കെ സുരേന്ദ്രന് മാനസികനില തെറ്റിയെന്ന മുഖ്യമന്ത്രിയുടെ പരാമര്‍ശത്തിനു പിന്നാലെ മുഖ്യമന്ത്രിക്ക് സ്ഥലകാല വിഭ്രാന്തിയുള്ളതുകൊണ്ടാണ് മറ്റുള്ളവര്‍ക്ക് മാനസികനില തെറ്റിയതായി തോന്നുന്നതെന്ന് ബിജെപി വക്താവ് ബി ഗോപാലകൃഷ്ണന്‍.

മുഖ്യമന്ത്രി ഖുറാന്‍ മുന്നില്‍ വെച്ച് വിരട്ടരുത്, മുഖ്യമന്ത്രി വിരട്ടിയാല്‍ പേടിക്കുന്നവരല്ല ബിജെപി. വിരട്ടലും വിലപേശലും ബി.ജെ.പിയോട് വേണ്ട, ഇത് പാര്‍ട്ടി വേറെയാണ്. സുരേന്ദ്രന് മാത്രമല്ല കോഴ കാര്യം തുറന്ന് പറഞ്ഞ മന്ത്രിമാര്‍ക്കും മുഖ്യമന്ത്രി മറുപടി പറയണമെന്നും ബി ഗോപാലകൃഷ്ണന്‍ ആവശ്യപ്പെട്ടു.

മുഖ്യമന്ത്രിയുടെ മകളെ ചോദ്യം ചെയ്താല്‍ ലൈഫ് മിഷന്‍ തട്ടിപ്പ് കേസില്‍ കൂടുതല്‍ തെളിവുകള്‍ പുറത്തുവരുമെന്ന സുരേന്ദ്രന്റെ ആരോപണത്തെക്കുറിച്ച് ചോദിച്ചപ്പോള്‍ കെ സുരേന്ദ്രന് മാനസികനില തെറ്റിയെന്ന് മുഖ്യമന്ത്രി പ്രതികരിച്ചിരുന്നു. ഒരു പാര്‍ട്ടിയുടെ സംസ്ഥാന അധ്യക്ഷന്‍ അടിസ്ഥാനമില്ലാതെ പലതും വിളിച്ചുപറയുകയാണ് ഇത്തരമൊരാളെ പാര്‍ട്ടിയുടെ സംസ്ഥാന അധ്യക്ഷസ്ഥാനത്ത് ഇരുത്തണോ എന്ന് ബിജെപി ആലോചിക്കണമെന്നും മുഖ്യമന്ത്രി പറഞ്ഞിരുന്നു. ഇതിനു പിന്നാലെയാണ് ഗോപാലകൃഷ്ണന്റെ പ്രതികരണം.