സ്ഥാനാര്‍ഥികളുടെ പേരും ചിഹ്നവുമുള്ള സ്റ്റിക്കര്‍ ഒട്ടിച്ച പേപ്പര്‍ പേനകളുമായി ഭിന്നശേഷി കൂട്ടായ്മ
തിരഞ്ഞെടുപ്പ് പ്രചാരണത്തിന് പുതിയ രീതിയും പരിസ്ഥിതി സൗഹൃദ സന്ദേശത്തോടൊപ്പം ജീവിതച്ചെലവും കണ്ടെത്തുകയാണ് ഭിന്ന ശേഷിക്കാരുടെ കൂട്ടായ്മ. സ്ഥാനാര്‍ഥികളുടെ പേരും ചിഹ്നവും സ്റ്റിക്കര്‍ ഒട്ടിച്ച് പേപ്പര്‍ പേന നിര്‍മിച്ചു നല്‍കുകയാണ് ഈ കൂട്ടായ്മ.
ജില്ലയിലെ ഭിന്നശേഷിക്കാരുടെ കൂട്ടായ്മ വൈകല്യം അതിജീവിച്ച് കോവിഡ് കാലത്തിന് മുന്‍പ് 40000 പേപ്പര്‍ പേനകള്‍ നിര്‍മിച്ചു.എന്നാല്‍ കോവിഡ് പ്രതിസന്ധി രൂക്ഷമായതോടെ ഇവര്‍ നിര്‍മിച്ച പേപ്പര്‍ പേനകള്‍ വിപണനം നടത്താന്‍ സാധിക്കാത്ത അവസ്ഥയിലായി. പഞ്ചായത്ത് തിരഞ്ഞെടുപ്പ് വന്നതോടെ പുത്തന്‍ തിരഞ്ഞെടുപ്പ് പ്രചാരണത്തിന് പേപ്പര്‍ പേനയില്‍ വിവിധ രാഷ്ട്രീയ പാര്‍ട്ടികളുടെ സ്ഥാനാര്‍ഥികളുടെ പേരും പടവും ചിഹ്നവും പതിപ്പിച്ചു നല്‍കും.
മണ്ണില്‍ ലയിക്കുന്ന തരം പേനയാണ് ഇവര്‍ നിര്‍മിക്കുന്ന പേപ്പര്‍ പേന. മാത്രമല്ല പേനയുടെ ഒരു ഭാഗത്ത് പച്ചക്കറി-സസ്യ വിത്തുണ്ട്. ഇവ പേന മണ്ണില്‍ ലയിക്കുന്നതോടൊപ്പം മുളയ്ക്കുകയും ചെയ്യും. അതിജീവനത്തിനായി ഭിന്നശേഷിക്കാര്‍ നിര്‍മിക്കുന്ന പ്രകൃതിയോട് ഇണങ്ങിയുള്ള പേപ്പര്‍ പേന സര്‍ക്കാര്‍ ഓഫിസുകളില്‍ ഉപയോഗിക്കാന്‍ അധികൃതര്‍ നിര്‍ദേശം നല്‍കിയാല്‍ സഹായമാകുമെന്നു കൂട്ടായ്മയുടെ സംസ്ഥാന പ്രസിഡന്റ് ബഷീര്‍ പാണപ്പുഴ പറഞ്ഞു.
https://www.facebook.com/Malayalivartha
