തദ്ദേശ തെരഞ്ഞെടുപ്പ്... കോവിഡ് ബാധിതരെയും ക്വാറന്റീനിലുള്ളവരെയും പ്രത്യേക വിഭാഗം സമ്മതിദായകരായി പരിഗണിച്ച് വോട്ടു ചെയ്യുന്നതിനുള്ള മാര്‍ഗനിര്‍ദേശങ്ങളായി
തദ്ദേശ തെരഞ്ഞെടുപ്പില്‍ കോവിഡ് ബാധിതരെയും ക്വാറന്റീനിലുള്ളവരെയും പ്രത്യേക വിഭാഗം സമ്മതിദായകരായി (സ്‌പെഷല്‍ വോട്ടര്‍) പരിഗണിച്ച് വോട്ടു ചെയ്യുന്നതിനുള്ള മാര്‍ഗനിര്‍ദേശങ്ങള്‍ സംസ്ഥാന തെരഞ്ഞെടുപ്പ് കമീഷണര്‍ വി. ഭാസ്‌കരന്‍ പുറപ്പെടുവിച്ചു. സര്‍ക്കാര്‍ അധികാരപ്പെടുത്തിയ ആരോഗ്യ ഓഫിസര്‍മാരാണ് പ്രത്യേക സമ്മതിദായകരുടെ സാക്ഷ്യപ്പെടുത്തിയ പട്ടിക (സര്‍ട്ടിഫൈഡ് ലിസ്റ്റ്) തയാറാക്കുക.
വോട്ടെടുപ്പ് നടത്തുന്ന ദിവസത്തിന് പത്ത് ദിവസം മുമ്ബുമുതല്‍ വോട്ടെടുപ്പ് നടത്തുന്ന ദിവസം വരെയുള്ള കാലയളവിലെ പട്ടികയാണ് നിയുക്ത ആരോഗ്യ ഓഫിസര്‍ തയാറാക്കുക. മെഡിക്കല്‍ ഓഫിസര്‍ നല്‍കുന്ന സാക്ഷ്യപ്പെടുത്തിയ പട്ടികയിലുള്ള വോട്ടര്‍മാര്‍ക്ക് സ്‌പെഷല്‍ പോളിങ് ഓഫിസറും പോളിങ് അസിസ്റ്റന്റുമാണ് സ്‌പെഷല്‍ പോസ്റ്റല്‍ ബാലറ്റ് വിതരണം ചെയ്യുക. പ്രത്യേക പോളിങ് ഓഫിസര്‍ നല്‍കുന്ന പോസ്റ്റല്‍ ബാലറ്റ് പേപ്പര്‍ ലഭിച്ചതായി ഫോറം 19 ബിയില്‍ ഒപ്പിട്ട് നല്‍കേണ്ടതാണ്.
വോട്ടെടുപ്പിന് തലേദിവസം വൈകീട്ട് മൂന്നുവരെ കോവിഡ് സ്ഥിരീകരിച്ചവര്‍ക്കോ ക്വാറന്റീനിലുള്ളവര്‍ക്കോ പോസ്റ്റല്‍ വോട്ട് അനുവദിക്കും. ഇതിനുശേഷം രോഗം സ്ഥിരീകരിക്കുന്നവര്‍ക്ക് വോട്ടെടുപ്പ് ദിവസം അവസാന മണിക്കൂറില്‍ (വൈകീട്ട് അഞ്ച് മുതല്‍ ആറ് വരെ മറ്റ് വോട്ടര്‍മാര്‍, ടോക്കണ്‍ ലഭിച്ചവര്‍ തുടങ്ങിയവര്‍ വോട്ട് രേഖപ്പെടുത്തിയശേഷം) പോളിങ് സ്‌റ്റേഷനില്‍ നേരിട്ടെത്തി വോട്ട് രേഖപ്പെടുത്താം. സ്‌പെഷല്‍ പോളിങ് ഓഫിസര്‍ നല്‍കുന്ന അപേക്ഷ പൂരിപ്പിച്ച് ഒപ്പിട്ട് തിരികെ നല്‍കിയാല്‍ സത്യപ്രസ്താവനയും പോസ്റ്റല്‍ ബാലറ്റും ലഭിക്കും. പ്രത്യേക സമ്മതിദായകന് വോട്ട് രേഖപ്പെടുത്തിയതിനുശേഷം പ്രത്യേക പോസ്റ്റല്‍ ബാലറ്റ് പേപ്പറും സത്യപ്രസ്താവനയും വെവ്വേറെ കവറില്‍ അടക്കം ചെയ്ത് ഒട്ടിച്ച് മൂന്നാമത്തെ കവറില്‍ അവ ഉള്ളടക്കം ചെയ്ത് ഒട്ടിച്ച് സ്‌പെഷല്‍ പോളിങ് ഓഫിസര്‍ക്ക്് കൈമാറും.
പോസ്റ്റല്‍ ബാലറ്റ് പേപ്പര്‍ ലഭിച്ചതിന് സമ്മതിദായകന് പ്രത്യേക പോളിങ് ഓഫിസര്‍ രസീത് നല്‍കും. വോട്ടെടുപ്പിന് തലേദിവസം വൈകീട്ട് മൂന്നുവരെ സര്‍ട്ടിഫൈഡ് ലിസ്റ്റില്‍ ഉള്‍പ്പെടുന്നവര്‍ക്കുള്ള പോസ്റ്റല്‍ ബാലറ്റ് വിതരണം അന്നേദിവസം വൈകീട്ട് ആറിനുമുമ്ബ് പൂര്‍ത്തീകരിക്കണം. സ്‌പെഷല്‍ ബാലറ്റിനുവേണ്ടി നേരിട്ട് അപേക്ഷിക്കുന്ന സ്‌പെഷല്‍ വോട്ടര്‍മാര്‍ കോവിഡ് രോഗിയെന്നോ നിര്‍ബന്ധിത ക്വാറന്റീന്‍ എന്നോ സാക്ഷ്യപ്പെടുത്താന്‍ അധികാരപ്പെടുത്തിയ ആരോഗ്യവകുപ്പ് അധികാരിയുടെ സര്‍ട്ടിഫിക്കറ്റ് അപേക്ഷയോടൊപ്പം ഹാജരാക്കേണ്ടതുമാണ്.
"
https://www.facebook.com/Malayalivartha
