ഇക്കഴിഞ്ഞ 18-ാം തീയതി രാവിലെ എട്ടിന് ഉണ്ടായ അപകടത്തില്‍ തീപടര്‍ന്നു പൊള്ളലേറ്റ് ചികിത്സയിലായിരുന്ന നവവരന്‍ മരിച്ചു.

സൗത്ത് ഇന്ത്യന്‍ ബാങ്ക് പ്രവിത്താനം ബ്രാഞ്ചിലെ അസിസ്റ്റന്റ് മാനേജര്‍ രാമപുരം ഗാന്ധിനഗര്‍ വെട്ടുവയലില്‍ സെബിന്‍ ഏബ്രഹാം (29) ആണ് മരിച്ചത്. കുട്ടിച്ചന്റെ മകനാണ്.

പഴയ പാചകവാതക സിലിണ്ടര്‍ മാറ്റി പുതിയത് വയ്ക്കുന്നതിനിടെയാണ് അപകടം. സെബിനും മാതാവ് കുസുമത്തിനും ഗുരുതരമായി പൊള്ളലേറ്റു.

ഓടിയെത്തിയ നാട്ടുകാരാണ് തീ അണച്ചത്. ഉടന്‍ 2 പേരെയും ചേര്‍പ്പുങ്കലിലെ സ്വകാര്യ ആശുപത്രിയില്‍ എത്തിച്ചെങ്കിലും സെബിന്‍ ഇന്നലെ പുലര്‍ച്ചെ മരിച്ചു. മാതാവ് കുസുമം ചികിത്സയിലാണ്.

കഴിഞ്ഞ മാസം 24-നായിരുന്നു വിവാഹം. കട്ടപ്പന ഇരട്ടയാര്‍ പാലയ്ക്കീല്‍ കുടുംബാംഗം ലെനിയ ആണ് ഭാര്യ. സഹോദരങ്ങള്‍: അനു, എബിന്‍. സംസ്‌കാരം നടത്തി.