ഭൂതം പുറത്തേക്ക്... സ്വപ്ന സുരേഷ് ഭരണപക്ഷത്തെ അടപടലം ഇളക്കുമ്പോള് ഉമ്മന് ചാണ്ടിയെ നല്ലപിള്ളയാക്കാന് ശരണ്യ മനോജ് തുറന്നുവിട്ട സോളാര് ഭൂതം കത്തുന്നു; പ്രതിപക്ഷത്തോടൊപ്പം ഭരണ പക്ഷത്തേയും ബിജെപിയേയും മുള്മുനയില് നിര്ത്തി സോളാര് നായിക; ഉന്നത സ്ഥാനങ്ങളിലിരിക്കുന്ന പലരും ആശങ്കയില്
കുറേക്കാലമായി സോളാര് നായികയെപ്പറ്റി കേള്ക്കാനില്ലായിരുന്നു. സ്വപ്നയായിരുന്നു നിറഞ്ഞ് നിന്നത്. ഇടയ്ക്ക് കേസെടുക്കുമെന്ന് വാര്ത്ത വന്നെങ്കിലും ചാനല് ചര്ച്ച നടത്താന് അത് പോരായിരുന്നു. എന്നാല് ശരണ്യ മനോജ് സോളാര് ഭൂതം തുറന്ന് വിട്ടതോടെ ചാനല് ചര്ച്ചകള് പൂര്ണമായും സോളാറിലേക്ക് മാറി. പ്രതിപക്ഷത്തെ മാത്രമല്ല ഭരണപക്ഷത്തേയും ബിജെപിയേയും സോളാര് കേസിലെ ഇര മുള്മുനയില് നിര്ത്തുകയും ചെയ്തു.
സോളാര് കേസിലെ ഇരയെക്കൊണ്ട് പലതും എഴുതിക്കുകയും പറയിക്കുകയും ചെയ്തത് കെ.ബി. ഗണേശ് കുമാറാണെന്നും അദ്ദേഹമാണ് കേസിലെ മുഖ്യപ്രതിയെന്നുമുള്ള വെളിപ്പെടുത്തലുമായി ഗണേശിന്റെയും ആര്. ബാലകൃഷ്ണപിള്ളയുടെയും ബന്ധുവായ ശരണ്യ മനോജ് രംഗത്തെത്തിയത്. ഇതോടെ തിരഞ്ഞെടുപ്പാവേശത്തിന് എരിവ് പകര്ന്ന് സോളാര് വിവാദം വീണ്ടും സജീവമായി. വരും ദിവസങ്ങളില് ആരോപണ പ്രത്യാരോപണങ്ങള്ക്ക് ഇന്ധനമാകാന് വഴിയൊരുക്കുന്നതാണ് ശരണ്യ മനോജിന്റെ വെളിപ്പെടുത്തല്.
ചെങ്ങന്നൂര് എം.എല്.എ കൂടിയായ സി.പി.എം സംസ്ഥാനസമിതി അംഗം സജി ചെറിയാനും ഗൂഢാലോചനയില് പങ്കാളിയായെന്ന മനോജിന്റെ വെളിപ്പെടുത്തല് ആരോപണമുന സി.പി.എമ്മിലേക്കും തിരിക്കുമെന്ന് യു.ഡി.എഫ് വിലയിരുത്തുന്നു. ഇടതു പാളയത്തിലുള്ള ഗണേശ് കുമാറിനെതിരായ ഗുരുതര ആക്ഷേപം ഇടതുപക്ഷത്തെ തിരഞ്ഞെടുപ്പ്കാലത്ത് പ്രതിരോധത്തിലാക്കാനുള്ള ആയുധമാകും. നടിയെ ആക്രമിച്ച കേസില് മാപ്പുസാക്ഷിയെ ഭീഷണിപ്പെടുത്തിയതിന് പിടിയിലായ ഗണേശിന്റെ പി.എ പ്രദീപ് കുമാറിന്റെ പേര് ഇപ്പോള് മനോജിന്റെ വെളിപ്പെടുത്തലിലും ഉള്പ്പെട്ടിട്ടുണ്ട്.
