സെക്രട്ടറിയേറ്റ് ഇന്നും യുദ്ധഭൂമി; മന്ത്രി കെ.ടി ജലീലിന്റെ രാജി ആവശ്യപ്പെട്ടു നടന്ന മാര്ച്ചുകള് അവസാനിച്ചത് സംഘര്ഷത്തില്; മഹിളാ മോര്ച്ച പ്രവര്ത്തകര് സെക്രട്ടറിയേറ്റിന്റെ മതില് ചാടിക്കയറാന് ശ്രമിച്ചു; മന്ത്രി ഇ.പി ജയരാജനെതിരെയും പ്രതിഷേധം
കനത്ത പോലീസ് കാവലില് മന്ത്രി കെ.ടി ജലീല് ഇന്നലെ തലസ്ഥാനത്ത് തിരിച്ചെത്തിയിരുന്നു. ഇതോടെ ഒരു ദിവസത്തെ ഇടവേളക്ക് ശേഷം ഇന്ന് സെക്രട്ടേറിയേറ്റ് വീണ്ടും യുദ്ധഭൂമിയായി. കെ.ടി.ജലീലിന്റെ രാജി ആവശ്യപ്പെട്ട് പ്രതിപക്ഷ സംഘടനകളുടെ നേതൃത്വത്തില് സെക്രട്ടറിയേറ്റിലേക്ക് പ്രതിഷേധ മാര്ച്ചുകള് നടന്നു. എല്ലാ മാര്ച്ചുകളും സംഘര്ഷത്തിലാണ് കലാശിച്ചു. സെക്രട്ടറിയേറ്റിലേക്ക് എംഎസ്ഫ്, മഹിളാമോര്ച്ച, കെ.എസ്.യു, എ.ബി.വി.പി തുടങ്ങിയ സംഘടനകള് മാര്ച്ച് നടത്തി. ഇന്ന് ആദ്യമെത്തിയത് എം.എസ്.എഫ് പ്രവര്ത്തകരാണ്. എംഎസ്എഫ് മാര്ച്ചിന് നേരെ പോലീസ് ജലപീരങ്കി പ്രയോഗിച്ചു. അതിന് പിന്നാലെയാണ് മഹിളാമോര്ച്ചയുടെ മാര്ച്ച് സെക്രട്ടറിയേറ്റിന് മുന്നിലെത്തിയത്. ബാരിക്കേഡുകള് തള്ളിവീഴ്ത്താനുളള ശ്രമം മഹിളാമോര്ച്ച പ്രവര്ത്തകരുടെ ഭാഗത്ത് നിന്നുണ്ടായി. സെക്രട്ടറിയേറ്റിലേക്ക് മതില് ചാടിക്കടക്കാന് ശ്രമിച്ച മഹിളാ മോര്ച്ച പ്രവര്ത്തകരെ ഏറെ പണിപ്പെട്ടാണ് പോലീസ് പിന്തിരിപ്പിച്ചത്. കെ.എസ്.യുവിന്റെ നേതൃത്വത്തിലുളള മാര്ച്ചിലും സംഘര്ഷമുണ്ടായി.
കെ.ടി.ജലീലിനെ ഇഡി ചോദ്യം ചെയ്ത വാര്ത്ത പുറത്തു വന്നതുമുതല് സംസ്ഥാനത്ത് മന്ത്രിയുടെ രാജി ആവശ്യപ്പെട്ട് പ്രതിഷേധം ആരംഭിച്ചിരുന്നു. ശനിയാഴ്ച സെക്രട്ടറിയേറ്റിലേക്ക് വിവിധ സംഘനകള് നടത്തിയ മാര്ച്ച് സംഘര്ഷത്തില് കലാശിച്ചിരുന്നു. എന്നാല് ഞായറാഴ്ച പ്രതിഷേധ പ്രകടനങ്ങള് ശക്തിപ്രാപിച്ചിരുന്നില്ല. തിങ്കളാഴ്ച മന്ത്രി തലസ്ഥാനത്തേക്ക് തിരിച്ചെത്തിയതോടെ പ്രതിഷേധം വീണ്ടും കനത്തിരിക്കുകയാണ്. പ്രതിഷേധങ്ങള് കനക്കുമ്പോഴും പുതിയ ആരോപണങ്ങള് ഉയരുമ്പോഴും മന്ത്രി കെ ടി ജലീല് മൗനം തുടരുകയാണ്. ഇന്നലെ രാത്രി തിരുവനന്തപുരത്ത് എത്തിയ ജലീല് കനത്ത പോലീസ് കാവലില് മന്ത്രി മന്ദിരത്തില് തുടരുകയാണ്. മന്ത്രിയുടെ രാജി വേണ്ടെന്ന നിലപാടില് സിപിഎമ്മും ഇടതുമുന്നണിയും ഉറച്ചു നില്ക്കുയാണ്.
