ഇന്നത്തെ മനോരമ പത്രം കണ്ട് സകലരുടേയും കണ്ണ് മഞ്ഞളിച്ചിരിക്കുകയാണ്. ബിനീഷ് കോടിയേരിയ്ക്കും മന്ത്രി കെടി ജലീലിനും പിന്നാലെ ഒരു മന്ത്രി പുത്രന്‍ കൂടി വാര്‍ത്തകളില്‍ നിറയുകാണ്. സ്വപ്നയ്‌ക്കൊപ്പം ഹോട്ടലില്‍ മന്ത്രിപുത്രന്‍, ചിത്രങ്ങള്‍; 4 കോടി കമ്മിഷനിലും പങ്കുപറ്റി എന്നാണ് മനോരമ ബൈ ലൈനോട് കൂടി വാര്‍ത്ത നല്‍കിയിരിക്കുന്നത്. മാത്രമല്ല സ്വപ്നയുമൊത്തുള്ള മന്ത്രിപുത്രന്റെ ചിത്രങ്ങള്‍ അന്വേഷണ സംഘങ്ങള്‍ക്ക് ലഭിച്ചു എന്നുമാണ് പറയുന്നത്.

മനോരമ വാര്‍ത്തയുടെ പൂര്‍ണ രൂപം ഇങ്ങനെ

ലൈഫ് മിഷന്‍ പദ്ധതിയില്‍ കമ്മിഷനായി പോയെന്നു കരുതുന്ന 4 കോടി രൂപയുടെ പങ്കു പറ്റിയവരില്‍ സംസ്ഥാനത്തെ ഒരു മുതിര്‍ന്ന മന്ത്രിയുടെ മകനും ഉള്ളതായി കേന്ദ്ര അന്വേഷണ ഏജന്‍സികള്‍ക്കു സൂചന ലഭിച്ചു. സ്വര്‍ണക്കടത്തുകേസ് പ്രതി സ്വപ്ന സുരേഷും മന്ത്രിപുത്രനും തമ്മിലെ അടുത്ത സൗഹൃദം വ്യക്തമാക്കുന്ന ചിത്രങ്ങളടക്കമാണ് ലഭിച്ചത്.

തലസ്ഥാനത്ത് പ്രമുഖ സിനിമാ താരങ്ങളുടെ ഉടമസ്ഥതയിലുള്ള ഹോട്ടല്‍ മുറിയില്‍ വച്ചുള്ളതാണ് ചിത്രങ്ങളെന്നും വിവരം ലഭിച്ചു. ഇതു പരിശോധിക്കുകയാണെന്നും സ്വപ്നയുമായുള്ള ഇടപാടിനു കൂടുതല്‍ തെളിവുകള്‍ ലഭിക്കുന്ന മുറയ്ക്ക് മന്ത്രിപുത്രനെയും ചോദ്യം ചെയ്യാന്‍ വിളിപ്പിക്കുമെന്നുമാണു വിവരം.

ലൈഫ് മിഷന്‍ ഇടപാടില്‍ കമ്മിഷനായി 4 കോടി രൂപ കൈമറിഞ്ഞതില്‍ പ്രമുഖ പങ്ക് ഈ ആള്‍ക്ക് ഉണ്ടെന്നാണ് ഉദ്യോഗസ്ഥര്‍ കരുതുന്നത്. മന്ത്രി ദുബായില്‍ ഒരു യോഗത്തില്‍ പങ്കെടുക്കാന്‍ പോകുന്നതിനു മുന്‍പായിരുന്നത്രെ ഈ ഇടപാട്. സ്വപ്ന സുരേഷും മന്ത്രിപുത്രനും മറ്റൊരു ഇടനിലക്കാരനും ഹോട്ടല്‍ മുറിയില്‍ ഉണ്ടായിരുന്നു. ആദ്യം ഇവര്‍ക്കു കൈമറിഞ്ഞ 2 കോടിയില്‍ 30 ലക്ഷം ഈ മൂന്നാമനു നല്‍കാമെന്നായിരുന്നുവത്രെ വാഗ്ദാനം. ഇതു പക്ഷേ, മന്ത്രിപുത്രന്‍ ലംഘിച്ചതോടെയാണ് ചിത്രങ്ങള്‍ പുറത്തേക്കു പോയത്. ഇതില്‍ ചിലത് അന്വേഷണ സംഘത്തിനും കിട്ടി.

