ഉത്തരേന്ത്യന്‍ സംസ്ഥാനങ്ങളിലെ പോലീസിന്റെ വിഴ്ച്ചകള്‍ കണ്ടെത്താന്‍ കമ്മ്യൂണിസ്റ്റുകള്‍ മത്സരിക്കാറുണ്ട്. യു.പിയില്‍ കൊടും ക്രമിനലിനെ വെടിവച്ചു കൊന്നപ്പോള്‍ അത് വ്യാജ ഏറ്റുമുട്ടലാണെന്ന് ആരോപണവുമായി അതിനെ വിമര്‍ശിച്ചവരാണ് കേരളത്തിലെ സി.പി.എം നേതൃത്വം. എന്നാല്‍ ഈ സി.പി.എം നേതൃത്വം നല്‍കുന്ന കേരളത്തിലെ പോലീസിന്റെ മുഖവും ഒന്നാണെന്ന് തെളിയുകയാണ് മാവോയിസ്റ്റ് വേട്ടയിലെ യഥാര്‍ഥകാരണം പുറത്ത് വന്നപ്പോള്‍. വൈത്തിരിയില്‍ റിസോര്‍ട്ടില്‍ വച്ച് മാവോയിസ്റ്റ് പ്രവര്‍ത്തകന്‍ സി പി ജലീലിനെ ഏറ്റുമുട്ടലിനിടെയാണ് കൊലപ്പെടുത്തിയതെന്ന പോലീസ് വാദമാണ് ഇപ്പോള്‍ പൊളിയുന്നത്. ജലീലിന്റെ തോക്കില്‍ നിന്ന് വെടിയുതിര്‍ത്തിട്ടില്ലെന്ന് തെളിയിക്കുന്ന ഫോറന്‍സിക് റിപ്പോര്‍ട്ട് പുറത്തുവന്നു. ഇതോടെ പോലീസിന്റെയും സര്‍ക്കാരിന്റെയും വാദങ്ങള്‍ തെറ്റാണെന്ന് തെളിഞ്ഞു.

ഫോറന്‍സിക് റിപ്പോര്‍ട്ടിലെ പട്ടികയില്‍ 26ാമതായി ലിസ്റ്റ് ചെയ്തിട്ടുള്ളത് ജലീലിന്റെ കൈയിലുണ്ടായിരുന്ന ടആആഘ റൈഫിളാണ്. ഈ തോക്കില്‍ നിന്ന് വെടിപൊട്ടിയിട്ടില്ല എന്നാണ് ഫോറന്‍സിക് ലാബിന്റെ റിപ്പോര്‍ട്ടില്‍ പറയുന്നത്. അതേ സമയം പൊലീസ് ഹാജരാക്കിയ സര്‍വ്വീസ് പിസ്റ്റലുകളില്‍ 9 എണ്ണത്തില്‍ നിന്ന് വെടിയുതിര്‍ത്തിട്ടുണ്ടെന്നും റിപ്പോര്‍ട്ടില്‍ പറയുന്നു. ജലീല്‍ വെടിവെച്ചിട്ടുണ്ടെങ്കില്‍ വലതു കൈയില്‍ വെടിമരുന്നിന്റെ അവശിഷ്ടം കാണേണ്ടിയിരുന്നു. ഇത് കണ്ടെത്താനായിട്ടില്ലെന്ന് റിപ്പോര്‍ട്ടിലുണ്ട്. ഇടം കൈയില്‍ ലെഡിന്റെ അവശിഷ്ടങ്ങളുള്ളതായി രേഖപ്പെടുത്തിയിട്ടുണ്ട്. വലം കൈയനായ ജലീല്‍ ഇടം കൈ ഉപയോഗിക്കാറില്ലെന്ന് സഹോദരന്‍ സിപി ജലീല്‍ പറയുന്നു.

2019 മാര്‍ച്ച് 6നാണ് വയനാട് ലക്കിടിയിലെ ഉപവന്‍ റിസോര്‍ട്ടില്‍ വെച്ച് ജലീല്‍ കൊല്ലപ്പെട്ടത്. പണപ്പിരിവിന് തോക്കുമായെത്തിയ ജലീല്‍ വെടിവെച്ചപ്പോള്‍ തിരികെ വെടിവെച്ചു എന്നതായിരുന്നു പൊലീസ് ഭാഷ്യം. ഫെബ്രുവരിയിലാണ് ഫോറന്‍സിക് ലാബ് ജില്ലാ കോടതിയില്‍ റിപ്പോര്‍ട്ട് സമര്‍പ്പിച്ചത്. റിപ്പോര്‍ട്ട് മറച്ച് വെച്ച പൊലീസ്, സര്‍വ്വീസ് തോക്കുകള്‍ തിരിച്ചെടുക്കാന്‍ ശ്രമിച്ചപ്പോഴാണ് വിവരം ബന്ധുക്കളറിഞ്ഞതും റിപ്പോര്‍ട്ടിന്റെ പകര്‍പ്പ് എടുത്തതും. പിടികൂടുന്നതിന് പകരം പൊലീസ് ജലീലിനെ വെടിവെച്ച് കൊന്നത് ബോധപൂര്‍വ്വമാണെന്ന് അന്നേ ബന്ധുക്കളും മനുഷ്യാവകാശ പ്രവര്‍ത്തകരും ആരോപിച്ചിരുന്നു.