മലയാളികള്‍ക്ക് അത്ര പെട്ടന്നൊന്നും മറക്കാന്‍ കഴിയുന്ന ആളല്ല സരിത നായര്‍. സരിതാ നായര്‍ കഴിഞ്ഞ സര്‍ക്കാരിനെ മുള്‍മുനയില്‍ നിര്‍ത്തിയത് നമ്മളാരും മറന്നതല്ല. ഇപ്പോഴത്തെ ഭരണപക്ഷമായ അന്നത്തെ പ്രതിപക്ഷം സരിതാക്കാലം ആഘോഷിച്ചതാണ്. എന്തിന് ഒരുലക്ഷം പേരെ സെക്രട്ടറിയേറ്റ് പടിക്കലില്‍ കൊണ്ടു വന്ന് ഇപ്പം രാജിവയ്പ്പിക്കുമെന്ന് തോന്നിപ്പിച്ച നിമിഷം. പക്ഷെ എന്ത് സംഭവിക്കാന്‍. പാവം അബ്ദുള്ള കുട്ടിയ്ക്ക് മാത്രം വീണു പരിക്കേറ്റു. ബാക്കിയുള്ളവരെല്ലാം ഇപ്പോഴും വെല്ലുവിളിച്ച് ഇവിടേക്കത്തന്നെയുണ്ട്.

കാലം മാറിയതോടെ സ്വപ്ന സുരേഷ് എന്ന അവതാരം ഉണ്ടായിരിക്കുകയാണ്. സഖാക്കള്‍ ഒട്ടും പ്രതീക്ഷിക്കാത്ത അവതാരം. സ്വപ്ന കാലം പോലെ ഓരോ പ്രമുഖരുടെ പേരാണ് ദിവസവും പുറത്ത് വന്നുകൊണ്ടിരിക്കുന്നത്. സ്വപ്നയില്‍ തട്ടി പല പ്രമുഖരാണ് അന്വേഷണ സംഘത്തിന്റെ നോട്ടപ്പുള്ളികളായിരിക്കുന്നത്. ഈ സമയത്താണ് എംപിയും കോണ്‍ഗ്രസ് നേതാവുമായ കെ. മുരളീധരന്റെ പ്രതസ്താവന.

സ്റ്റണ്ടും സെക്‌സും നിറഞ്ഞൊരു സിനിമയാണ് ഈ ഭരണകാലമെന്നാണ് മുരളീധരന്‍ പറയുന്നത്. സ്വപ്നയുടെ പേരില്ലാത്ത ഒരു പദ്ധതി പോലും സര്‍ക്കാരിനില്ല. സ്വര്‍ണക്കടത്തു കേസുമായി ബന്ധപ്പെട്ട് മന്ത്രി കെ.ടി ജലീലിനെ ചോദ്യം ചെയ്തത് കേരളത്തിന് അപമാനമാണ്. മന്ത്രി ജലീല്‍ സ്വയം രാജിവയ്ക്കണം. അല്ലെങ്കില്‍ മുഖ്യമന്ത്രി പുറത്താക്കണമെന്നും നിരപരാധിയെങ്കില്‍ മന്ത്രി തലയില്‍ മുണ്ടിട്ട് ചോദ്യം ചെയ്യലിന് പോയതെന്തിനെന്നും അദ്ദേഹം ചോദിച്ചു.

മന്ത്രി പുത്രനും സ്വപ്ന സുരേഷും തമ്മില്‍ അടുത്ത ബന്ധമുള്ളതായി കാണിക്കുന്ന ചിത്രങ്ങള്‍ അന്വേഷണ ഏജന്‍സിക്ക് ലഭിച്ചു എന്ന മനോരമ വാര്‍ത്തക്ക് പിന്നാലെയാണ് മുരളീധരന്‍ ഇങ്ങനൊരു പ്രസ്താവന നടത്തിയത്. തിരുവനന്തപുരത്തെ സിനിമ താരങ്ങളുടെ ഹോട്ടല്‍ മുറിയിലുള്ള ചിത്രങ്ങളാണ് അന്വേഷണ ഏജന്‍സികള്‍ക്ക് ലഭിച്ചതെന്നാണ് വിവരം. കൂടുതല്‍ വിവരങ്ങള്‍ ലഭിക്കുന്നതിന് മന്ത്രി പുത്രനെയും ചോദ്യം ചെയ്യാന്‍ വിളിപ്പിക്കുമെന്ന വാര്‍ത്തകളാണ് പുറത്ത്.

