മതഗ്രന്ഥം കൊണ്ടുവന്നതുമായി ബന്ധപ്പെട്ടാണ് ഇഡി മന്ത്രിയെ ചോദ്യം ചെയ്തത്. സംസ്ഥാനത്തിന്റെ ഭരണം നടത്തുന്നത് മുഖ്യമന്ത്രി ആണെങ്കിലും സംസ്ഥാനത്തിന്റെ യഥാര്‍ത്ഥ നാഥന്‍ ഗവര്‍ണറാണ്. ഗുരുതരമായ പ്രോട്ടോക്കോള്‍ ലംഘനത്തിന്റെ പേരില്‍ ജലീലിനെതിരെ നടപടി വേണമെന്ന് ഗവര്‍ണര്‍ക്ക് മുഖ്യമന്ത്രിയോട് ആവശ്യപ്പെടാം. പരാതി ലഭിച്ചതിന്റെ പേരില്‍ ഇടപെടാം. സ്വമേധയാ വേണമെങ്കിലും ഇടപെടാം. മന്ത്രി ജലീല്‍ രാജി തേടി എന്തെങ്കിലും നീക്കങ്ങള്‍ ഗവര്‍ണറുടെ ഭാഗത്ത് നിന്നും വരുമെന്നാണ് രാഷ്ട്രീയ കേന്ദ്രങ്ങളും നിയമവൃത്തങ്ങളും ഉറ്റുനോക്കുന്നത്. മന്ത്രിക്ക് അധികാരത്തില്‍ തുടരാനാവില്ലെന്നതാണ് ഇഡിയുടെ ചോദ്യം ചെയ്യല്‍ വഴി സൃഷ്ടിക്കപ്പെട്ടിരിക്കുന്നത്.

ജലീല്‍ പ്രശ്‌നത്തില്‍ ഗവര്‍ണര്‍ എന്ത് നടപടി സ്വീകരിക്കും എന്നാണ് ഇനി അറിയാനുള്ളത്. ഗവര്‍ണര്‍ ആരിഫ് മുഹമ്മദ്ഖാനും കേരള സര്‍ക്കാരും തമ്മില്‍ ഇപ്പോള്‍ സുഖകരമായ ബന്ധമാണുള്ളത്. പക്ഷെ വിദേശകാര്യ മന്ത്രാലയത്തിന്റെ അനുമതിയില്ലാതെ ഒരു സംസ്ഥാന മന്ത്രിക്ക് മറ്റൊരു രാജ്യവുമായി നേരിട്ട് ഇടപെടലുകള്‍ നടത്താന്‍ കഴിയില്ല. അത് പ്രോട്ടോക്കോളിന്റെ നഗ്‌നമായ ലംഘനമാണ്. ഇത്തരം ഒരു ലംഘനമാണ് മന്ത്രി ജലീല്‍ നടത്തിയത്. മറ്റൊരു വിദേശ രാജ്യവുമായി എങ്ങനെ ബന്ധപ്പെടാം എന്ന് പ്രോട്ടോക്കോളില്‍ വ്യക്തമായി പ്രതിപാദിച്ചിട്ടുണ്ട്. ഇതൊന്നും അറിയില്ലെന്ന് മന്ത്രിക്ക് പറയാന്‍ കഴിയില്ല. നിയമപരമായി നോക്കുകയാണെങ്കില്‍ മന്ത്രിസഭയില്‍ നിന്നുള്ള മന്ത്രിയുടെ രാജി അനിവാര്യമാണ്. ഇതിനു മുഖ്യമന്ത്രി തയ്യാറായില്ലെങ്കില്‍ ഗവര്‍ണര്‍ക്ക് ഇടപെടാം കഴിയും. അത്തരം ഇടപെടല്‍ ഗവര്‍ണറുടെ ഭാഗത്ത് നിന്നും വന്നാല്‍ അത് സര്‍ക്കാരിനു സുഖകരമായ ഒരു അനുഭവമാകില്ല. സംസ്ഥാനത്തിന്റെ നാഥന്‍ എന്ന നിലയില്‍ ഗവര്‍ണര്‍ക്ക് മുഖ്യമന്ത്രിക്ക് ഉപദേശം നല്‍കാം. പക്ഷെ ഗവര്‍ണര്‍ അതിനു തയ്യാറാകുമോ എന്നാണ് അറിയാനുള്ളത്.

മന്ത്രി ജലീല്‍ രാജിവെയ്ക്കണമെന്ന് ആവശ്യപ്പെട്ട് പ്രതിപക്ഷം രംഗത്ത് വന്നിട്ടുണ്ട്. ധാര്‍മ്മികതയുടെ ഒരു കണികയെങ്കിലും അവശേഷിക്കുന്നുണ്ടെങ്കില്‍ മന്ത്രി ജലീല്‍ ഒരു നിമിഷം പോലും വൈകാതെ രാജി വയ്ക്കണമെന്നാണ് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടത്. തലയില്‍ മുണ്ടിട്ടാണ് ജലീല്‍ ചോദ്യം ചെയ്യലിന് എത്തിയത്. ഈ സംഭവം കേരളത്തിന് നാണക്കേടാണെന്നാണ് പ്രതിപക്ഷം പറയുന്നത്. ഇതിന് പിന്നാലെ പ്രതിപക്ഷവും ബിജെപിയും ഗവര്‍ണറെ കാണാനും സാധ്യതയുണ്ട്. സെക്രട്ടറിയേറ്റ് തീപിടുത്തത്തിന്റെ സമയത്തും പ്രതിപക്ഷം ഗവര്‍ണറെ കണ്ടിരുന്നു. ഇതുംകൂടിയാകുമ്പോള്‍ ഗവര്‍ണര്‍ ശക്തമായ നടപടികളിലേക്ക് നീങ്ങുമോയെന്ന് കാത്തിരുന്ന് കാണാം.