വീടിനുള്ളിലെ അടുക്കളയില് നിന്ന് തീ പടര്ന്ന് 19 കാരിക്ക് ഗുരുതരമായി പൊള്ളലേറ്റു; ഗ്യാസ് സിലിണ്ടര് തുറന്ന് വിട്ടിരുന്നതും അടുക്കളയില് അതിരൂക്ഷമായ മണ്ണെണ്ണയുടെ ദുര്ഗന്ധം ഉണ്ടിയരുന്നതും ദുരൂഹത ഇരട്ടിയാക്കി
വീടിനുള്ളിലെ അടുക്കളയില് നിന്ന് തീ പടര്ന്ന് 19 കാരിക്ക് ഗുരുതരമായി പൊള്ളലേറ്റു. ഗ്യാസ് സിലിണ്ടര് തുറന്ന് വിട്ടിരുന്നതും അടുക്കളയില് അതിരൂക്ഷമായ മണ്ണെണ്ണയുടെ ദുര്ഗന്ധം ഉണ്ടിയരുന്നതും ദുരൂഹത ഇരട്ടിയാക്കി. കളത്തിപ്പടി ചെമ്പോല കൊച്ചുപറമ്പില് ജോസിന്റെയും പരേതയായ ജയമോളുടെയും മകള് ജീന (അമ്മു 19)നെയാണ് ഗുരുതരമായ പരിക്കുകളോടെ മെഡിക്കല് കോളേജി ആശുപത്രിയില് പ്രവേശിപ്പിച്ചത്. പൊലീസിലും അഗ്നിരക്ഷാ സേനയിലും വിവരം അറിയിച്ചിട്ടും ആംബുലന്സ് എത്താന് അരമണിക്കൂര് വൈകിയതായും പരാതിയുണ്ട്.
വ്യാഴാഴ്ച കഞ്ഞിക്കുഴി കളത്തിപ്പടി ചെമ്പോല ഭാഗത്തെ കൊച്ചുപറമ്പില് വീട്ടിലായിരുന്നു സംഭവം. വീടിനുള്ളില് നിന്നും പെണ്കുട്ടിയുടെ നിലവിളി കേട്ട അയല്വാസിയായ സന്തോഷ് ഓടിയെത്തുകയായിരുന്നു. ഈ സമയത്ത് അടുക്കളയില് നിന്നും തീ ആളിപ്പടരുന്നത് സന്തോഷ് കണ്ടു. ശരീരമാകെ പൊള്ളലേറ്റ് അലറിക്കരഞ്ഞ് കൊണ്ട് അടുക്കളയില് വീണ് കിടക്കുകയായിരുന്നു പെണ്കുട്ടി. ഗ്യാസ് അടുപ്പില് നിന്നും തീ ആളിപ്പടരുന്നുണ്ടായിരുന്നു. അയല്വാസികള് ഉടന്തന്നെ വിജയപുരം പഞ്ചായത്ത് അംഗങ്ങളായ മിഥുനെയും രജനി സന്തോഷിനെയും വിവരം അറിയിച്ചു. ഇരുവരും ഉടന് തന്നെ അഗ്നിരക്ഷാസേനയെയയും പൊലീസിനെയും വിവരമറിയിച്ചു.
പഞ്ചായത്ത് കമ്മിറ്റിയില് നിന്നിറങ്ങിയ ഇരുവരും സംഭവം നടന്ന വീട്ടിലെത്തിയെങ്കിലും അഗ്നിരക്ഷാ സേനയും പൊലീസും സ്ഥലത്തെത്തിയില്ല. തുടര്ന്ന് പഞ്ചായത്തംഗം മിഥുന് പൊന്പള്ളി പളളിയിലെത്തി പള്ളിയുടെ ആംബുലന്സ് എടുത്ത് കുട്ടിയെ ആശുപത്രിയിലെത്തിക്കുകയായിരുന്നു.
സംഭവം ഉണ്ടാകുമ്പോള് ഹോട്ടല് ജീവനക്കാരനായ കുട്ടിയുടെ അച്ഛന് ജോസും സഹോദരന് ജിജിനും സഹോദരന്റെ ഭാര്യ ചിന്നുവും വീട്ടിലുണ്ടായിരുന്നില്ല. സംഭവമറിഞ്ഞ് ഇവര് മെഡിക്കല് കൊളേജ് ആശുപത്രിയില് എത്തിച്ചേര്ന്നു. 80ശതമാനത്തിലധികം പൊള്ളലേറ്റ കുട്ടിയുടെ അവസ്ഥ അതീവഗുരുതരമായി തുടരുകയാണ്. സംഭവസ്ഥലത്ത് ഈസ്റ്റ് പൊലീസ് എത്തിയിട്ടുണ്ട്. തീപിടിത്തത്തെ തുടര്ന്ന് വീട്ടുസാധനങ്ങള് കത്തിക്കരിഞ്ഞ നിലയിലാണ്. ഫ്രിഡ്ജും മറ്റ് സാധനങ്ങളും തീപിടിത്തത്തില് നശിച്ചിട്ടുണ്ട്.
https://www.facebook.com/Malayalivartha