ഉന്നത വിദ്യാഭ്യാസ വകുപ്പ് മന്ത്രി കെടി ജലീലിനെ നമുക്ക് എല്ലാവര്‍ക്കും അറിയാം. വലിയ പഠിപ്പും വിവരോം ഉള്ള ആളാണ്. ലോക് ഡൗണ്‍ കാലത്ത് കോളേജ് വിദ്യാര്‍ത്ഥികള്‍ക്ക് ക്ലാസ് പോലും എടുത്ത് കയ്യടി നേടി. പക്ഷെ അങ്ങനെയാണോ സ്വപ്ന. പത്തു പോലും കടന്നിട്ടില്ലെന്നാണ് പൊന്നാങ്ങള പറഞ്ഞത്. അങ്ങനെയുള്ള സ്വപ്ന സുരേഷ് പഠിപ്പും വിവരവുമുള്ള ജലീലിനെ കണക്കില്‍ തോല്‍പ്പിച്ചിരിക്കുകയാണ്. കണ്ടുപിടിച്ചതാകട്ടെ എന്‍ഫോഴ്‌സമെന്റും.

അതായത് സ്വപ്ന സുരേഷ് കൊടുത്തയച്ച മതഗ്രന്ഥങ്ങളുടെ കിറ്റിലെ കണക്കുകളാണ് സ്വപ്ന തെറ്റിച്ചത്. ഈ പായ്ക്കുകള്‍ കടത്തിയതാകട്ടെ സര്‍ക്കാര്‍ വാഹനത്തിലും. ഇതിനുള്ളില്‍ സ്വപ്ന ജലീലിന്റെ കണക്കുകൂട്ടല്‍ തെറ്റിച്ച് സ്വര്‍ണം കടത്തിയെന്നാണ് കരുതുന്നത്. ഡിപ്ലോമാറ്റിക് കാര്‍ഗോ ആയി 250 പാക്കറ്റുകളില്‍ മതഗ്രന്ഥമെന്ന പേരില്‍ 4478 കിലോ കാര്‍ഗോയാണ് കോണ്‍സുലേറ്റ് ജനറലിന്റെ പേരില്‍ സ്വപ്ന എത്തിച്ചത്. രേഖകളില്‍ ഓരോ പാക്കറ്റിനും തൂക്കം 17.91കിലോ. സിആപ്റ്റില്‍ നിന്ന് കസ്റ്റംസ് പിടിച്ചെടുത്ത ഒരു മതഗ്രന്ഥത്തിന് തൂക്കം 576ഗ്രാം. ഒരു പാക്കറ്റില്‍ 31 ഗ്രന്ഥങ്ങള്‍. 250പാക്കറ്റുകളുടെ തൂക്കം 4464 കിലോഗ്രാം. എയര്‍വേ ബില്ലിലെ തൂക്കവും സാമ്പിള്‍ പരിശോധനയിലെ തൂക്കവും തമ്മില്‍ 14 കിലോയുടെ വ്യത്യാസം. സി ആപ്റ്റ് എത്തിച്ച 32പാക്കറ്റുകളില്‍ 992മതഗ്രന്ഥങ്ങള്‍. 250 പാക്കറ്റുകളിലെ 7750 മതഗ്രന്ഥങ്ങളില്‍ ശേഷിച്ച 6758എണ്ണം എവിടെ? ഇവിടെയാണ് കണക്കുകള്‍ സ്വര്‍ണത്തിലേക്ക് പോകുന്നത്.



