മുഖ്യമന്ത്രിയുടെ അഡീഷനല്‍ പ്രൈവറ്റ് സെക്രട്ടറി സിഎം. രവീന്ദ്രന്‍ മെഡിക്കല്‍ കോളജ് ആശുപത്രിയില്‍ ചികിത്സയിലായതിനാല്‍ ഇന്നും എന്‍ഫോഴ്‌സ്‌മെന്റ് ഡയറക്ടറേറ്റിനു മുന്നില്‍ ഹാജരാകില്ല എന്നു വന്നതോടെ പ്രതിപക്ഷം വിമര്‍ശനം രൂക്ഷമാക്കിയിരിക്കുകയാണ്. രവീന്ദ്രന്‍ ബോധപൂര്‍വം ഇഡിയുടെ മുമ്പില്‍ ഹാജരാകാതിരിക്കാനാണ് നോക്കുന്നതെന്നാണ് പ്രതിപക്ഷം ആരോപിക്കുന്നത്. രവീന്ദ്രനെ ഇഡി ചോദ്യം ചെയ്താല്‍ പലതും പുറത്തുവരും. അതോടെ സഖാക്കള്‍ക്ക് ഉത്തരം പറയാന്‍ ബുദ്ധിമുട്ടാകും. അതിനാല്‍ തെരഞ്ഞെടുപ്പ് വരെ പിടികൊടുക്കാതിരിക്കാനാണ് നോക്കുന്നത്.

അതേസമയം കോണ്‍ഗ്രസ് നേതാവ് കെ. മുരളീധരന്‍ ഒരു പടി കടന്ന ആരോപണമാണ് ഉന്നയിക്കുന്നത്. സര്‍ക്കാരിന്റ കാലാവധി തീരുന്നതുവരെയും ഇനി രവീന്ദ്രന്‍ ആശുപത്രിയിലായിരിക്കുമെന്നായിരുന്നു കെ മുരളീധരന്‍ എം.പിയുടെ പരിഹാസം. രോഗബാധയില്‍ ബിജെപി അധ്യക്ഷന്‍ കെ സുരേന്ദ്രനും സംശയമുന്നയിച്ചിരുന്നു. രവീന്ദ്രന്റ രോഗാവസ്ഥയുടെ നിജസ്ഥിതി വിദഗ്ധ സമിതിയെക്കൊണ്ട് പരിശോധിപ്പിക്കണമെന്ന് കെ.പി.സിസി പ്രസിഡന്റ് മുല്ലപ്പള്ളി രാമചന്ദ്രനും പറഞ്ഞു.

ഈ മാസം ആറിന് ആദ്യം ഹാജരാകാന്‍ നോട്ടീസ് നല്‍കിയ രവീന്ദ്രന് തലേദിവസമാണ് കോവിഡ് സ്ഥിരീകരിച്ചത്. സ്വപ്ന സുരേഷ്, മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കര്‍ എന്നിവരുടെ മൊഴികളില്‍ പേരു പരാമര്‍ശിക്കപ്പെട്ടതാണ് രവീന്ദ്രന്റെ ചോദ്യം ചെയ്യലിന് വഴിയൊരുക്കിയത്. രണ്ടാമത് വിളിച്ച ചോദ്യം ചെയ്യലിനും ഹാജരാകില്ല. പകരം ആരോഗ്യ പ്രശ്‌നം ഇഡിയെ അറിയിക്കും. ചുമയും ശ്വാസതടസവുമുണ്ടെന്നാണു മെഡിക്കല്‍ കോളജ് ആശുപത്രി അധികൃതരുടെ വിശദീകരണം. ഇതിന്റെ പരിശോധനകള്‍ നടത്തിയിട്ടേ ഡിസ്ചാര്‍ജ് ചെയ്യുന്ന കാര്യം തീരുമാനിക്കൂ.

സി.എം.രവീന്ദ്രന്റെ നീക്കം സംശയത്തോടെയാണ് ഇഡി വിലയിരുത്തുന്നത്. ആരോഗ്യാവസ്ഥയെക്കുറിച്ചു കേന്ദ്ര രഹസ്യാന്വേഷണ വിഭാഗം നല്‍കിയ വിവരങ്ങളുടെ അടിസ്ഥാനത്തിലാണിത്. രവീന്ദ്രനെ ചോദ്യം ചെയ്യുന്നതു നിര്‍ണായകമായിരിക്കെ, ഇത്തരത്തില്‍ ഒഴിഞ്ഞു മാറിയാല്‍ എന്തുചെയ്യണമെന്ന് ഉന്നത ഉദ്യോഗസ്ഥരുമായി ആലോചിക്കുകയാണ് അന്വേഷണ സംഘം.

സ്വപ്നയുടെയും ശിവശങ്കറിന്റെയും സ്വര്‍ണക്കടത്തു കേസില്‍ അറസ്റ്റിലായ മറ്റു 2 പേരുടെയും മൊഴികളില്‍നിന്നു രവീന്ദ്രന്റെ ചില ഇടപെടലുകളെക്കുറിച്ചു കൃത്യമായ വിവരം ലഭിച്ചിരുന്നു. അതിന്റെ അടിസ്ഥാനത്തിലാണ് അദ്ദേഹത്തെ ചോദ്യം ചെയ്യണമെന്നും അതോടെ അന്വേഷണത്തില്‍ കാര്യമായ പുരോഗതിയുണ്ടാകുമെന്നും ഉദ്യോഗസ്ഥര്‍ ഡല്‍ഹിയില്‍ ഇഡി സ്‌പെഷല്‍ ഡയറക്ടര്‍ ഉള്‍പ്പെടെ ഉന്നതരെ ധരിപ്പിച്ചത്.

തുടര്‍ നടപടിയില്‍ ഇന്നു തന്നെ ഇഡിയുടെ തീരുമാനമുണ്ടാകും. സ്വര്‍ണക്കടത്തു കേസിലെ കള്ളപ്പണം വെളുപ്പിക്കലും വിവിധ സര്‍ക്കാര്‍ പദ്ധതികളിലെ കമ്മിഷന്‍ ഇടപാടുകളുമാണ് ഇഡി അന്വേഷിക്കുന്നത്.

എന്തായാലും രവീന്ദ്രനെ ചോദ്യം ചെയ്യണമെന്ന ഉറച്ച നിലപാടിലാണ് ഇഡി. രവീന്ദ്രന്‍ ഇങ്ങനെ നിരന്തരം തെന്നിമാറുന്നത് കോടതിയുടെ ശ്രദ്ധയിലും കൊണ്ടുവരും. തെരഞ്ഞെടുപ്പ് വരെ കാക്കാനാണ് രവീന്ദ്രന്റെ ശ്രമമെങ്കില്‍ ശിവശങ്കറിന്റെ ഗതിയായിരിക്കും ഉണ്ടാകുകയെന്നും ഓര്‍മ്മപ്പെടുത്തുന്നു.