തേഞ്ഞിപ്പലം: ആഴക്കടലില്‍ മാത്രം കാണുന്ന ഭീമന്‍ കടുകപ്പാര എങ്ങനെ കടലുണ്ടിപ്പുഴയിലെത്തിയെന്നറിയാതെ അന്തം വിടുകയാണ് മത്സ്യത്തൊഴിലാളികളും നാട്ടുകാരും.

മത്സ്യത്തൊഴിലാളിയായ മഞ്ഞറോടന്‍‌ അബ്ദുല്‍ സലാമാണ് 13.5 കിലോ തൂക്കമുളള മീനിനെ വലവീശിപ്പിടിച്ചത്.

ഇരുമ്പോത്തിങ്ങല്‍ കടവിനടുത്തുനി​ന്നാണ് ഈ മീന്‍ വലയി​ല്‍പെട്ടത്. ഈ ഒറ്റ മീനിനെ വിറ്റത് 4000 രൂപയ്ക്കാണ് .

ഇത്രയും വലിയ കടുകപ്പാര പുഴയില്‍ നിന്ന് ലഭിക്കാറില്ലെന്നാണ് മത്സ്യത്തൊഴിലാളികള്‍ പറയുന്നത്. മത്സ്യപ്രേമികള്‍ക്ക് ഏറെ പ്രിയപ്പെട്ട ഇനമാണ് കടുകപ്പാര.

അബ്ദുല്‍ സലാം ആദ്യമായല്ല വലിപ്പമുളള മീനുകളെ പിടികൂടുന്നത്. കഴിഞ്ഞ വര്‍ഷം 16.5 കിലോ തൂക്കമുള്ള നരിമീന്‍ വലവീശി പിടിച്ചിരുന്നു. ഇതിനെയും മോഹവിലയ്ക്കാണ് വിറ്റത്.