നിയമസഭാ തിരഞ്ഞെടുപ്പിനുള്ള അന്തിമ വോട്ടര്പട്ടികയില് 2.67 കോടി വോട്ടര്മാര്; വോട്ടര് പട്ടികയില് ഉള്പ്പെടാത്തവര്ക്ക് പേര് ചേര്ക്കുന്നതിന് ഇനിയും അവസരമുണ്ടായിരിക്കുമെന്ന് മുഖ്യ തിരഞ്ഞെടുപ്പ് ഓഫീസര്; 1,37,79,263 സ്ത്രീ വോട്ടര്മാരും 1,02,95,202 പുരുഷ വോട്ടര്മാരും
നിയമസഭാ തിരഞ്ഞെടുപ്പിനുള്ള അന്തിമ വോട്ടര്പട്ടികയില് 2.67 കോടി വോട്ടര്മാര്. മുഖ്യ തിരഞ്ഞെടുപ്പ് ഓഫീസര് ടിക്കാറാം മീണയാണ് ഇക്കാര്യം അറിയിച്ചത്. അതെസമയം തിരഞ്ഞെടുപ്പ് വോട്ടര് പട്ടികയില് ഉള്പ്പെടാത്തവര്ക്ക് പേര് ചേര്ക്കുന്നതിന് ഇനിയും അവസരമുണ്ടായിരിക്കുമെന്നും അദ്ദേഹം പറഞ്ഞു.
1,37,79,263 സ്ത്രീ വോട്ടര്മാരും 1,02,95,202 പുരുഷ വോട്ടര്മാരുമാണുള്ളത്. ട്രാന്സജന്ഡര്മാരുടെ എണ്ണം 221 ആയി വര്ധിച്ചിട്ടുണ്ട്. മലപ്പുറത്താണ് ഏറ്റവും കൂടുതല് വോട്ടര്മാരുള്ളത്. 32,14,943 പേര്. ഇത്തവണ പുതുതായി വോട്ടുചെയ്യുന്നവര് 2.99 ലക്ഷം പേണ്ട്. 1.56 ലക്ഷം വോട്ടര്മാരെ പട്ടികയില്നിന്ന് ഒഴിവാക്കിയതായും ടിക്കാറാം മീണ പറഞ്ഞു.
ഒരു പോളിങ്ങ് സ്റ്റേഷനില് 1000 വോട്ടര്മാരെ മാത്രമേ അനുവദിക്കൂ. അതിനാല് ഇത്തവണ പോളിങ് സ്റ്റേഷനുകളുടെ എണ്ണം വര്ധിക്കും. പുതുതായി 15,730 പോളിങ് സ്റ്റേഷനുകള് കൂടി വരും. ഇതോടെ ആകെ പോളിങ് സ്റ്റേഷനുകളുടെ എണ്ണം 40, 771 ആകും. പ്രത്യേക കാമ്പയിന് നടത്തിയതിന്റെ ഫലമായി 10 ലക്ഷത്തിലധികം അപേക്ഷകള് ലഭിച്ചിട്ടുണ്ട്.
നാമനിര്ദേശ പത്രിക സമര്പ്പിക്കുന്നതിന് 10 ദിവസം മുന്പുവരെ പേരു ചേര്ക്കാന് അപേക്ഷിക്കാം. വൈകി അപേക്ഷിക്കുന്നവരുടെ അപേക്ഷകള് പരിശോധിക്കുന്നതിലുള്ള കാലതാമസം മൂലം പട്ടികയില് ഉള്പ്പെടാതെ പോകാന് ഇടയുള്ളതിനാല് എത്രയും നേരത്തെ അപേക്ഷിക്കുന്നതാണ് നല്ലതെന്നും ടിക്കാറാം മീണ പറഞ്ഞു.