ഇതിനിടെയാണ് സംസ്ഥാനത്ത് ആകെ പ്രതിഷേധം ശക്തമാകുന്നത്. തൃശൂര് കൊടുങ്ങല്ലൂരില് ബിജെപി മാര്ച്ചില് ബാരിക്കേഡ് തകര്ത്ത പ്രവര്ത്തകര്ക്ക് നേരെ പോലീസ് ജലപീരങ്കി പ്രയോഗിച്ചു. മലപ്പുറത്ത് എംഎസ്എഫ് മാര്ച്ചിന് നേരെ ലാത്തിചാര്ജും ഗ്രനേഡ് പ്രയോഗവും നടന്നു. മന്ത്രി ഇ.പി.ജയരാജിന്റെ രാജി ആവശ്യപ്പെട്ട് മട്ടന്നൂരില് പ്രതിഷേധവുമായെത്തിയ യൂത്ത് കോണ്ഗ്രസ് പ്രവര്ത്തകര്ക്ക് നേരെ ലാത്തിച്ചാര്ജും ജലപീരങ്കിയും പ്രയോഗിച്ചു. കോഴിക്കോട് നടന്ന എംഎസ്എഫ് മാര്ച്ചും സംഘര്ഷത്തിലാണ് കലാശിച്ചത്. പോലീസ് പ്രവര്ത്തകര്ക്ക് നേരെ ജലപീരങ്കിയും ഗ്രനേഡും പ്രയോഗിച്ചു.
കോട്ടയത്ത് എംഎസ്എഫിന്റെയും കെഎസ്!യുവിന്റെയും പ്രതിഷേധം നടന്നു. എം എസ് എഫ് പ്രവര്ത്തകര് കോട്ടയം കളക്ട്രേറ്റിലേക്ക് നടത്തിയ മാര്ച്ച് കളക്ട്രേറ്റ് ഗേറ്റില് പൊലീസ് തടഞ്ഞു. തുടര്ന്ന് നടന്ന പ്രതിഷേധ യോഗം മുസ്ലിം ലീഗ് ജില്ലാ പ്രസിഡന്റ് അസീസ് ബടായില് ഉദ്ഘാടനം ചെയ്തു. ഗാന്ധി സ്ക്വയറില് നടന്ന കെ.എസ്.യു പ്രതിഷേധ സംഗമം തിരുവഞ്ചൂര് രാധാകൃഷ്ണന് എംഎല്എ ഉദ്ഘാടനം ചെയ്തു. വൈകുന്നേരം നാല് മണി വരെയാണ് പ്രതിഷേധ സംഗമം. കട്ടപ്പന മിനി സിവില്സ്റ്റേഷനിലേക്ക് എബിവിപി നടത്തിയ മാര്ച്ചില് ലാത്തിചാര്ജ് ഉണ്ടായി. പ്രവര്ത്തകര് തല്ലിക്കയറാന് ശ്രമിച്ചത്തോടെയാണ് പോലീസ് ലത്തിവീശിയത്. തുടര്ന്ന് ഇവരെ അറസ്റ്റ് ചെയ്ത് നീക്കി. ഒമ്പത് പേരെയാണ് അറസ്റ്റ് ചെയ്തത്.
https://www.facebook.com/Malayalivartha
