കോഴിക്കോട് ജില്ലയില് ജ്വല്ലറി കവര്ച്ച; ഒന്നേകാല് കിലോഗ്രാം വെള്ളിയും പതിനൊന്നര പവന് സ്വര്ണവും നഷ്ടമായി
കഴിഞ്ഞദിവസം അര്ധരാത്രി കോഴിക്കോട് ജില്ലയിലെ നരിക്കുനി ടൗണിലെ തനിമ ജ്വല്ലറിയില് നടന്ന കവര്ച്ചയില് പതിനൊന്നര പവന് സ്വര്ണവും ഒന്നേകാല് കിലോഗ്രാം വെള്ളിയും നഷ്ടമായതായി പരാതി. വാഹനം ഉപയോഗിച്ച് കെട്ടി വലിച്ച് ഷട്ടര് തകര്ത്ത നിലയിലാണ്. രാത്രി പന്ത്രണ്ടരയ്ക്കു ശേഷമാണ് കവര്ച്ച നടത്തിയതെന്ന് കരുതുന്നു.
പുലര്ച്ചെ ഒന്നരയോടെ ഇതുവഴിയെത്തിയ ഗൂര്ഖ ഒരു സംഘം ആളുകളെ കണ്ട് ജ്വല്ലറിക്കടുത്തേക്ക് എത്തിയെങ്കിലും അവര് കല്ലെടുത്ത് എറിഞ്ഞ് ആക്രമിച്ചു. ഗൂര്ഖ ഉടന് പൊലീസില് വിവരം അറിയിച്ചു. കൊടുവള്ളി മോഡേണ് ബസാര് നൗഷാദിന്റെ ഉടമസ്ഥതയിലുള്ളതാണ് ജ്വല്ലറി. പൊലീസ് എത്തിയപ്പോഴേക്കും കവര്ച്ചക്കാര് കടന്നുകളഞ്ഞു.
കവര്ച്ചക്കാരുടേതെന്നു സംശയിക്കുന്ന കാറിന്റെ ചിത്രം സമീപത്തെ സിസിടിവി ക്യാമറകള് പരിശോധിച്ചപ്പോള് പൊലീസിന് ലഭിച്ചിട്ടുണ്ട്. സ്ഥലത്തെത്തിച്ച പൊലീസ് നായ മണംപിടിച്ച് കുറച്ചകലെയുള്ള കെട്ടിടങ്ങള്ക്ക് അരികിലെത്തി നിന്നു. വിരലടയാള വിദഗ്ധര് ജ്വല്ലറിയില് നിന്ന് തെളിവുകള് ശേഖരിച്ചു. കഴിഞ്ഞ സെപ്റ്റംബര് 4-ന് ടൗണിലെ റെയിന്ബോ ജ്വല്ലറിയില് നിന്ന് 13 പവന് സ്വര്ണാഭരണങ്ങള് കവര്ന്നിരുന്നു.
https://www.facebook.com/Malayalivartha