പാലാരിവട്ടം പാലം അഴിമതിക്കേസില് അറസ്റ്റിലായ മുന് മന്ത്രി വി കെ ഇബ്രാഹിംകുഞ്ഞിന്റെ ജാമ്യാപേക്ഷയും കസ്റ്റഡി അപേക്ഷയും ഇന്ന് പരിഗണനയില്... മൂവാറ്റുപുഴ വിജിലന്സ് കോടതിയാണ് ജാമ്യാപേക്ഷയിലും കസ്റ്റഡി അപേക്ഷയിലും വിധി പറയുക
പാലാരിവട്ടം പാലം അഴിമതിക്കേസില് അറസ്റ്റിലായ മുന് മന്ത്രി വി കെ ഇബ്രാഹിംകുഞ്ഞിന്റെ ജാമ്യാപേക്ഷയും കസ്റ്റഡി അപേക്ഷയും ഇന്ന് പരിഗണിക്കും. മൂവാറ്റുപുഴ വിജിലന്സ് കോടതിയാണ് ജാമ്യാപേക്ഷയിലും കസ്റ്റഡി അപേക്ഷയിലും വിധി പറയുക. ഇബ്രാഹിംകുഞ്ഞിന്റെ ആരോഗ്യസ്ഥിതി മോശമാണെന്ന് കാണിച്ച് മെഡിക്കല് ബോര്ഡ് റിപ്പോര്ട്ട് നല്കിയിരുന്നു.
ഇതിന്റെ അടിസ്ഥാനത്തില് ഇബ്രാഹിംകുഞ്ഞിനെ തുടര്ചികിത്സയ്ക്കായി സര്ക്കാര് ആശുപത്രിയിലക്ക് മാറ്റണമെന്ന ആവശ്യത്തില് നിന്ന് വിജിലന്സ് പിന്മാറി.
എന്നാല് ലേക് ഷോര് ആശുപത്രിയില് വച്ച് ചോദ്യം ചെയ്യാന് അനുമതി നല്കണമെന്ന് വിജിലന്സ് ആവശ്യപ്പെട്ടിട്ടുണ്ട്. ഇക്കാര്യത്തിലും കോടതി ഇന്ന് തീരുമാനം പറയും. നിലവില് രണ്ടാഴ്ചത്തെ ജുഡീഷ്യല് കസ്റ്റഡിയിലാണ് ഇബ്രാഹിംകുഞ്ഞ്. നിലവിലെ ആശുപത്രിയില് ചികിത്സ തുടരണമെന്നും ഇതേ ചികിത്സ തുടരാന് സര്ക്കാര് ആശുപത്രിയില് സംവിധാനമില്ലെന്നുമുള്ള ഡിഎംഒയുടെ റിപ്പോര്ട്ട് കോടതി ചൂണ്ടിക്കാട്ടി.
ഇതിനു മറുപടിയായാണു ആശുപത്രിയില് 4 ദിവസം കസ്റ്റഡിയില് ചോദ്യം ചെയ്യാമെന്നു വിജിലന്സ് പ്രോസിക്യൂട്ടര് വാദിച്ചത്.ഡോക്ടര്മാരുടെ സാന്നിധ്യത്തില് ചോദ്യം ചെയ്യാന് സാധിക്കുമോ എന്നു ജഡ്ജി ജോബിന് സെബാസ്റ്റ്യന് ചോദിച്ചെങ്കിലും ആവശ്യമായ ചികിത്സ ലഭ്യമാക്കിക്കൊണ്ടു തന്നെ ഡോക്ടര്മാരെ ഒഴിവാക്കി ചോദ്യം ചെയ്യാമെന്നായിരുന്നു വിജിലന്സിന്റെ മറുപടി. ഇബ്രാഹിം കുഞ്ഞിന്റെ ആരോഗ്യ നില ഗുരുതരമാണെന്നും പൊലീസ് കസ്റ്റഡിയില് വിട്ടു നല്കാനാവില്ലെന്നും കോടതി വ്യക്തമാക്കി.
https://www.facebook.com/Malayalivartha