രാജ്യാന്തര ഓണ്ലൈന് വ്യാപാര ശൃംഖല അയച്ച 11 ലക്ഷത്തിന്റെ ഉല്പന്നങ്ങള് കവര്ന്ന കേസില് ഒരാള് കസ്റ്റഡിയില്
രാജ്യാന്തര ഓണ്ലൈന് വില്പന ശൃംഖലയായ ഫ്ലിപ്കാര്ട്ടില് നിന്നയച്ച 11 ലക്ഷം രൂപയുടെ ഉല്പന്നങ്ങള് കവര്ന്ന കേസില് പൊലീസ് ഒരാളെ കസ്റ്റഡിയില് എടുത്തു. വന് സംഘം തട്ടിപ്പിന് പിന്നില് പ്രവര്ത്തിക്കുന്നതായുള്ള സൂചനയെ തുടര്ന്ന് പ്രത്യേക അന്വേഷണ സംഘം രൂപീകരിച്ചു.
ഇരിട്ടി മേഖലയിലെ ഇടപാടുകാര്ക്ക് അയച്ച വിലപിടിപ്പുള്ള 31 മൊബൈല് ഫോണുകളും ഒരു ക്യാമറയുമാണ് കവര്ച്ച ചെയ്യപ്പെട്ടത്. ഇവരുടെ ഉല്പന്നങ്ങള് ഇടപാടുകാര്ക്ക് എത്തിക്കാന് ചുമതലയുള്ള എന്ഡക്സ് ട്രാന്സ്പോര്ട്ട്സ് സര്വീസസ് പ്രൈവറ്റ് ലിമിറ്റഡിന്റെ ഏരിയാ മാനേജര് പി.നന്ദു നല്കിയ പരാതിയിലാണ് പൊലീസ് അന്വേഷണം ആരംഭിച്ചത്. മുക്കാല് ലക്ഷത്തിലധികം രൂപ വില വരുന്ന 10 ഐ ഫോണുകളും കവര്ച്ച ചെയ്യപ്പെട്ടതില് പെടും.
വിതരണ ശൃംഖലയുമായി ബന്ധമുള്ള ചിലരുടെ സഹായത്തോടെയാണ് തട്ടിപ്പെന്നാണ് പൊലീസിന് സൂചന ലഭിച്ചിരിക്കുന്നത്. ഇരിട്ടി ജബ്ബാര്കടവിലുള്ള കേന്ദ്രത്തിലെ ഒരു ഡെലിവറി ബോയ് ആണ് കസ്റ്റഡിയിലായിട്ടുള്ളത്.
ഓണ്ലൈന് ഇടപാടിലെ ചില സാങ്കേതികത്വങ്ങളും സമയ പ്രശ്നവും ആണ് തട്ടിപ്പുകാര് ഉപയോഗപ്പെടുത്തിയതെന്ന് പൊലീസ് പറഞ്ഞു. സിഐ എ.കുട്ടിക്കൃഷ്ണന്, എസ്ഐമാരായ ദിനേശന് കൊതേരി, ബേബി ജോര്ജ്, റജി സ്കറിയ, സീനിയര് സിവില് പൊലീസ് ഓഫിസര്മാരായ മുഹമ്മദ് റഷീദ്, കെ.നവാസ്, എം.ഷൗക്കത്തലി എന്നിവരുടെ നേതൃത്വത്തിലുള്ള സംഘമാണ് അന്വേഷണം നടത്തുന്നത്.
ഉല്പന്നങ്ങള്ക്ക് വിലകുറവുള്ള സമയത്ത് വ്യാജ വിലാസം ഉണ്ടാക്കി സാധനങ്ങള് ഓര്ഡര് ചെയ്യും. സാധനങ്ങള് കൈപറ്റുമെങ്കിലും പണം കൊടുക്കില്ല. ഉല്പന്നങ്ങള് കൈയില് കിട്ടുമ്പോള് പണം നല്കുന്ന രീതിയില് ഓര്ഡര് നല്കുന്നവരുടെ, സാധനങ്ങള് വരുമ്പോള് തട്ടിപ്പ് നടത്തും. ഓര്ഡര് ചെയ്തവര്ക്ക് ഉല്പന്നങ്ങള് കൃത്യമായി കൊടുക്കും. പണവും വാങ്ങും. ഈ പണം കമ്പനി ആസ്ഥാനത്ത് എത്തില്ല.
ബുക്ക് ചെയ്യുന്ന ഏതു സാധനവും ഇടപാടുകാര് റദ്ദ് ചെയ്യാം. ഈ സമയങ്ങളില് ഇടപാടുകാരന് പണം തിരികെ അക്കൗണ്ടില് വരുമെങ്കിലും കമ്പനിയുടെ സാധനം വിതരണ ശൃംഖലകളുടെ ഓഫിസിലെത്തിയിട്ടുണ്ടാവും. ഇവ തിരിച്ച് അയയ്ക്കുകയാണ് ചെയ്യേണ്ടത്. ഇത്തരം സാധനങ്ങള് തിരികെ അയയ്ക്കാതെ കവരും. വന്ന ഉല്പന്നങ്ങള് തിരികെ അയക്കുമ്പോള് തീരെ നിലവാരം കുറഞ്ഞവ വച്ചും തട്ടിപ്പ് നടന്നിട്ടുണ്ട്.
https://www.facebook.com/Malayalivartha