കോവിഡ് മരണം: മതാചാരപ്രകാരമുള്ള ചടങ്ങുകള് നടത്തുന്നതിനും ഉറ്റ ബന്ധുക്കള് സംസ്കാരം നടത്തുന്നതിനും ആരോഗ്യ വകുപ്പ് മാര്ഗനിര്ദേശങ്ങള് പുതുക്കി
കോവിഡ് ബാധയെ തുടര്ന്ന് മരിച്ചവരുടെ മൃതദേഹം അടുത്ത ബന്ധുക്കള്ക്ക് കാണുന്നതിനും മതാചാരപ്രകാരമുള്ള ചടങ്ങുകള് നടത്തുന്നതിനും ആരോഗ്യ വകുപ്പ് മാര്ഗനിര്ദേശങ്ങള് പുറപ്പെടുവിച്ചു.
ഉറ്റബന്ധുക്കള് ആരെങ്കിലും ആവശ്യപ്പെടുകയാണെങ്കില് മൃതശരീരം വൃത്തിയാക്കുന്ന സമയത്ത് ഒരാള്ക്ക് പ്രവേശനം അനുവദിക്കും. പ്രതീകാത്മകമായ രീതിയില് മതപരമായ പുണ്യജലം തളിക്കാനും വെള്ളത്തുണി കൊണ്ടു പുതയ്ക്കാനും ആ ബന്ധുവിനെ അനുവദിക്കും. മൃതദേഹത്തില് സ്പര്ശിക്കാനോ കുളിപ്പിക്കാനോ അന്ത്യചുംബനം നല്കാനോ അനുവദിക്കില്ല. വൃത്തിയാക്കിയ ശേഷം അടുത്ത ബന്ധുക്കള്ക്ക് ഐസലേഷന് വാര്ഡില് മൃതദേഹം കാണാം. മോര്ച്ചറിയില് വച്ചും ആവശ്യപ്പെടുന്നെങ്കില് അടുത്ത ബന്ധുവിനെ കാണാന് അനുവദിക്കും.
ആരോഗ്യ വകുപ്പു ജീവനക്കാരന് മൃതദേഹത്തിന്റെ മുഖം വരുന്ന ഭാഗത്തെ കവറിന്റെ സിപ് തുറന്ന് സംസ്കാര സ്ഥലത്തുവച്ച് മൃതദേഹം അടുത്ത ബന്ധുക്കളെ കാണിക്കാം. കോവിഡ് സുരക്ഷാ മാനദണ്ഡങ്ങള് പാലിക്കണം. ഈ സമയത്തു മതപരമായ പ്രാര്ഥനകള് ചൊല്ലുന്നതും പുണ്യജലം തളിക്കുന്നതും അനുവദിക്കും. ദേഹത്തു സ്പര്ശിക്കാതെ അന്ത്യകര്മങ്ങളും ചെയ്യാം.
മരിച്ച നിലയില് എത്തിക്കുന്നതും മരണകാരണം കോവിഡാണെന്നു സംശയിക്കുന്നതുമായ മൃതദേഹങ്ങളില് നിന്ന് പരിശോധനയ്ക്കുള്ള സാംപിള് ശേഖരിച്ച ശേഷം എത്രയും വേഗം മൃതദേഹം ബന്ധുക്കള്ക്കു വിട്ടുകൊടുക്കും. പരിശോധനാ ഫലം നെഗറ്റീവാണെന്ന് ഉറപ്പു വരുത്തിയവ ഒഴികെയുള്ള മൃതദേഹങ്ങള് പോസിറ്റീവായി കണക്കാക്കി മാനദണ്ഡം പാലിച്ചാണു ബന്ധുക്കള്ക്കു വിട്ടുകൊടുക്കേണ്ടത്. കേന്ദ്ര ആരോഗ്യ മന്ത്രാലയത്തിന്റെ ശുപാര്ശപ്രകാരമാണ് മാര്ഗനിര്ദേശങ്ങള് പുതുക്കിയതെന്നും മന്ത്രി കെ.കെ. ശൈലജ പറഞ്ഞു.
സംസ്കാരച്ചടങ്ങില് പരമാവധി 20 പേര്ക്ക് പങ്കെടുക്കാം. എല്ലാവരും 2 മീറ്റര് അകലം പാലിക്കണം. 60 വയസ്സിനു മുകളിലുള്ളവരും 10 വയസ്സില് താഴെയുള്ളവരും ശ്വാസകോശങ്ങള്ക്ക് ഉള്പ്പെടെ രോഗങ്ങളുള്ളവരും പങ്കെടുക്കരുത്.
https://www.facebook.com/Malayalivartha