മന്ത്രി പുത്രന്റെ പങ്ക് സംബന്ധിച്ച് വാര്‍ത്ത വന്നതോടെ ബിജെപി സംസ്ഥാന അധ്യക്ഷന്‍ കെ.സുരേന്ദ്രനും രംഗത്തെത്തി മന്ത്രി പുത്രനാരെന്ന് വെളിപ്പെടുത്തി. റെഡ്ക്രന്റ് ലൈഫ് മിഷന്‍ കമ്മീഷന്‍ ഇടപാടില്‍ വ്യവസായ വകുപ്പ് മന്ത്രി ഇപി ജയരാജന്റെ മകനും പങ്കുണ്ടെന്ന് കെ.സുരേന്ദ്രന്‍ പറഞ്ഞത്. സ്വര്‍ണക്കള്ളക്കടത്ത് കേസിലെ പ്രതി സ്വപ്നക്കൊപ്പം ലൈഫ് മിഷന്‍ ഇടപാടില്‍ ജയരാജന്റെ മകനും ഭീമമായ കമ്മീഷന്‍ ലഭിച്ചെന്ന വാര്‍ത്തകളാണ് പുറത്തു വരുന്നത്. ധനമന്ത്രി തോമസ് ഐസക്കിനെ സാക്ഷിയാക്കി കൈരളി ചാനല്‍ സിഇഒ ജോണ്‍ ബ്രിട്ടാസ് വെളിപ്പെടുത്തിയത് നാലരക്കോടി രൂപ കമ്മീഷന്‍ ലഭിച്ചെന്നാണെന്നും കെ. സുരേന്ദ്രന്‍ പറഞ്ഞു.

ബാക്കി പണം ആര്‍ക്കൊക്കെ എവിടെ വച്ച് നല്‍കിയെന്ന് കൈരളി ചാനല്‍ തന്നെ വെളിപ്പെടുത്തണം. മുഖ്യമന്ത്രി പിണറായി വിജയന്‍ ഇതുവരെ പറഞ്ഞത് അന്വേഷണം ശരിയായ വഴിയിലാണ് നടക്കുന്നതെന്നാണ്. എന്നാല്‍ സിപിഎം സംസ്ഥാന സെക്രട്ടറിയും സിപിഎം കേന്ദ്ര നേതൃത്വവും ഇപ്പോള്‍ എന്‍ഫോഴ്‌സ്‌മെന്റ് ഡയറക്ടറേറ്റിനെതിരെ രംഗത്തു വന്നിരിക്കുകയാണ്. അന്വേഷണം തങ്ങള്‍ക്കെതിരെ തിരിഞ്ഞപ്പോഴാണ് സിപിഎമ്മിന്റ നിലപാട് മാറ്റം. ഇക്കാര്യത്തില്‍ മുഖ്യമന്ത്രി അഭിപ്രായം പറയണമെന്ന് സുരേന്ദ്രന്‍ ആവശ്യപ്പെട്ടു.

എല്ലാക്കാലത്തും തങ്ങള്‍ക്കെതിരായി അന്വേഷണം നടത്തുന്നവരെ ഭീഷണിപ്പെടുത്തി വരുതിയിലാക്കാന്‍ സിപിഎം ശ്രമിക്കാറുണ്ട്. നിയമവാഴ്ചയൊടുള്ള വെല്ലുവിളിയും അന്വേഷണത്തെ സ്ഥിതിരിച്ചുവിടാനുള്ള നീക്കവുമാണിത്. അന്വേഷണം വമ്പന്‍ സ്രാവുകളിലേക്ക് എത്തുകയും കൂടുതല്‍ ഉന്നതര്‍ കടുങ്ങുകയും ചെയ്യുമെന്ന് ഉറപ്പായപ്പോഴാണ് അന്വേഷണ ഏജന്‍സിക്കെതിരായ സിപിഎം നീക്കം. മടിയില്‍ കനമില്ലാത്തവര്‍ക്ക് ഭയപ്പെടാനില്ലന്നും അന്വേഷണം മുറുകുമ്പോള്‍ മറ്റുള്ളവരുടെ നെഞ്ചിടിപ്പ് കൂടും എന്നുമുള്ള അഭിപ്രായത്തില്‍ മുഖ്യമന്ത്രി ഇപ്പോഴും ഉറച്ചു നില്‍ക്കുന്നുണ്ടോ എന്ന് സുരേന്ദ്രന്‍ ചോദിച്ചു. ഇതിനെല്ലാമുള്ള ഉത്തരങ്ങള്‍ വരും ദിവസങ്ങളില്‍ എത്തും.