സിനിമാ സ്റ്റൈല് തട്ടിപ്പ്... വിവാഹ ആലോചന നടത്തിയ ശേഷം പഴയ ആഭരണം മാറ്റി പുതിയ ഫാഷന് വാങ്ങിത്തരാമെന്ന് പറഞ്ഞ് സ്വര്ണം തട്ടിയെടുക്കുന്ന വിരുതന് പിടിയില്
മുകുന്തേട്ടാ സുമിത്രവിളിക്കുന്നു എന്ന സിനിമയില് ശ്രീനിവാസന്റെ കാരക്ടര് വിവാഹത്തലേന്ന് പെണ്കുട്ടിയുടെ പഴയ ആഭരണം മാറ്റി പുതിയ ഫാഷന് വാങ്ങിത്തരാമെന്ന് പറഞ്ഞ് ഉള്ള സ്വര്ണ്ണം മുഴുവന് വാങ്ങി മുങ്ങുന്ന ഒരു ഭാഗം ഉണ്ട്. ഇപ്പോള് മലപ്പുറത്ത് സംഭവിച്ചിരിക്കുന്നതും അതുതന്നെ. ഇവിടെ ഒരാളില് നിന്നുമാത്രമല്ല, പലരില് നിന്നും സ്വര്ണ്ണം തട്ടിയെടുത്ത മേലാറ്റൂര് എടപ്പറ്റ സ്വദേശി മണവാളന് റിയാസ് എന്ന മുഹമ്മദ് റിയാസ് ആണ് പെരിന്തല്മണ്ണ പൊലീസിന്റെ പിടിയിലായത്.
സാമ്ബത്തികമായി പിന്നോക്കം നില്ക്കുന്ന കുടുംബങ്ങളില് നിന്നും ജോലിക്ക് പോകുന്ന പെണ്കുട്ടികളുടെ വീടുകളില് ചെന്ന് വിവാഹ ആലോചന നടത്തി പെണ്കുട്ടികളുമായി സൗഹൃദം സ്ഥാപിച്ച ശേഷം സ്വര്ണാഭരണങ്ങള് തട്ടിയെടുത്ത് മുങ്ങുകയാണ് ഇയാളുടെ പതിവ്. ഇത്തരത്തില് വഞ്ചിക്കപ്പെട്ട അരക്കുപറമ്ബ്, കുന്നപ്പള്ളി സ്വദേശിനികളായ രണ്ട് പെണ്കുട്ടികളുടെ പരാതിയില് നടത്തിയ അന്വേഷണത്തിലാണ് പ്രതി പിടിയിലായത്. വിവാഹം ആലോചിച്ച ശേഷം മൊബൈല് ഫോണിലൂടെ സംസാരിച്ചു കൂടുതല് അടുത്ത് ഇടപഴകും. പിന്നീട് ആഭരണം മാറ്റി പുതിയ ഫാഷന് വാങ്ങിത്തരാമെന്ന് പറഞ്ഞ് പ്രലോഭിപ്പിച്ച് പെരിന്തല്മണ്ണ ടൗണിലേക്ക് സ്ത്രീകളെ വരുത്തി ആഭരണങ്ങളുമായി മുങ്ങുകയാണ് ഇയാളുടെ രീതി. ഇത്തരത്തില് ലഭിക്കുന്ന പണം കൊണ്ട് മേലാറ്റൂരില് ഒരു ഫ്ലാറ്റ് വാടകയ്ക്കെടുത്ത് ആര്ഭാട ജീവിതം നയിച്ചു വരികയായിരുന്നു പ്രതി. ഇയാളെ സൈബര് സെല്ലിന്റെ സഹായത്തോടെ നടത്തിയ അന്വേഷണത്തിലാണ് പൊലീസ് വലയിലാക്കിയത്. മറ്റ് പല സ്ഥലങ്ങളിലും പ്രതി സമാനരീതിയിലുള്ള കുറ്റകൃത്യങ്ങള് നടത്തിയതായി വിവരം ലഭിച്ചിട്ടുണ്ടെന്ന് പൊലീസ് അറിയിച്ചു.
പ്രതി വില്പ്പന നടത്തിയ 7 പവന് വരുന്ന സ്വര്ണാഭരണങ്ങള് പൊലീസ് കണ്ടെടുത്തു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. കൂടുതല് പരാതികള് ലഭിക്കുന്ന മുറയ്ക്ക് പ്രതിയെ കസ്റ്റഡിയില് വാങ്ങി കൂടുതല് അന്വേഷണം നടത്തുമെന്ന് പൊലീസ് അറിയിച്ചു.
മലപ്പുറം ജില്ല പൊലീസ് മേധാവി യു അബ്ദുള് കരീം ഐ പി എസിന്റെ പ്രത്യേക നിര്ദ്ദേശപ്രകാരം, പെരിന്തല്മണ്ണ എ എസ് പി ഹേമലത ഐ പി എസിന്റെ നേതൃത്വത്തില് സ്പെഷ്യല് ടീം രൂപീകരിച്ച് നടത്തിയ അന്വേഷണത്തിലാണ് പ്രതിയെ പിടി കൂടിയത്. പെരിന്തല്മണ്ണ പൊലീസ് ഇന്സ്പെക്ടര് സി കെ നാസര്, എസ് ഐ രമാദേവി, സലീം, ഷാജി സിപിഒമാരായ സജീര്, കബീര്, മിഥുന്, പ്രഭുല്, ദിനേഷ് എന്നിവരാണ് അന്വേഷണ സംഘത്തില് ഉണ്ടായിരുന്നത്.
https://www.facebook.com/Malayalivartha