എന്നാല്, മനോജ് തന്നെ ദൃശ്യമാദ്ധ്യമങ്ങള്ക്ക് നല്കിയ അഭിമുഖത്തില്, യു.ഡി.എഫ് നേതാക്കളുടെ പേരുകളൊഴിവാക്കാന് സോളാര് കേസിലെ ഇരയ്ക്കുമേല് താന് സമ്മര്ദ്ദം ചെലുത്തിയെന്ന് പറഞ്ഞത് യു.ഡി.എഫിനും തിരിച്ചടിയാണ്. കേരള കോണ്ഗ്രസ്ബി വിട്ട് കോണ്ഗ്രസില് അടുത്തിടെ ചേര്ന്ന മനോജ്, സ്വന്തം നേതാക്കളെ പ്രതിസന്ധിയിലാക്കുകയാണ് ചെയ്തത്. ഇടതുക്യാമ്പുകള്ക്ക് പിടിവള്ളിയാകുന്നതും ഈ വെളിപ്പെടുത്തലായിരിക്കും.
ചെങ്ങന്നൂര് സ്വദേശിയായ യുവതിയുടെ കാര്യത്തില് നാട്ടുകാരനെന്ന നിലയിലും ആ സമയത്ത് സി.പി.എം ആലപ്പുഴ ജില്ലാ സെക്രട്ടറിയെന്ന നിലയിലുമാണ് ഇടപെട്ടതെന്നാണ് സജി ചെറിയാന്റെ വാദം. മനോജിന്റെ വെളിപ്പെടുത്തല് നിഷേധിച്ച് ഇരയായ യുവതി രംഗത്തെത്തിയത്. എന്നാല് വിവാദകാലത്ത് അവരുടെ അഭിഭാഷകനായിരുന്ന ഫെനി ബാലകൃഷ്ണന് മനോജിനെ തുണച്ചും രംഗത്തുവന്നു. ഗണേശ് കുമാര് പ്രതികരിച്ചിട്ടില്ല.
ആരോപണമുയര്ന്നപ്പോള് ദു:ഖിച്ചില്ലെന്നും ഇപ്പോള് അമിതമായി സന്തോഷിക്കുന്നില്ലെന്നും പറഞ്ഞ ഉമ്മന് ചാണ്ടി, മനോജിന്റെ വെളിപ്പെടുത്തലുകളോട് വൈകാരികമായാണ് പ്രതികരിച്ചത്. ആരോടും പ്രതികാരമില്ലെന്നും അദ്ദേഹം വ്യക്തമാക്കി. കഴിഞ്ഞ ഭരണകാലത്തിന് ശേഷം ഏതാണ്ട് അസ്തമിച്ച വിവാദം ഇടക്കാലത്ത് വേങ്ങര ഉപതിരഞ്ഞെടുപ്പ് വേളയിലാണ് വീണ്ടും ചര്ച്ചാവിഷയമായത്. അതിനിടയാക്കിയത് ഇതേക്കുറിച്ചന്വേഷിച്ച ജസ്റ്റിസ് ശിവരാജന് കമ്മിഷന് റിപ്പോര്ട്ടാണ്. മുന് മുഖ്യമന്ത്രി ഉമ്മന് ചാണ്ടിക്കെതിരെയടക്കം രൂക്ഷപരാമര്ശങ്ങളടങ്ങിയ റിപ്പോര്ട്ടില് തുടരന്വേഷണത്തിന് സര്ക്കാര് നീക്കമാരംഭിച്ചെങ്കിലും നിയമോപദേശങ്ങള് അനുകൂലമല്ലാതിരുന്നതിനാല് പാതിവഴിക്ക് നിലയ്ക്കുകയാണുണ്ടായത്.
സമീപകാലത്ത് മുന്മന്ത്രി എ.പി. അനില്കുമാറിനെതിരെ സോളാര് കേസിലെ ഇര നല്കിയ മൊഴിയുടെ അടിസ്ഥാനത്തില് കേസന്വേഷണം മുറുക്കാന് സര്ക്കാര് കച്ച കെട്ടിയതോടെ വീണ്ടും രാഷ്ട്രീയപ്പുക ഉയര്ന്നെങ്കില് ശരണ്യ മനോജിന്റെ വെളിപ്പെടുത്തലോടെ വിവാദം മറ്റൊരു തലത്തിലേക്ക് നീങ്ങുകയാണ്.
"
https://www.facebook.com/Malayalivartha
