യു. പ്രതിഭ എം.എല്.എ ഒഴിവാക്കി; കായംകുളത്ത് സി.പി.എമ്മിനുള്ളില് പോര് രൂക്ഷം; പുതിയ വിവാദം മുട്ടേല്പാലത്തിന്റെ ഉദ്ഘാടനവുമായി ബന്ധപ്പെട്ട്; വിവാദമായതോടെ സി.പി.എമ്മിന്റെ എഫ്ബി പേജില് നിന്നും പോസ്റ്റ് പിന്വലിച്ചു; പിന്നില് സീറ്റു മോഹികളെന്ന് ആരോപണം
കായംകുളത്തെ സി.പി.എമ്മിലെ പ്രശ്നം രൂക്ഷമായി തന്നെ തുടരുന്നു. മുട്ടേല്പാലത്തിന്റെ ഉദ്ഘാടനവുമായി ബന്ധപ്പെട്ടാണ് സിപിഎമ്മില് പുതിയ വിവാദമുണ്ടായിരിക്കുന്നത്. പാര്ട്ടി ഏരിയ കമ്മറ്റിയുടെ ഫെയ്സ്ബുക്ക് പേജിലെ പോസ്റ്ററില് നിന്ന് സ്ഥലം എംഎല്എ യു. പ്രതിഭയുടെ ഫോട്ടോ ഒഴിവാക്കിയതാണ് വിവാദമായത്. പോസ്റ്റിനു താഴെയുള്ള കമന്റുകളില് ഇതിനെതിരേയുള്ള വിമര്ശനം നിറയുകയാണ്. വിമര്ശനം ഉയര്ന്നതോടെ അല്പം മുമ്പ് പോസ്റ്റ് പിന്വലിച്ചു.
സിപിഎം കായംകുളം ഏരിയാ കമ്മറ്റിയുടെ ഫെയ്സ്ബുക്ക് പേജിലെ പോസ്റ്ററാണ് വിവാദത്തിന്റെ കേന്ദ്രബിന്ദു. നാളെ ഉദ്ഘാടനം ചെയ്യുന്ന മുട്ടേല്പാലത്തിനു അഭിവാദ്യമര്പ്പിച്ചുകൊണ്ടുള്ള പോസ്റ്ററില് യു. പ്രതിഭയുടെ പോരോ ചിത്രമോ ഇല്ല. ഇതാണ് വിവാദത്തിലേക്കെത്തിച്ചത്. മണ്ഡലത്തിലെ പാര്ട്ടി നേതൃത്വത്തിലെ ഒരു വിഭാഗത്തിന് പ്രതിഭയോടുള്ള അതൃപ്തിയാണ് പോസ്റ്ററില് നിന്ന് പ്രതിഭയെ ഒഴിവാക്കാന് കാരണമെന്നാണ് സൂചന. എന്നാല് അണികളില് പലര്ക്കും ഇതിനോടുള്ള പ്രതിഷേധമാണ് സോഷ്യല്മീഡിയയില് ഉണ്ടായത്. ഇതിന്റെ ഭാഗമായാണ് പ്രതിഭയില്ലാത്ത പോസ്റ്ററിനെതിരെ കമന്റുകളിലൂടെ വിമര്ശനം ഉയര്ന്നത്.
നിയമസഭാ സീറ്റ് മോഹിച്ച് രംഗത്തുള്ള ചില നേതാക്കളാണ് എംഎല്എയ്ക്കെതിരായ നീക്കങ്ങള്ക്ക് പിന്നില് ചരടുവലിക്കുന്നത്.ഏഴരക്കോടിയിലധികം രൂപ മുടക്കി പൊതുമരാമത്ത് വകുപ്പ് പൂര്ത്തീകരിച്ച മുട്ടേല് പാലത്തിന്റെ ഉദ്ഘാടനം നാളെയാണ്. പാലത്തിന്റെ ക്രെഡിറ്റ് പൂര്ണ്ണമായും മന്ത്രി ജി. സുധാകരന് നല്കുകയാണ് സിപിഎം കായംകുളം ഏരിയ കമ്മിറ്റി. ഔദ്യോഗിക ഫേസ്ബുക്ക് പേജില് വന്ന പോസ്റ്ററില് സ്ഥലം എംഎല്എ യു. പ്രതിഭയില്ല. ഇതിനെതിരെ പാര്ട്ടി പ്രവര്ത്തകരും അനുഭാവികളും രൂക്ഷവിമര്ശനമാണ് ഉന്നയിക്കുന്നത്.
കായംകുളം എംഎല്എ യു. പ്രതിഭയും ഒരു വിഭാഗം സിപിഎം നേതാക്കളുമായി പോര് തുടങ്ങിയിട്ട് നാളേറെയായി. കൊവിഡ് കാലത്ത് പോലും എംഎല്എ - ഡിവൈഎഫ്ഐ പോര് പരസ്യമായിരുന്നു. വരുന്ന നിയമസഭാ തെരഞ്ഞെടുപ്പില് യു. പ്രതിഭയ്ക്ക് പാര്ട്ടി സീറ്റ് നല്കില്ലെന്ന് ഒരുവിഭാഗം നേതാക്കള് പ്രചരിപ്പിക്കുന്നു. ഏരിയ ഭാരവാഹികള് മുതല് ജില്ലാ കമ്മിറ്റി അംഗങ്ങള് വരെ ഇതിലുണ്ട്. പലരും കായംകുളം സീറ്റില് മത്സരിക്കാന് തയ്യാറെടുക്കുന്നവരുമാണ്.
https://www.facebook.com/Malayalivartha