ഇ.ഡിയ്ക്ക് സംശയം ബലപ്പെടുന്നതും അതാണ്. പ്രോട്ടോക്കോള്‍ ഓഫീസറുടെ ക്ലിയറന്‍സില്ലാതെ കള്ളക്കടത്തായി എത്തിച്ച കാര്‍ഗോയില്‍ മതഗ്രന്ഥങ്ങളുടെ മറവില്‍ സ്വര്‍ണവും വിദേശകറന്‍സിയും കടത്തിയോ എന്നാണ് അന്വേഷണ സംഘത്തിന്റെ സംശയം. ലോക്ക്ഡൗണിലെ പൊലീസ് പരിശോധന ഒഴിവാക്കാന്‍ കേരളാസ്‌റ്റേറ്റ് ബോര്‍ഡ് വച്ച അടച്ചുമൂടിയ ലോറി ഉപയോഗിച്ചോ എന്നും അന്വേഷിക്കുന്നുണ്ട്. ജലീലുമായി വിദേശത്ത് ദുരൂഹമായ ഇടപാടുകള്‍ നടത്തിയിട്ടുണ്ടോ വിമാനത്താവളങ്ങളില്‍ മന്ത്രിയുടെ ഗ്രീന്‍ചാനല്‍ സൗകര്യം ദുരുപയോഗിച്ചോ എന്നതും സംശയമാണ്. പ്രോട്ടോക്കോള്‍ ലംഘിച്ച് കോണ്‍സുലേറ്റ് ജനറലുമായി സൗഹൃദമുണ്ടാക്കിയ ജലീല്‍, മറ്റെന്തെങ്കിലും ക്രമക്കേടുകള്‍ നടത്തിയോ എന്നും അന്വേഷണ സംഘം സംശയിക്കുന്നുണ്ട്. ഈ സംശയങ്ങളാണ് ജലീലിന് കുരുക്കായത്. അതാണ് ക്ലീന്‍ ചിറ്റ് നല്‍കാത്തതും വീണ്ടും ചോദ്യം ചെയ്യാന്‍ വിളിപ്പിക്കുന്നതും.

അതേസമയം കേന്ദ്രാനുമതിയില്ലാതെ യു.എ.ഇയില്‍ നിന്ന് വിദേശസഹായം സ്വീകരിച്ചതിന് ജലീലിനെതിരെ എന്‍ഫോഴ്‌സ്‌മെന്റ് ഡയറക്ടറേറ്റ് കേസെടുത്തേക്കുമെന്ന സൂചനയുണ്ട്. നൂറ് ഭക്ഷ്യകിറ്റുകളുടെ വിലയായി അഞ്ചുലക്ഷം രൂപയുടെ ഇടപാട് യു.എ.ഇ കോണ്‍സുല്‍ ജനറലുമായി ജലീല്‍ നടത്തിയത് ചട്ടവിരുദ്ധമാണ്. കേന്ദ്രാനുമതിയില്ലാതെ വിദേശസഹായം സ്വീകരിച്ചതിനെക്കുറിച്ച് കേന്ദ്രധനമന്ത്രാലയം പ്രാഥമികഅന്വേഷണം നടത്തിയശേഷം ഇ.ഡിയോട് വിശദ അന്വേഷണത്തിന് നിര്‍ദ്ദേശിച്ചു. ഇതേക്കുറിച്ച് വിശദമായ മൊഴി ഇ.ഡി രേഖപ്പെടുത്തി. ജലീലിനെതിരെ ഇ.ഡി കേസെടുക്കുമെന്നാണ് സൂചന.

വിദേശസഹായ നിയന്ത്രണചട്ടം പ്രകാരം ചട്ടപ്രകാരം പണം, ഉപകാരം, സമ്മാനം, സേവനം എന്നിങ്ങനെ ഏതുതരം വിദേശസഹായവും സ്വീകരിക്കാന്‍ വിദേശകാര്യ, ആഭ്യന്തര മന്ത്രാലയങ്ങളുടെ മുന്‍കൂര്‍ അനുമതി വേണം. ഇതിനുള്ള അപേക്ഷ ധനമന്ത്രാലയം പരിശോധിച്ച് കേന്ദ്ര ആഭ്യന്തര മന്ത്രാലയത്തിന് കൈമാറും. വിദേശസഹായം രാജ്യവിരുദ്ധ പ്രവര്‍ത്തിനത്തിനാണോ എന്നടക്കം പരിശോധിച്ച് ക്ലിയറന്‍സ് നല്‍കേണ്ടത് ആഭ്യന്തരമന്ത്രാലയമാണ്. ഈ നടപടികളെല്ലാം ലംഘിച്ചതിനാലാണ് ജലീലിനെതിരെ അന്വേഷണം. മാത്രമല്ല ജലീലിനെ വീണ്ടും ചോദ്യം ചെയയാന്‍ വിളിക്കുമെന്നാണ് പറയുന്നത്. അങ്ങനെയെന്തെങ്കിലും ഉണ്ടായിട്ടുണ്ടെങ്കില്‍ ജലീലിന്റെ കാര്യം ഓക്കെയാകും. പിന്നെ പാര്‍ട്ടിക്കോ സര്‍ക്കാരിനോ ജലീലിനെ രക്ഷിക്കാനാകില്ല.