അതെ സമയം വരുന്ന നിയമസഭാ തിരഞ്ഞെടുപ്പില് കേരളത്തിലെ പോളിങ് ബൂത്തുകളുടെ എണ്ണം വര്ധിപ്പിക്കാന് കേന്ദ്ര തിരഞ്ഞെടുപ്പ് കമ്മീഷന് തീരുമാനിച്ചിട്ടുണ്ട്. കോവിഡ് പ്രതിരോധത്തിനായി ബിഹാറില് വിജകരമായി നടപ്പാക്കിയ മാതൃക ഏര്പ്പെടുത്തുന്നതിന്റെ ഭാഗമായാണ് ബൂത്തുകളുടെ എണ്ണം വര്ദ്ധിപ്പിക്കുന്നത്. ഡെപ്യുട്ടി തിരഞ്ഞെടുപ്പ് കമ്മീഷണര് സുധീപ് ജയിന്റെ നേതൃത്വത്തിലുള്ള മൂന്നംഗ സംഘത്തിന്റെ റിപ്പോര്ട്ട് ലഭിച്ച ശേഷം ഇക്കാര്യത്തില് അന്തിമ തീരുമാനമെടുക്കും.
കേരളം ഉള്പ്പടെ അഞ്ച് സംസ്ഥാനങ്ങളിലേക്ക് നടക്കുന്ന നിയമസഭാ തിരഞ്ഞെടുപ്പുകളില് കോവിഡ് പ്രതിരോധ മാര്ഗ്ഗരേഖ കര്ശനമായി നടപ്പിലാക്കുമെന്ന് തിരഞ്ഞെടുപ്പ് കമ്മീഷന് കേന്ദ്ര സര്ക്കാരിനെ അറിയിച്ചു. കേന്ദ്ര ആഭ്യന്തര സെക്രട്ടറി അജയ് ഭല്ലയുമായി നടത്തിയ ചര്ച്ചയിലാണ് കമ്മീഷന് ഇക്കാര്യം വ്യക്തമാക്കിയത്. ബീഹാര് നിയസഭാ തിരെഞ്ഞെടുപ്പില് വിജയകരമായി നടപ്പാക്കിയ മാര്ഗ്ഗരേഖ മറ്റ് സംസ്ഥാനങ്ങളിലും നടപ്പാക്കാനാണ് കമ്മീഷന് ആലോചിക്കുന്നത്. സാമൂഹിക അകലം പാലിച്ച് വോട്ടെടുപ്പ് നടത്താന് ബിഹാറില് പോളിങ് ബൂത്തുകളുടെ എണ്ണം 63 ശതമാനം വര്ദ്ധിപ്പിച്ചിരുന്നു.
2016 ലെ നിയമസഭാ തിരഞ്ഞെടുപ്പില് കേരളത്തില് 21500 ത്തോളം പോളിങ് ബൂത്തുകളായിരുന്നു ഉണ്ടായിരുന്നത്. ഇതില് എത്ര വര്ദ്ധനവ് വേണം എന്നത് സംബന്ധിച്ച് നാളെ മുതല് സംസ്ഥാനം സന്ദര്ശിക്കുന്ന കേന്ദ്ര തിരഞ്ഞെടുപ്പ് കമ്മീഷന്റെ മൂന്നംഗ സംഘത്തിന്റെ റിപ്പോര്ട്ട് ലഭിച്ച ശേഷം അന്തിമ തീരുമാനമുണ്ടാകും. ബൂത്തുകളുടെ എണ്ണം വര്ധിപ്പിക്കുന്ന സാഹചര്യത്തതില് കൂടുതല് കേന്ദ്ര സേന അംഗങ്ങളെ തിരഞ്ഞെടുപ്പ് ഡ്യൂട്ടിക്കായി ലഭ്യമാക്കണമെന്നും കേന്ദ്ര ആഭ്യന്തര സെക്രട്ടറിയോട് തിരഞ്ഞെടുപ്പ് കമ്മീഷന് ആവശ്യപ്പെട്ടിട്ടുണ്ട്.
https://www.facebook.com/Malayalivartha