ലൈഫ് മിഷന്‍ ഇടപാടില്‍ യുണിടാക്കിന്റെയും റെഡ് ക്രസന്റിന്റെയും ഇടനിലക്കാരനായി പ്രവര്‍ത്തിച്ചിരുന്നത് മന്ത്രിപുത്രനാണെന്ന് അന്വേഷണ സംഘം കരുതുന്നു. കണ്ണൂരില്‍ ഒരു പ്രമുഖ റിസോര്‍ട്ടിന്റെ ചെയര്‍മാന്‍ കൂടിയാണ് ഇദ്ദേഹം. സ്വര്‍ണക്കടത്തു കേസില്‍ അന്വേഷണ പരിധിയിലുള്ള യുഎഎഫ്എക്‌സ് എന്ന വീസ സ്റ്റാംപിങ് ഏജന്‍സിയുടെ ഡയറക്ടര്‍ക്കും ഈ റിസോര്‍ട്ടില്‍ പങ്കാളിത്തമുണ്ടെന്നാണു സൂചന. വീസ സ്റ്റാംപിങ് കരാര്‍ യുഎഎഫ്എക്‌സിനു നേടിക്കൊടുത്തതിന്റെ കമ്മിഷന്‍ പണമാണ് ബാങ്ക് ലോക്കറില്‍ നിന്നു കണ്ടെത്തിയതെന്നു സ്വപ്ന മൊഴി നല്‍കിയിട്ടുണ്ട്.

തിരുവനന്തപുരം സ്വര്‍ണക്കടത്തു കേസ് 3 കേന്ദ്ര ഏജന്‍സികളാണ് അന്വേഷിക്കുന്നത്. കസ്റ്റംസ്, എന്‍ഐഎ, എന്‍ഫോഴ്‌സ്‌മെന്റ് ഡയറക്ടറേറ്റ്. 3 ഏജന്‍സികളുടെയും പക്കല്‍ മന്ത്രിപുത്രന് സ്വപ്ന സുരേഷുമായുള്ള ബന്ധത്തിന്റെ തെളിവുകള്‍ ലഭിച്ചിട്ടുണ്ടെന്നാണ് വിവരം.

ഇങ്ങനെ പോകുന്നതാണ് മനോരമ വാര്‍ത്ത. ബിനീഷ് കോടിയേരിയ്ക്കും മന്ത്രി കെടി ജലീലിനും പിന്നാലെ ഒരു മന്ത്രി പുത്രന്‍ കൂടി വന്നതോടെ കാര്യങ്ങള്‍ ജോറായി. അതായത് രണ്ട് മന്ത്രിമാരാണ് ഇപ്പോള്‍ ഉത്തരം പറയേണ്ടി വരുന്നത്.

അതേസമയം മന്ത്രി കെ.ടി. ജലീല്‍ എന്‍ഫോഴ്‌സ്‌മെന്റിന് നല്‍കിയ മൊഴി എന്ന നിലയില്‍ ചില മാധ്യമങ്ങളില്‍ വരുന്ന വാര്‍ത്തകള്‍ പച്ചക്കള്ളമാണെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞു. ജലീലിനെ വെള്ളപൂശാനുള്ള സിപിഎമ്മിന്റെ ചെപ്പടി വിദ്യയാണതെന്ന് അദ്ദേഹം പറഞ്ഞു. ജലീല്‍ പടച്ചുവിടുന്ന പുതിയ നാടകം. നേരത്തെ ഇതുപോലൊരു വാട്ട്‌സ് ആപ്പ് കള്ളക്കഥ ജലീല്‍ ഇറക്കിയതാണെന്നും അദ്ദേഹം പറഞ്ഞു .സത്യം ജയിക്കും എന്ന് സ്വപ്നയും നേരത്തെ പറഞ്ഞിരുന്നു. ഒപ്പം ഒരു കള്ളക്കഥയും . സ്വപ്നയും ജലീലും ഒരേ തൂവല്‍പ്പക്ഷികള്‍ തന്നെയാണ്. കള്ളക്കഥകള്‍ക്ക് ഏതാനും ദിവസത്തെ ആയുസുമാത്രമേയുള്ളുവെങ്കിലും അത്രയും ദിവസം കുറച്ചുപേരെയെങ്കിലും കബളിപ്പിക്കാമെന്നാണ് ജലീല്‍ കരുതുന്നതെന്നും കെ.സുരേന്ദ്രന്‍
പറഞ്ഞു. എന്തായാലും പുതിയ മന്ത്രി പുത്രന്റെ രംഗപ്രവേശനം പ്രതിപക്ഷവും ചാനലുകാരും ഉടന്‍ ആഘോഷിച്ച് തുടങ്ങും.